- 1
- E mohiotia ana ranei e koe te wa e whanau ai nga koati kamaka? e kitea putia ana ranei e koe te wa e whakamamae ai nga hāta?
- 2
- E taua ano ranei e koe nga marama e rite ana i a ratou? e mohio ana ranei koe ki te wa e whanau ai ratou?
- 3
- Tuohu ana ratou, kua puta mai a ratou kuao, akiritia mai ana e ratou o ratou mea whakapouri.
- 4
- E ahua pai ana a ratou kuao, e neke ake ana i te parae; haere ana ratou, kore ake e hoki mai ki a ratou.
- 5
- Na wai i tuku te kaihe mohoao kia haere noa atu; nga here o te kaihe mohoao, na wai i wewete?
- 6
- Te whare i whakaritea nei e ahau mona, ko te koraha: ona nohoanga te wahi titohea.
- 7
- Whakahaweatia iho e ia te ngangau o te pa; e kore ia e rongo ki te reo o te kai akiaki.
- 8
- Tana wahi kai kei nga maunga noa atu, e rapua ana e ia nga mea matomato katoa.
- 9
- E pai ranei te unikanga kia mahi ki a koe? kei to takotoranga kai ranei he moenga mona?
- 10
- E herea ranei e koe te unikanga ki tona taura i te awa parautanga? e rakarakatia ranei e ia nga raorao me tana whai ano i a koe?
- 11
- E whakawhirinaki atu ranei koe ki a ia, no te mea e nui ana tona kaha? e whakarerea atu ranei e koe to mahi mana?
- 12
- E whakapono atu ranei koe mana o hua e whakahoki mai, mana e kohikohi mai ki to patunga witi?
- 13
- Te parirau o nga moa, whakamanamana ana! koia ano kei nga hou, kei nga raukura o te tāka.
- 14
- E whakarerea ana e ia ona hua ki te whenua, whakamahanatia iho e ia ki te puehu,
- 15
- Wareware ake ia tera pea e pehia e te waewae, e takahia ranei e te kirehe o te parae.
- 16
- He mea pakeke ia ki ana pi, me te mea ehara i a ia, maumauria ake tana mahi, kahore he manawapa.
- 17
- No te mea i whakakahoretia e te Atua he ngakau mahara mona, kihai hoki i tuwhaina mai he whakaaro ki a ia.
- 18
- I te wa e maranga ai ia ki runga, whakahaweatia iho e ia te hoiho raua ko tona kai eke.
- 19
- Nau ranei i hoatu te kaha ki te hoiho? nau te whatitiri i mea iho hei kakahu mo tona kaki?
- 20
- Nau ranei ia i mea kia ohooho, kia pera me te mawhitiwhiti? he hanga whakawehi te kororia o tona whengu.
- 21
- Tana takatakahi, me te mea e keri ana i te raorao; koa tonu ia ki tona kaha; tika tonu atu ia ki nga patu.
- 22
- Whakahawea ana ia ki te wehi, kahore ona mataku; e kore ano ia e hoki mai i te hoari.
- 23
- Haruru ana te papapere i tona taha, te tao e wheriko tonu ana, me te timata.
- 24
- Takare tonu, ngana tonu ia, me te mea e horomia ana e ia te whenua: e kore ano ia e whakapono ko te tangi tera o te tētere.
- 25
- Tana ki ake i roto i nga tētere, Ha, ha! I tawhiti ano ka hongia mai e ia te pakanga, te whatitiri o nga rangatira, me te hamamatanga.
- 26
- He mohiotanga nou i rere ai te kāhu, i roha ai ona parirau, i anga ai whaka-te-tonga?
- 27
- Nau te kupu i kake atu ai te ekara? i hangā ai e ia tona ohanga ki te wahi tiketike?
- 28
- Noho ana ia i runga i te kamaka, tona kāinga kei te kamaka keokeo, kei te pa kaha.
- 29
- A rapua mai ana e ia he kai i reira; e kite atu ona kanohi ki tawhiti.
- 30
- Horomititia ake ano hoki nga toto e ana pi; a, te wahi i nga tupapaku, kei reira ano ia.
Address: 
Phone: 
Email: