- 1
- A i korero mai a Ihowa ki a Mohi i muri iho i te matenga o nga tamariki tokorua a Arona, i te mea i whakahere nei raua ki te aroaro o Ihowa, a mate iho;
- 2
- A i korero a Ihowa ki a Mohi, Korero atu ki a Arona ki tou tuakana, kei haere i nga wa katoa ki roto ki te wahi tapu, ki roto i te arai, i tera i mua mai o te taupoki whakamarietanga, o te mea i runga i te aaka; kei mate: ka puta atu hoki ahau i roto i te kapua ki runga ki te taupoki whakamarietanga.
- 3
- Ko nga mea tenei hei haerenga ma Arona ki roto ki te wahi tapu: ko te kuao puru hei whakahere hara, me te hipi toa hei tahunga tinana.
- 4
- Me kakahu e ia te koti rinena tapu; hei tona kikokiko ano nga tarau rinena, me whitiki ano ki a ia te whitiki rinena, me potae ano hoki te potae rinena: he kakahu tapu enei; mo reira me horoi e ia tona kikokiko ki te wai, ka kakahu ai.
- 5
- Na, ka mau ia ki nga kuao koati e rua a te whakaminenga o nga tamariki a Iharaira hei whakahere hara, kia kotahi ano hoki te hipi toa hei tahunga tinana.
- 6
- A ka whakaherea atu e Arona tana puru mo te whakahere hara, te mea hoki mona, a ka mea whakamarietanga mona, mo tona whare hoki.
- 7
- Na, ka mau ia ki nga koati e rua, ka whakatu ki te aroaro o Ihowa ki te whatitoka o te tapenakara o te whakaminenga.
- 8
- Na ka makā he rota e Arona mo nga koati e rua, tetahi rota mo ta Ihowa, tetahi rota mo te koati haere noa.
- 9
- A ka kawea mai e Arona te koati i puta nei ta Ihowa rota ki a ia, a ka whakaherea hei whakahere hara.
- 10
- Ko te koati ia i puta nei te rota ki a ia, ko ia hei koati haere noa, ka whakaturia oratia ki te aroaro o Ihowa, kia meinga ai he whakamarietanga ki runga i a ia, kia tukua ai ki te koraha hei koati haere noa.
- 11
- A ka kawea mai ano e Arona te puru mo te whakahere hara, te mea mona ake, a ka mea whakamarietanga mona, mo tona whare hoki, a ka patua te puru mo te whakahere hara, te mea hoki mona ake:
- 12
- Na, ka mau ia ki te tahu-kakara, ki te mea e ki ana i nga waro ahi no runga i te aata i te aroaro o Ihowa; kia ki hoki ona ringa i te whakakakara reka, i te mea kua tukia kia ririki, ka kawe ai ki roto i te arai:
- 13
- Na, ka makā e ia te whakakakara ki runga ki te ahi ki te aroaro o Ihowa, kia ngaro ai i te kapua whakakakara te taupoki whakamarietanga i runga i te whakaaturanga; kei mate hoki ia:
- 14
- Na, ka tango ia i tetahi wahi o te toto o te puru, a ka tauhiuhia atu e tona maihao ki te taupoki whakamarietanga ki te taha ki te rawhiti: kia whitu hoki nga tauhiuhinga a tona maihao i te toto ki te taha ki mua o te taupoki whakamarietanga:
- 15
- Na, ka patua e ia te koati o te whakahere hara, te mea hoki mo te iwi, a ka kawea ona toto ki roto i te arai, a ka pera ano tana meatanga ki taua toto, me tana meatanga ki te toto o te puru, a ka tauhiuhia atu e ia ki runga ki te taupoki whakamarietanga, ki te taha ki mua hoki o te taupoki whakamarietanga.
- 16
- A ka mea whakamarietanga ia mo te wahi tapu, mo te poke o nga tamariki a Iharaira, mo a ratou mahi tutu i o ratou haranga katoatanga; kia pera hoki tana meatanga mo te tapenakara o te whakaminenga e tu ana i roto i a ratou i waenganui o to ratou poke.
- 17
- Kaua ano hoki he tangata mo roto i te tapenakara o te whakaminenga, ina haere ia ki roto ki te mea whakamarietanga ki te wahi tapu, a puta noa mai ia ki waho, kia oti ra ano te whakamarietanga mona, mo tona whare hoki, mo te whakaminenga katoa ano hoki o Iharaira.
- 18
- Na, ka haere atu ia ki te aata, ki tera i te aroaro o Ihowa, a ka mea whakamarietanga mo taua mea; ka tango hoki i tetahi wahi o te toto o te puru, o te toto hoki o te koati, ka pani atu ai ki nga haona o te aata, a, tawhio noa.
- 19
- Kia whitu hoki nga tauhiuhinga a tona maihao i te toto ki taua mea, a ka purea, ka whakatapua hoki, kia watea ai i te poke o nga tamariki a Iharaira.
- 20
- A ka oti tana whakamarietanga mo te wahi tapu, mo te tapenakara o te whakaminenga, me te aata, na, me kawe mai e ia te koati ora:
- 21
- Na, ka pokia iho nga ringa e rua o Arona ki runga ki te mātenga o te koati ora, ka whaki ai i nga kino katoa o nga tamariki a Iharaira ki runga i a ia, i a ratou mahi tutu katoa, me a ratou hara katoa; me uta hoki ki runga ki te mātenga o te koati, ka tuku ai kia kawea ki te koraha e tetahi tangata kua oti te whakarite:
- 22
- Na, ka mauria e te koati a ratou kino katoa i runga i a ia ki tetahi whenua mokemoke: a ka tukua atu te koati ki te koraha.
- 23
- Na, ka haere a Arona ki roto ki te tapenakara o te whakaminenga, a ka unuhia atu nga kakahu rinena i kakahuria e ia i tona haerenga ki roto ki te wahi tapu, ka waiho hoki ki reira:
- 24
- A me horoi ano e ia tona kikokiko ki te wai ki te wahi tapu, ka kakahu ai i ona kakahu, a ka puta mai ki waho, ka mea hoki i tana tahunga tinana, i te tahunga tinana hoki a te iwi, a ka mea whakamarietanga mona, mo te iwi hoki.
- 25
- Me tahu ano e ia te ngako o te whakahere hara ki runga ki te aata.
- 26
- Me te tangata hoki nana i tuku te koati hei koati haere noa, me horoi e ia ona kakahu, me horoi ano hoki tona kikokiko ki te wai, a, muri iho ka haere mai ki te puni.
- 27
- A ko te puru mo te whakahere hara, me te koati mo te whakahere hara, no raua nei nga toto i kawea ki roto ki te wahi tapu hei mea whakamarietanga, me mau atu ki waho o te puni; a ka tahuna ki te ahi o raua hiako, me o raua kikokiko, me to raua paru.
- 28
- A ko te tangata, nana i tahu, me horoi e ia ona kakahu, me horoi ano hoki tona kikokiko ki te wai, a, muri iho ka haere mai ki roto ki te puni.
- 29
- Hei tikanga pumau tonu iho ano hoki tenei ma koutou i te whitu o nga marama, i te tekau o nga ra o te marama, me whakapouri e koutou o koutou wairua, kaua rawa hoki tetahi mahi e mahia e koutou, e te tangata whenua, e te tangata iwi ke e noho ana i a koutou:
- 30
- Ko a taua rangi hoki te tohunga mea ai i te whakamarietanga mo koutou, hei pure i a koutou, kia ma ai i o koutou hara katoa i te aroaro o Ihowa.
- 31
- Hei hapati okiokinga taua ra ki a koutou, me whakapouri hoki e koutou o koutou wairua; hei tikanga pumau tonu iho tenei.
- 32
- Me mea whakamarietanga ano hoki te tohunga e whakawahia e ia, e whakatohungatia hoki e ia hei tohunga i muri iho i tona papa, me kakahu ano hoki nga kakahu rinena, nga kakahu tapu:
- 33
- A ka mea whakamarietanga ia mo te wahi tapu, me mea hoki he whakamarietanga mo te tapenakara o te whakaminenga, mo te aata hoki; me mea whakamarietanga ano hoki e ia mo nga tohunga, mo nga tangata katoa hoki o te whakaminenga.
- 34
- A hei tikanga pumau tonu iho tenei ki a koutou, kia meinga he whakamarietanga mo nga tamariki a Iharaira, mo o ratou hara katoa, kia kotahi meatanga i te tau. A rite tonu ki ta Ihowa i whakahau ai ta Mohi i mea ai.
Address: 
Phone: 
Email: