- 1
- E taea ranei a Rewiatana te kukume mai e koe ki te matau? tona arero ranei ki te aho i tukua iho e koe?
- 2
- E whakanohoia ranei e koe te aho ki tona ihu? e pokaia ranei e koe tona kauae ki te koikoi?
- 3
- E maha ranei ana inoinga ki a koe? e korero ngawari mai ranei ia ki a koe?
- 4
- E whakarite kawenata ranei ia ki a koe? e riro mai ranei ia i a koe hei pononga oti tonu mai?
- 5
- Ka rite ranei ia ki te manu hei mea takaro mau? e herea ranei ia e koe hei mea ma o kotiro?
- 6
- E waiho ranei ia hei kai ma nga hoa? e wehewehea atu ranei ma nga kai hokohoko?
- 7
- E kapi ranei tona kiri i o tao? tona pane i nga wero ika?
- 8
- Kia pa atu to ringa ki a ia, kore ake o maharatanga ki te whawhai.
- 9
- He teka noa nga meatanga kia patua ia, ko te kitenga kautanga i a ia hei turaki i te tangata.
- 10
- Kahore he tangata maia hei whakaoho i a ia: ko wai hoki e tu ki toku aroaro?
- 11
- Na wai te mea kua takoto wawe ki a au mo taku utu atu? puta noa i raro i nga rangi, naku katoa.
- 12
- E kore e hunā e ahau te korero mo ona wahi, mo tona kaha, mo te pai hoki o tona hanganga.
- 13
- Ma wai e hura a waho o tona kakahu? ko wai e haere atu me tana paraire rere rua ki a ia?
- 14
- Ma wai e whakapuare nga tatau o tona mangai? he wehi kei ona niho, a taka noa.
- 15
- Tana e whakamanamana ai, ko ona unahi; tutaki rawa, he hīri piri tonu.
- 16
- Tata tonu tetahi ki tetahi, e kore hoki te hau e puta i waenga.
- 17
- Piri tonu ratou ki a ratou ano, mau tonu, e kore ano e taea te wehe.
- 18
- Ka tihe ia, puta ana te māramatanga; ona kanohi hoki, rite tonu ki nga kamo o te ata.
- 19
- Puta mai ana nga rama mura i roto i tona mangai, mokowhiti mai ana nga korakora ahi.
- 20
- Puta mai ana te paowa i roto i ona pongaponga, me te mea no te kohua, no te paera ranei i te mea e koropupu ana.
- 21
- Ngiha ana nga waro i tona manawa, puta mai ana te mura i roto i tona mangai.
- 22
- Kei tona kaki te kaha e noho ana, a mokowhiti ana te pawera i tona aroaro.
- 23
- Ona kikokiko e tawerewere ra, piri tonu, maro tonu i tona taha, e kore e taea te whakaara ake.
- 24
- Maro tonu tona ngakau anō he kamaka, maro tonu anō ko tetahi maramara no to raro kohatu o te huri.
- 25
- Ka maranga ia, ka wehi nga tangata nui: pohehe ana ratou i a ratou e whati ana.
- 26
- E kore e u te hoari a te tangata e whai mai ana i a ia, te tao, te pere, te pukupuku.
- 27
- Ki tana whakaaro he kakau witi te rino, he rakau popopopo te parahi.
- 28
- E kore ia e oma i te pere, puta ke ana ki tana nga kohatu o te kotaha hei papapa.
- 29
- Kiia ake e ia nga kokiri hei papapa, he kata tonu tana ki te tao e wiriwiri ana.
- 30
- He kohatu koikoi kei raro i a ia, he mea koi ana e whariki ai ki runga ki te paru.
- 31
- Koropupu ana i a ia te rire ano he kohua, e meinga ana e ia te moana kia rite ki te hinu whakawahi.
- 32
- Mārama tonu te huarahi i muri i a ia; ki ta te tangata whakaaro he hina te moana.
- 33
- I runga i te whenua nei kahore he mea hanga hei rite mona, he mea kahore nei ona wehi.
- 34
- He titiro atu tana ki nga mea tiketike katoa: hei kingi ia mo nga tamariki katoa a te whakapehapeha.
Address: 
Phone: 
Email: