- 1
- A i korero mai ano a Ihowa ki a Mohi raua ko Arona, i mea,
- 2
- Korero atu ki nga tamariki a Iharaira, mea atu ki a ratou, Ki te mea he rere to tetahi tangata, no roto i tona kikokiko, e poke ana ia i tona rere.
- 3
- A ko tona poke tenei i a ia e rere nei: ahakoa rere te rere o tona kikokiko, ahakoa kua mimiti te rere o tona kikokiko, he mea whakapoke tena i a ia.
- 4
- A e poke ana ano nga moenga katoa e takoto ai te tangata i te rere: ka poke ano hoki nga mea katoa e noho ai ia.
- 5
- Ki te pa atu hoki tetahi ki tona moenga, me horoi e ia ona kakahu, me ia ano hoki me horoi ki te wai, ka poke hoki ia, a, ahiahi noa.
- 6
- Ki te noho hoki tetahi ki runga ki tetahi mea i nohoia e te tangata i te rere, me horoi e ia ona kakahu, me ia ano hoki me horoi ki te wai, ka poke hoki ia, a, ahiahi noa.
- 7
- A ki te pa atu tetahi ki te kikokiko o te tangata i te rere, me horoi e ia ona kakahu, me ia ano hoki me horoi ki te wai, ka poke hoki ia, a, ahiahi noa.
- 8
- A ki te tuwha atu te tangata i te rere ki tetahi tangata poke-kore, na, me horoi e ia ona kakahu, me ia ano hoki me horoi ki te wai, ka poke hoki ia, a, ahiahi noa.
- 9
- A ki te nohoia e te tangata he rere tona tetahi nohoanga hoiho, ka poke tena mea.
- 10
- Ki te pa atu hoki tetahi tangata ki tetahi o nga mea o raro i a ia, ka poke ia, a, ahiahi noa: ki te mauria hoki e tetahi tangata tetahi o aua mea, me horoi e ia ona kakahu, me ia ano hoki me horoi ki te wai, ka poke hoki ia, a, ahiahi noa.
- 11
- Ki te pa atu hoki te tangata he rere tona ki tetahi atu, i te mea kahore ano i horoia ona ringaringa ki te wai, me horoi e ia ona kakahu, me ia ano hoki me horoi ki te wai, ka poke hoki ia, a, ahiahi noa.
- 12
- Me wawahi ano hoki te oko oneone i pāngia atu e te tangata he rere tona: ko nga oko rakau katoa ia me horoi ki te wai.
- 13
- A e purea i tona rere te tangata he rere tona; na, me tatau e ia nga rangi e whitu mo tona purenga, na, ka horoia e ia ona kakahu, me horoi ano hoki tona kikokiko ki te wai ora, a ka kore ona poke.
- 14
- A i te waru o nga ra me tiki e ia, kia rua nga kukupa, kia rua ranei nga pi kukupa, a ka haere ki te aroaro o Ihowa ki te whatitoka o te tapenakara o te whakaminenga, ka hoatu ai ki te tohunga:
- 15
- Na, ka whakaherea aua mea e te tohunga, tetahi hei whakahere hara, tetahi hoki hei tahunga tinana; a ka mea whakamarietanga te tohunga mona ki te aroaro o Ihowa mo tona rere.
- 16
- Ki te paheke mai hoki te purapura moenga o tetahi tangata, na, me horoi e ia tona tinana katoa ki te wai, ka poke hoki ia, a, ahiahi noa.
- 17
- Me horoi ano hoki ki te wai nga kakahu katoa, me nga hiako kei aua mea nei te purapura moenga, ka poke hoki aua mea, a, ahiahi noa.
- 18
- Ki te moe maori hoki tetahi tangata ki tetahi wahine, me horoi raua ki te wai, ka poke hoki raua, a, ahiahi noa.
- 19
- A ki te mea he rere to tetahi wahine, a he toto te rere o tona kikokiko, me whakamotuhake atu, kia whitu nga ra: ka poke ano hoki nga tangata katoa e pa ana ki a ia, a, ahiahi noa.
- 20
- Ka poke ano hoki nga mea katoa e takotoria ana e ia i tona whakamotuhaketanga; ka poke ano hoki nga mea katoa e noho ai ia.
- 21
- Ki te pa hoki tetahi ki tona moenga, me horoi e ia ona kakahu, a ia ake ano hoki me horoi ki te wai, ka poke hoki ia, a, ahiahi noa.
- 22
- Ki te pa atu hoki tetahi ki tetahi mea i noho ai ia, me horoi e ia ona kakahu, a ia ake ano hoki me horoi ki te wai, ka poke hoki ia, a, ahiahi noa.
- 23
- Ahakoa i runga taua mea i tona moenga, i runga ranei i tetahi mea e nohoia ana e ia, ki te pa atu tetahi, ka poke ia, a, ahiahi noa.
- 24
- Ki te takoto hoki tetahi tangata ki a ia, a ka mau ki a ia ona whakapoke, ka poke ia, a, whitu noa nga ra: ka poke katoa ano hoki te moenga e takoto ai ia.
- 25
- A ki te maha nga ra o te rerenga toto o tetahi wahine, a, ehara i te wa e whakamotuhaketia ai ia; ki te roa atu ranei te rerenga i to te wa e whakamotuhaketia ai ia; ka pera ano me nga ra o tona motuhaketanga, nga ra katoa e rere ai tona whakapoke; ka poke ia.
- 26
- Ka pera ano ki a ia me te moenga o tona motuhaketanga nga moenga katoa e takoto ai ia i nga ra katoa e rere ai: ka poke ano hoki nga mea katoa e noho ai ia, ka rite ki te whakapoke o tona motuhaketanga.
- 27
- Ka poke ano hoki te tangata e pa ana ki aua mea, me horoi ano hoki era ona kakahu, a ia ake ano hoki me horoi ki te wai, ka poke hoki ia, a, ahiahi noa.
- 28
- Otiia ki te mea kua whakapoke-koretia taua wahine i te rere, na, ka taua e ia nga rangi e whitu, a, muri iho ka kore ona poke.
- 29
- A i te waru o nga ra me tiki e ia kia rua nga kukupa, kia rua ranei pi kukupa mana, a ka kawea mai ki te tohunga, ki te whatitoka o te tapenakara o te whakaminenga.
- 30
- A me whakahere tetahi e te tohunga hei whakahere hara, me tetahi hoki hei tahunga tinana, a ka mea whakamarietanga te tohunga mona ki te aroaro o Ihowa mo te rere o tona whakapoke.
- 31
- Kia penei ta koutou whakamotuhake mai i nga tamatiki a Iharaira i o ratou whakapoke: kei mate ratou i runga i o ratou poke, ina whakapokea taku tapenakara e tu na i roto i a ratou.
- 32
- Ko te ture tenei mo te tangata he rere tona, mo te tangata hoki kua paheke atu tona purapura moenga, a poke iho i taua mea;
- 33
- Mo te wahine hoki e paheke ana, mo te tangata hoki he rere tona, mo te tane raua ko te wahine, mo te tangata hoki i moe tahi ki te wahine poke.
Address: 
Phone: 
Email: