- 1
- Katahi ka karanga a Hohua ki nga Reupeni, ki nga Kari, ki tetahi taanga hoki o te iwi o Manahe,
- 2
- A, ka mea ki a ratou, Kua mau i a koutou nga mea katoa i whakahau ai a Mohi te pononga a Ihowa ki a koutou, kua whakarongo mai hoki koutou ki toku reo ki nga mea katoa i whakahau ai ahau ki a koutou:
- 3
- Kihai koutou i whakarere i o koutou tuakana i enei rangi e maha, a, tae noa mai ki tenei ra, engari i ata pupuri marie koutou i te whakahaunga a Ihowa a to koutou Atua.
- 4
- Na, kua mea nei a Ihowa to koutou Atua i o koutou tuakana kia okioki, ka rite ki tana i korero ai ki a ratou: na, hoki atu, haere ki o koutou teneti, ki te whenua hoki i whiwhi na koutou, i hoatu e Mohi e te pononga a Ihowa ki a koutou i tera taha o Horano.
- 5
- Otira kia mahara marie kia mahia te whakahaunga me te ture, i whakahau ai a Mohi te pononga a Ihowa ki a koutou, ara, kia aroha atu koutou ki a Ihowa ki to koutou Atua, kia haere hoki i ona huarahi katoa, kia pupuri hoki i ana whakahaunga, kia awhi hoki ki a ia, kia whakapotoa o koutou ngakau katoa, o koutou wairua katoa ki te mahi ki a ia.
- 6
- Katahi ka manaaki a Hohua i a ratou, a tukua ana kia haere: a haere ana ratou ki o ratou teneti.
- 7
- Na i hoatu e Mohi he kāinga i Pahana ki tetahi taanga o te iwi o Manahe: na, hoatu ana e Hohua ki tetahi taanga he kāinga i roto i o ratou tuakana i tenei taha o Horano i te taha ki te hauauru. A, i ta Hohua tukunga atu i a ratou ano hoki ki o ratou teneti, i manaaki ano ia i a ratou,
- 8
- A, i korero ano ia ki a ratou, i mea atu, Hoki atu ki o koutou teneti me nga taonga maha, me nga kararehe tini noa iho, me te hiriwa, me te koura, me te parahi, me te rino, me nga kakahu maha rawa: tuwhaina atu nga taonga o o koutou hoa riri ki o koutou tuakana.
- 9
- Na hoki ana nga tamariki a Reupena, me nga tamariki a Kara, me tetahi taanga o te iwi o Manahe, mawehe ana i roto i nga tamariki a Iharaira i Hiro i te whenua o Kanaana, a, haere ana ki te whenua o Kireara, ki te whenua i whiwhi ai ratou, i whakawhiwhia mai ki a ratou e te kupu a Ihowa i whakapuakina e Mohi.
- 10
- A, to ratou taenga mai ki nga taha o Horano, ki enei i te whenua o Kanaana, na, hangā ana e nga tamariki a Reupena, e nga tamariki a Kara, me tetahi taanga o te iwi o Manahe, tetahi aata ki reira ki te taha o Horano, he aata nui hei tirohanga atu.
- 11
- Na, te rongonga o nga tamariki a Iharaira i te korero, Nana, kua hanga nga tamariki a Reupena, me nga tamariki a Kara, me tetahi taanga o te iwi o Manahe, i tetahi aata ki te ritenga mai o te whenua o Kanaana ki nga taha o Horano, i te wahi i whiti mai ai nga tamariki a Iharaira.
- 12
- A, te rongonga o nga tamariki a Iharaira, na huihui ana te whakaminenga katoa o nga tamariki a Iharaira ki Hiro, i mea kia haere ki te whawhai ki a ratou.
- 13
- Na, ka tono atu nga tamariki a Iharaira i a Pinehaha tama a Ereatara tohunga ki nga tamariki a Reupena, ki nga tamariki hoki a Kara, ratou ko tetahi taanga o te iwi o Manahe, ki te whenua o Kireara,
- 14
- Me etahi rangatira kotahi tekau hei hoa mona, tataki kotahi te rangatira o ia whare nui o ia whare nui o nga iwi katoa o Iharaira; a, he ariki ano ratou, a ia tangata a ia tangata no nga whare o o ratou matua i roto i nga mano o Iharaira.
- 15
- Na, haere mai ana ratou ki nga tamariki a Reupena, ki nga tamariki hoki a Kara, ki tetahi taanga hoki o te iwi o Manahe, ki te whenua o Kireara, a ka korero ki a ratou ka mea,
- 16
- Tenei te korero a te whakaminenga katoa a Ihowa, He aha tenei hara i mea nei koutou ki te Atua o Iharaira, i a koutou ka tahuri atu nei i tenei ra i te whai i a Ihowa, ka hanga nei i tetahi aata ma koutou, hei mahi tutu ma koutou ki a Ihowa?
- 17
- He nohinohi ianei ki a tatou te haranga ki a Peoro, kahore nei i horoia atu i a tatou, a, tae noa ki tenei ra, i whai mate ai hoki te whakaminenga a Ihowa,
- 18
- E tahuri ke nei koutou i tenei ra i te wahi i a Ihowa? na, ki te mea ka tutu koutou i tenei ra ki a Ihowa, apopo riri ai ia ki te whakaminenga katoa o Iharaira.
- 19
- Otiia, ki te mea e poke ana te whenua e noho nei koutou, haere ake ki te whenua e nohoia ana e Ihowa, e tu nei ki reira te tapenakara o Ihowa, a me noho ki waenganui i a matou: kaua hoki e tutu ki a Ihowa, kaua ano hoki e tutu ki a matou, i a koutou ka hanga nei i tetahi aata ke atu ma koutou i te aata a Ihowa a to tatou Atua.
- 20
- Kahore ianei a Akana te tama a Tera i taka ki te hara i te mea kanga, a horapa ana te riri ki te whakaminenga katoa o Iharaira? a kihai i mate ko taua tangata anake mo tana hara.
- 21
- Katahi ka whakahokia mai e nga tamariki a Reupena, e nga tamariki a Kara, me tetahi taanga o te iwi o Manahe, a ka mea mai ki nga ariki o nga mano o Iharaira,
- 22
- Ko Ihowa ko te Atua o nga atua, ko Ihowa ko te Atua o nga atua, e mohio ana ia, ko Iharaira hoki ka mohio ano ia; na te tutu, na te hara ranei ki a Ihowa, (penei kaua matou e whakaorangia i tenei ra,)
- 23
- I hangā ai e matou tetahi aata hei tahuritanga ketanga i muri i a Ihowa, hei whakaekenga atu ranei mo tetahi tahunga tinana mo tetahi whakahere ranei, hei meatanga ranei mo tetahi patunga whakamarie ki runga i tena mea, ma Ihowa ake ano e rapu utu;
- 24
- Me kahore ranei i meatia tenei mea e matou i te wehi o te korero, e korerotia nei, Apopo ake nei korero mai ai a koutou tamariki ki a matou tamariki, mea mai ai, He aha ra ta koutou kei a Ihowa, kei te Atua o Iharaira?
- 25
- Kua whakatakotoria nei hoki e Ihowa a Horano hei rohe ki waenganui o matou, o koutou, e nga tamariki a Reupena, ratou ko nga tamariki a Kara; kahore o koutou wahi i roto i a Ihowa: na, ka whakamangere a koutou tamariki i a matou tamariki e kore ai e wehi i a Ihowa.
- 26
- Koia matou i mea ai, Tena, tatou ka haere, ka hanga i tetahi aata ma tatou, ehara i te mea mo nga tahunga tinana, mo nga patunga tapu ranei:
- 27
- Engari kia ai tena mea hei kai whakaatu ki a matou, ki a koutou, ki o tatou uri hoki i muri i a tatou, kia mahi ai tatou i nga mahi a Ihowa ki tona aroaro, i a tatou tahunga tinana, i a tatou patunga tapu, me a tatou whakamarietanga; kei mea a koutou tamariki ki a matou tamariki apopo ake nei, Kahore o koutou wahi i roto i a Ihowa.
- 28
- Koia matou i mea ai, Na, tenei ake, kei ta ratou meatanga mai a mua ki a tatou, ki o tatou uri ranei, na, ka mea atu tatou, Titiro atu ki te mea e rite ana ki te aata o Ihowa, i hangā e o matou matua, ehara i te mea mo nga tahunga tinana, mo nga patunga tapu; kahore, hei kai whakaatu tena mea ki a matou, ki a koutou.
- 29
- Aue, kia tutu matou ki a Ihowa, kia tahuri atu i tenei ra i muri i a Ihowa, ki te hanga i tetahi aata mo nga tahunga tinana, mo nga whakahere, mo nga patunga tapu ranei, hei mea ke atu i te aata o Ihowa o to tatou Atua i mua mai o tona tapenakara.
- 30
- A, te rongonga o Pinehaha tohunga, ratou ko nga rangatira o te whakaminenga, ko nga upoko o nga mano o Iharaira, ki nga kupu i korerotia mai e nga tamariki a Reupena, ratou ko nga tamariki a Kara, ko nga tamariki a Manahe, na, pai tonu ki a ratou.
- 31
- Katahi ka mea atu a Pinehaha tama a Ereatara tohunga ki nga tamariki a Reupena, ratou ko nga tamariki a Kara, ko nga tamariki a Manahe, No tenei ra matou i mohio ai kei waenganui i a tatou a Ihowa, ina hoki kihai koutou i taka ki tenei hara ki a Ihowa: na, kua whakaora nei koutou i nga tamariki a Iharaira i te ringaringa o Ihowa.
- 32
- Katahi ka hoki mai a Pinehaha tama a Ereatara tohunga, me nga rangatira, i nga tamariki a Reupena, ratou ko nga tamariki a Kara, i te whenua o Kireara, ki te whenua o Kanaana, ki nga tamariki a Iharaira, ki te whakahoki mai i te korero ki a ratou.
- 33
- A, pai tonu te korero ki nga tamariki a Iharaira; na, whakapai atu ana nga tamariki o Iharaira ki te Atua, kihai hoki ratou i mea kia haere ki runga ki a ratou ki te whawhai, ki te huna i te whenua e nohoia ana e nga tamariki a Reupena, ratou ko nga tamariki a Kara.
- 34
- Na, huaina iho taua aata e nga tamariki a Reupena, ratou ko nga tamariki a Kara, ko Eri: hei kai whakaatu hoki tena mea ki a tatou ko Ihowa te Atua.
Address: 
Phone: 
Email: