- 1
- Ano ra ko Hopa ki a Ihowa; i mea ia,
- 2
- E mohio ana ano ahau e taea ano nga mea katoa e koe, a e kore tetahi whakaaro au e taea te pehi.
- 3
- Ko wai tenei e whakapouri nei i nga whakaaro, a kahore nei he matauranga? Na reira korerotia ana e ahau nga mea kihai i mohiotia e ahau, nga mea whakamiharo e kore nei e taea, e kore e matauria e ahau.
- 4
- Tena ra, whakarongo mai, a ka korero atu ahau; ka ui atu ahau ki a koe, a mau e whakaatu mai ki a au.
- 5
- I rongo ahau ki a koe i mua, he rongo na te taringa, tena ko tenei ka kite nei toku kanohi i a koe.
- 6
- Na whakarihariha ana ahau ki a au ano, ripeneta ana i roto i te puehu, i te pungarehu.
- 7
- Heoi i te mutunga o ta Ihowa korerotanga i enei kupu ki a Hopa, na, ka mea a Ihowa ki a Eripata Temani, Kua mura taku riri ki a koutou ko ou hoa tokorua, no te mea kihai i tika a koutou korero moku, kihai i rite ki ta taku pononga ki ta Hopa.
- 8
- Na, tikina atu etahi puru ma koutou kia whitu, kia whitu ano nga hipi toa, haere hoki ki taku pononga ki a Hopa, ka whakaeke ai i etahi tahunga tinana hei mea mo koutou, a ma taku pononga ma Hopa e inoi mo koutou; ka manako atu hoki ahau ki a ia; kei rite ki ta koutou wairangi taku e mea ai ki a koutou, kihai hoki i tika a koutou korero moku, kihai i rite ki ta taku pononga ki ta Hopa.
- 9
- Na, haere ana a Eripata Temani, a Pirirara Huhi, a Topara Naamati, a meatia ana e ratou ta Ihowa i korero ai ki a ratou. I manako mai ano hoki a Ihowa ki a Hopa.
- 10
- I whakaputaina ketia ano hoki e Ihowa te whakaraunga o Hopa, i a ia i inoi ra mo ona hoa. Na, nga mea katoa i a Hopa i mua, whakanekehia ake ana e Ihowa kia pera atu ano te maha.
- 11
- A i haere mai ano ona tuakana, (teina) katoa, ratou ko ona tuahine katoa me te hunga katoa i mohio ki a ia i mua hei hoa mona, ki te kai taro i roto i tona whare: tangi ana ki a ia, whakamarie ana i a ia mo te he katoa i kawea mai nei e Ihowa ki runga ki a ia; a homai ana ki a ia e tenei, e tenei, tetahi moni me tetahi whakakai koura, he mea na tenei, na tenei.
- 12
- Na, manaakitia ana a Hopa e Ihowa i te whakamutunga, nui atu i to te timatanga, a kotahi tekau ma wha mano ana hipi, e ono mano nga kamera, kotahi mano topu nga kau, kotahi mano nga kaihe uha.
- 13
- Tokowhitu ano ana tama, tokotoru nga tamahine.
- 14
- A tapā iho e ia te ingoa o te tuatahi ko Temima, te ingoa o te tuarua ko Ketia, te ingoa o te tuatoru ko Kerenehapuku.
- 15
- A kihai i kitea he wahine hei rite mo nga tamahine a Hopa te ataahua puta noa i te whenua katoa; a i homai ano e to ratou pāpā he wahi mo ratou i waenganui i o ratou tungane.
- 16
- A i ora ano a Hopa i muri i tenei, kotahi rau e wha tekau nga tau, i kite ano ia i ana tamariki, i nga tamariki ano hoki a ana tamariki, e wha nga whakatupuranga.
- 17
- Katahi a Hopa ka mate, he koroheke, he maha hoki ona ra.
Address: 
Phone: 
Email: