- 1
- Katahi ka whakahokia mai e Hopa; i mea ia,
- 2
- E mohiotia ana ano tenei e ahau; ma te aha ia ka tika ai te tangata ki ta te Atua?
- 3
- Ki te pai ia ki te totohe ki a ia, kahore he mea kotahi o te mano e whakahoki kupu ai ia ki a ia.
- 4
- He ngakau mohio ia, pakari tonu tona kaha: ko wai e pakeke ki a ia: a e whai pai?
- 5
- E nekehia ana e ia nga maunga, tē mohio ano ratou; hurihia ake e ia i a ia e riri ana.
- 6
- E whakangaueuetia ana e ia te whenua, e nekehia atu ana i tona wahi; wiri ana ona pou.
- 7
- E korero nei ki te ra, a kore ake e whiti; hiritia putia iho e ia nga whetu.
- 8
- Ko ia nei anake hei hora i nga rangi, hei takahi i runga i nga huamo o te moana.
- 9
- Nana nei i hanga a Aketura, a Tautoru, a Matariki, me nga ruma i te tonga.
- 10
- Mahia ana e ia nga mea nui, e kore nei e taea te rapu atu, me nga mea whakamiharo, e kore nei e taea te tatau,
- 11
- Nana, tata tonu ia ki a au i tona haerenga atu, a kahore ahau e kite; kua pahemo atu, a kihai ahau i matau ki a ia.
- 12
- Nana, ka tango ia, ma wai ia e whakahoki atu? ko wai hei ki atu ki a ia, E aha ana koe?
- 13
- Ki te kahore te Atua e whakahoki iho i tana riri, ka piko ki raro i a ia nga kai awhina whakapehapeha,
- 14
- A, kia whakahoki kupu ano ahau ki a ia! kia whiriwhiri kupu ano maku ki a ia!
- 15
- Ahakoa he tika ahau, e kore ahau e whakahoki kupu atu; engari ka inoi ahau ki toku kai whakarite whakawa.
- 16
- Ki te mea i karanga atu ahau, a kua whakahoki mai ia i te kupu ki a au, kihai ahau i whakaae atu kua whakarangona mai e ia toku reo.
- 17
- E aki ana hoki ia i a au ki te tupuhi, e whakanui pakupaku ana hoki i oku mate.
- 18
- Kahore ahau e tukua e ia kia ta toku manawa; heoi whakakiia ana e ia toku wairua ki te kawa.
- 19
- Nana, ki te mea he kaha taku e whakaaro ai, ko ia ra hoki te mea; a, ki te mea he whakarite whakawa, ko wai ra hei whakatakoto i te whakawakanga maku?
- 20
- Ki te whakatika ahau i a au ano, ma toku mangai ahau e whakahe: ki te mea ahau he tikanga tapatahi taku, ma taua mangai ano e whakaatu toku ngaunga ketanga,
- 21
- Ahakoa i tika ahau, e kore ahau e mohio ki toku wairua; ka whakahawea ano ahau ki toku ora.
- 22
- Ko tetahi mea tenei, koia i korerotia ai e ahau, E whakamotitia ana e ia te tapatahi me te kino.
- 23
- Na, ka whakamate tata nei te whiu, he kata tana ki te whakamatautauranga o te hunga hara-kore.
- 24
- Kua hoatu te whenua ki te ringa o te tangata kino; e taupokina ana e ia nga mata o ona kai whakarite whakawa. Ki te kahore, kei hea, ko wai hoki ia?
- 25
- Na, te hohoro o oku ra, nui atu i to te kai kawe pukapuka; e rere ana, kahore hoki e kite i te pai.
- 26
- Kua pahemo atu, kua pera ano me nga kaipuke tere, me te ekara ano e kokiri iho ana ki tana kai.
- 27
- Ki te mea ahau, Ka wareware ahau ki taku tangi, ka mahue toku pouri, a ka mārama:
- 28
- Na, ka wehi ahau i oku mamae katoa; e mohio ana ahau e kore ahau e whakahara-koretia e koe.
- 29
- Ki te mea e kino ana ahau, he aha ahau i whakangenge kau ai i a au?
- 30
- Ki te horoi ahau i a au ki te hukarere, a ka meinga oku ringa kia ma rawa;
- 31
- Katahi ahau ka rumakina e koe ki te poka, a whakarihariha mai ana oku kakahu ki a au.
- 32
- Ehara hoki ia i te tangata, i te penei me au nei, e whakahoki kupu atu ai ahau ki a ia, e haere tahi ai maua ki te whakarite whakawa.
- 33
- Kahore he kai whakatikatika mo ta maua, kahore he tangata hei whakapa i tona ringa ki runga ki a maua.
- 34
- Kia nekehia atu tana patu i a au; kaua hoki tana wehi e whakawehi i a au.
- 35
- Katahi ahau ka korero, a e kore e wehi i a ia. Kahore ia ahau e pera inaianei.
Address: 
Phone: 
Email: