- 1
- Katahi a Ihowa ka whakahoki kupu mai ki a Hopa i roto i te tukauati, a ka mea,
- 2
- Ko wai tenei e whakapouri nei i nga whakaaro, a kahore ano he matauranga o ana kupu?
- 3
- Tena ra, whitikiria tou hope, whakatangata, a maku e ui atu ki a koe, mau hoki e whakaatu mai ki a au.
- 4
- I hea koe i a au e whakatakoto ana i te turanga o te whenua? Korerotia mai ki te mea e mohio ana koe ki te whakaaro.
- 5
- He mea ruri ia na wai? ki te mea e mohio ana koe: na wai hoki i whakamaro te aho ki runga?
- 6
- I whakaukia ona turanga ki runga ki te aha? na wai hoki i whakatakoto tona kohatu kokonga.
- 7
- I te mea i waiata ngatahi nga whetu o te ata, a i hamama i te koa nga tamariki katoa a te Atua?
- 8
- Na wai hoki i tutaki atu te moana ki nga tatau, i a ia e puta mai ana, me te mea e whanau mai ana i roto i te kopu?
- 9
- I a au ra i mea i te kapua hei kakahu mona, i te pouri kerekere hei popoki mona,
- 10
- A whakapuakina ana e ahau taku tikanga mona, mea rawa ki nga tutaki, ki nga tatau,
- 11
- Me taku ki atu ano, Ka taea mai a konei e koe, a heoi ano, ka mau hoki ki konei ou ngaru whakakake?
- 12
- Ko koe koia, i ou ra nei, te kai whakahau i te ata; nau ranei te puaotanga i mohio ai ki tona wahi;
- 13
- Kia hopukia atu e ia nga pito o te whenua, a ruperupea ake nga tangata kino i roto?
- 14
- Kua ahua ke, kua pera ano me te paru i te hiri: tu ake ana raua ano he kakahu.
- 15
- E kaiponuhia ana hoki to ratou māramatanga ki te hunga kino, whati iho te ringa whakakake.
- 16
- Kua tae atu ranei koe ki nga matapuna o te moana? kua whakatakina haeretia ranei e koe te rire?
- 17
- I whakapuaretia ranei ki a koe nga kuwaha o te mate? i kite ranei koe i nga kuwaha o te atarangi o te mate?
- 18
- Kua oti ranei te whakaaro e koe te whanuitanga o te whenua? Korerotia mai, ki te mea kua mohiotia katoatia e koe.
- 19
- Kei tehea ara te nohoanga o te māramatanga?—te pouritanga hoki, kei hea tona wahi?
- 20
- Kia kawea atu ai e koe ki tona rohe, a mohio iho koe ki nga huarahi ki tona whare?
- 21
- I mohio ai pea koe nou i whanau i taua wa, he maha hoki no ou ra.
- 22
- I tae atu ranei koe ki nga taonga o te hukarere? i kite ranei i nga taonga o te whatu,
- 23
- I aku i rongoa ai mo te wa o te he, mo te ra o te tatauranga, o te pakanga?
- 24
- Tena koa, te ara i marara atu ai te māramatanga, i pakaru atu ai te marangai ki runga ki te whenua?
- 25
- Na wai i wehe he awa mo te waipuke, he ara mo te uira o te whatitiri;
- 26
- Kia ua ai ki te whenua, ki te wahi kahore nei he tangata, ki te koraha tangata-kore?
- 27
- Hei whakamakona, i te tuhea, i te ururua; hei mea kia pariri te tupu o te otaota hou?
- 28
- He matua tane ano ranei to te ua? i whanau ranei i a wai nga pata o te tomairangi?
- 29
- I puta mai i roto i to wai kopu te tio? te huka o te rangi, he whanau tena na wai?
- 30
- Me te mea he kohatu e whakangaro ana i te wai; riro pu te mata o te rire.
- 31
- E taea ranei e koe te here nga ahuareka o Matariki, te wewete ranei nga here o Tautoru?
- 32
- E whakaputaina mai ranei e koe a Mataroto i tona wa, e arahina mai ranei a Aketura ratou ko ana tama?
- 33
- E mohio ana ranei koe ki nga tikanga o te rangi? mau ranei e whai mana ai ki runga ki te whenua?
- 34
- E ara ranei tou reo ki nga kapua, a nui atu te wai e taupokina ai koe?
- 35
- Mau ranei nga uira e unga atu, a haere ana ratou, me to ratou ki mai ano ki a koe, Tenei matou?
- 36
- Na wai i whakanoho nga whakaaro nui ki nga wahi o roto? na wai i homai nga mahara ki te ngakau?
- 37
- Ko wai te mea whakaaro nui hei tatau i nga kapua? ko wai hei whakamutu i ta nga ipu o te rangi;
- 38
- Ina ka papatupu te puehu ano he mea whakarewa, a ka piri nga pokuru ki a ratou ano?
- 39
- Mau ranei e hopu he kai ma te raiona? mau e nui ai he oranga mo nga kuao raiona?
- 40
- Ina tapapa iho ratou i o ratou nohoanga, ina noho i te piringa whanga atu ai?
- 41
- Na wai i rite ai tana kai ma te rawena, ina tangi ana pi ki te Atua, ina kopikopiko ratou i te kore kai?
Address: 
Phone: 
Email: