- 1
- Katahi ka whakahokia mai e Pirirara Huhi; i mea ia,
- 2
- Kia pehea ake te roa o to korerotanga i enei mea, ka rite tonu ranei nga kupu a tou mangai ki te hau kaha?
- 3
- E whakaparori ke ranei te Atua i te whakarite whakawa? e whakaparori ke ranei te Kaha-rawa i te tika?
- 4
- Ki te mea i hara o tamariki ki a ia, a kua makā atu ratou e ia hei utu mo to ratou he;
- 5
- Ki te rapu wawe koe i te Atua, a ka inoi ki a te Kaha-rawa;
- 6
- Ki te mea he ma koe, he tika, ina, ka ara ake ia ki a koe aianei, ka manaakitia ano e ia te nohoanga o to tika.
- 7
- Ahakoa i iti to timatanga, e nui noa atu tou whakamutunga.
- 8
- Tena ra, ui atu ki to mua whakatupuranga; anga atu hoki ki o ratou mātua rapu ai.
- 9
- Nonanahi nei hoki tatou, kahore hoki e mohio; he atarangi nei hoki o tatou ra i runga i te whenua.
- 10
- E kore ranei ratou e whakaako i a koe, e korero ki a koe; e kore ranei e puaki mai he kupu i o ratou ngakau?
- 11
- E tupu ranei te wiwi i te mea kahore he repo? e nui ranei te raupo ki te kahore he wai?
- 12
- I te mea e kaiota tonu ana, a kihai i tapahia, kua maroke i mua ake i nga otaota katoa.
- 13
- Ka pera ano nga huarahi o te hunga katoa e wareware ana ki te Atua, a ka riro ki te kore ta te tangata ngutu kau i tumanako atu ai.
- 14
- Ka motuhia atu tana i whakamanawa atu ai, ko te whare hoki o te pungawerewere hei tumanakohanga atu mana.
- 15
- Ka okioki atu ia ki tona whare; heoi e kore e tu: u tonu tona pupuri atu, otiia e kore e mau.
- 16
- E matomato ana i te mea kahore nei te ra, a e wana ana tona peka i tana kāri.
- 17
- Kapi tonu te puranga i ona pakiaka, e kitea ana e ia te wahi kamaka.
- 18
- Ki te whakamotitia iho ia i tona wahi, ka whakakahore taua wahi ki a ia, ka mea, Kahore ahau i kite i a koe.
- 19
- Ko te hari tenei o tona ara, a ka tupu ake etahi atu i roto i te puehu.
- 20
- Nana, e kore te Atua e whakakahere ki te tangata tika, e kore ano hoki e puritia e ia te ringa o nga tangata kino.
- 21
- Tera ano tou mangai ka whakakiia e ia ki te kata, ou ngutu ano hoki ki te hamama.
- 22
- He whakama te kakahu mo te hunga e kino ana ki a koe, a ka kahore noa iho te tapenakara o te hunga kino.
Address: 
Phone: 
Email: