- 1
- A i korero ano a Ihowa ki a Mohi, i mea,
- 2
- Korero atu ki a Arona ratou ko ana tama, ko nga tamariki katoa a Iharaira, mea atu ki a ratou, Ko te mea tenei i whakahau ai a Ihowa, i mea ai,
- 3
- Ki te patua e tetahi tangata o te whare o Iharaira tetahi kau, tetahi reme, koati ranei, i roto i te puni, ki te patua ranei e ia ki waho o te puni,
- 4
- A e kore e kawea ki te whatitoka o te tapenakara o te whakaminenga, kia whakaherea he whakahere ki a Ihowa ki mua i te tapenakara o Ihowa; ka whakairia he toto ki taua tangata; kua whakaheke toto ia; a ka hatepea atu taua tangata i roto i tona iwi:
- 5
- He mea kia kawea mai ai e nga tamariki a Iharaira a ratou patunga e whakaherea ana e ratou i te mate o te parae, kia kawea mai ai hoki ki a Ihowa, ki te whatitoka o te tapenakara o te whakaminenga, ki te tohunga, ka whakahere ai hei whakamarietanga ki a Ihowa.
- 6
- A ka tauhiuhia atu te toto e te tohunga ki te aata a Ihowa, ki tera i te whatitoka o te tapenakara o te whakaminenga, me tahu ano hoki e ia te ngako hei kakara reka ki a Ihowa.
- 7
- A ka mutu a ratou patunga tapu ki nga rewera i whaia nei e ratou, puremu atu ai. Hei tikanga pumau tenei ki a ratou, tuku iho ki a ratou whakatupuranga.
- 8
- A me ki atu ano e koe ki a ratou, Ki te whakaherea e tetahi tangata o te whare o Iharaira, o nga tangata iwi ke ranei e noho ana i roto i a koutou, tetahi tahunga tinana, patunga tapu ranei,
- 9
- A e kore e kawea ki te whatitoka o te tapenakara o te whakaminenga, whakahere ai ki a Ihowa; ina, ka hatepea atu taua tangata i roto i tona iwi.
- 10
- Ki te kainga hoki tetahi toto e tetahi tangata o te whare o Iharaira, o nga tangata iwi ke ranei e noho ana i roto i a koutou; ka u atu toku mata ki taua wairua i kainga ai te toto, a ka hatepea atu e ahau i roto i tona iwi.
- 11
- Kei roto hoki i te toto te oranga o te kikokiko; a kua hoatu e ahau ki a koutou mo runga i te aata, hei whakamarietanga mo o koutou wairua: ko te toto hoki te mea hei mea whakamarietanga mo te wairua.
- 12
- Koia ahau i mea ai ki nga tamariki a Iharaira, Kaua tetahi o koutou e kai toto, kaua ano hoki tetahi tangata iwi ke e noho ana i roto i a koutou e kai toto.
- 13
- Ki te whai hoki tetahi tangata o nga tamariki a Iharaira, o nga tangata ke ranei e noho ana i a koutou, a ka mau tetahi kirehe, tetahi manu ranei e tika ana kia kainga; me riringi ano e ia ona toto, ka tanu ai ki te puehu.
- 14
- No te mea ko te oranga ia o nga kikokiko katoa; e rite ana hoki ona toto ki tona oranga: koia ahau i mea ai ki nga tamariki a Iharaira, Kaua rawa e kainga e koutou te toto o tetahi kikokiko: ko te toto hoki te oranga o nga kikokiko katoa: ki te kainga e tetahi ka hatepea atu.
- 15
- Ki te kainga hoki e tetahi wairua te mea i mate maori, te mea ranei i haea e te kirehe, ahakoa tangata whenua, tangata iwi ke ranei, me horoi e ia ona kakahu, me horoi ano hoki ia e ia ki te wai, ka poke hoki ia, a, ahiahi noa: katahi ka kore te poke.
- 16
- A ki te kahore e horoia e ia, ki te kahore hoki e horoia tona tinana, na, ka wahā ano e ia tana kino.
Address: 
Phone: 
Email: