- 1
- He rota ano ta te iwi o Manahe; (ko ia hoki te matamua a Hohepa), ara, ta Makiri ta te matamua a Manahe, ta te matua o Kireara: he tangata hapai pakanga hoki ia, a i a ia a Kireara, a Pahana.
- 2
- He rota ano hoki ta era atu tamariki a Manahe, ta tenei hapu ta tenei hapu o ratou; ta nga tamariki a Apietere, ta nga tamariki hoki a Hereke, ta nga tamariki hoki a Ahariere, ta nga tamariki a Hekeme, ta nga tamariki hoki a Hewhere, ta nga tamariki hoki a Hemira: ko nga tamariki enei a Manahe tama a Hohepa, tenei hapu tenei hapu o ratou.
- 3
- Otiia kahore he tamariki tane a Teropehara tama a Hewhere, ko ia nei te tama a Kireara, ko ia nei te tama a Makiri, a he tama ia na Manahe; engari he tamahine: a ko nga ingoa enei o ana tamahine, ko Mahara, ko Noa, ko Hokora, ko Mireka, ko Tirita.
- 4
- Na, ka whakatata mai ratou ki te aroaro o Ereatara tohunga, ki te aroaro o Hohua tama a Nunu, ki te aroaro ano hoki o nga ariki, a ka mea, I whakahau a Ihowa i a Mohi kia homai he kāinga tupu ki a matou i roto i o matou tungane. Na, hoatu ana e ia ki a ratou ta Ihowa i ki ai, he kāinga tupu i roto i nga teina o to ratou papa.
- 5
- A kotahi tekau nga wahi i taka ki a Manahe, he mea tapiri mai ki te whenua o Kireara, o Pahana, i tera taha o Horano;
- 6
- No te mea i riro mai he kāinga tupu mo nga tamahine a Manahe i roto i ana tama, a i riro te whenua o Kireara i nga tama a Manahe i mahue.
- 7
- A kei a Ahera te rohe ki a Manahe, a tae noa ki Mikimeta, ki tera i te ritenga atu o Hekeme; a i haere tonu te rohe ki te taha ki matau, ki nga tangata o Enetapua.
- 8
- I a Manahe te whenua o Tapua: i nga tamariki ia a Eperaima a Tapua i te rohe a Manahe;
- 9
- A i puta iho te rohe ki te awa ki Kana ki te taha ki te tonga o te awa: ko enei pa o Eperaima kei roto i nga pa o Manahe: kei te taha hoki ki te nota o te awa te rohe a Manahe, a kei te moana ona putanga atu.
- 10
- I a Eperaima te taha ki te tonga, i a Manahe hoki te taha ki te nota, a ko te moana hei rohe ki a ia; a i tutaki ki a Ahera ki te taha ki te nota, ki a Ihakara ano hoki ki te taha ki te rawhiti.
- 11
- A, i riro i a Manahe i roto i to Ihakara i to Ahera ko Pete-heana, me ona pa koraha, ko Ipireama, me ona pa ririki, nga tangata o Roro, me ona pa ririki, nga tangata o Ene-roro, me ona pa ririki, nga tangata o Taanaka, me ona pa ririki, nga tangata ano hoki o Mekiro, me ona pa ririki; e toru nga wahi.
- 12
- Otiia kihai i taea e nga tamariki a Manahe te pei nga tangata o ena pa; na, ka mea nga Kanaani kia noho ki tera whenua.
- 13
- Otiia ka kaha nga tamariki a Iharaira, na ka meinga nga Kanaani hei kai homai takoha; ko te pei ia kihai ratou i peia.
- 14
- Na, ka korero mai nga tamariki a Hohepa ki a Hohua, ka mea, Na te aha i kotahi ai te rota, i kotahi ai te wahi i homai e koe ki a au hei kāinga tupu, he iwi nui nei hoki ahau, he manaakitanga hoki ahau na Ihowa, a, mohoa noa nei.
- 15
- Na, ko te meatanga atu a Hohua ki a ratou, Ki te mea he iwi nui koe, haere ki runga ki te wahi ngahere, tua ai mau ki reira, ki te whenua o nga Perihi ratou ko nga Repaima, ki te kuiti a Maunga Eparaima mou.
- 16
- Katahi ka mea mai nga tamariki a Hohepa, E kore te maunga e nui mo matou: he hariata rino ano hoki a nga Kanaani katoa e noho ana i te wahi mānia, a era i Pete-heana, me ona pa ririki, a te hunga hoki i te mānia i Ietereere.
- 17
- Na, ka korero atu a Hohua ki te whare o Hohepa, ki a Eperaima raua ko Manahe, a ka mea, He iwi nui koe, e nui ana hoki tou kaha: e kore e whakakotahitia te rota mou:
- 18
- Mou hoki te maunga; he wahi ngahere hoki ia, a mau ano e tua: mou ano hoki ona putanga atu: ka peia hoki nga Kanaani e koe, he aha ratou te whai hariata rino noa ai, te kaha noa ai.
Address: 
Phone: 
Email: