- 1
- A i korero ano a Ihowa ki a Mohi, i mea,
- 2
- Korero atu ki nga tamariki a Iharaira, mea atu ki a ratou, Ko Ihowa ahau, ko to koutou Atua.
- 3
- Kei rite a koutou mahi ki nga mahi a te whenua o Ihipa, i noho na koutou: kei rite ano hoki a koutou mahi ki nga mahi a te whenua o Kanaana, e kawea atu nei koutou e ahau ki reira: kei haere hoki koutou i runga i a ratou tikanga.
- 4
- Me mahi e koutou aku whakariteritenga, kia mau hoki ki aku tikanga, me haere hoki i runga i aua mea; ko Ihowa ahau, ko to koutou Atua.
- 5
- Ina, kia mau ki aku tikanga me aku whakariteritenga: ki te mahia hoki ena e te tangata, ma reira e ora ai: ko Ihowa ahau.
- 6
- Kaua tetahi o koutou e whakatata ki tetahi o ona whanaunga tupu, hura ai kia takoto tahanga: ko Ihowa ahau.
- 7
- Kei hurahia e koe tou papa, tou whaea ranei, kia takoto tahanga: ko tou whaea ia; kei hurahia e koe kia takoto tahanga.
- 8
- Kei hurahia e koe kia takoto tahanga te wahine a tou papa: ko te wahi takoto tahanga ia o tou papa.
- 9
- Kei hurahia e koe kia takoto tahanga tou tuahine, te tamahine a tou papa, te tamahine ranei a tou whaea, ahakoa i whanau ki te kāinga, i whanau ranei ki tera atu wahi; kei hurahia raua e koe kia takoto tahanga.
- 10
- Kei hurahia e koe kia takoto tahanga te tamahine a to tama, te tamahine ranei a to tamahine, kei hurahia raua e koe kia takoto tahanga: nou hoki te wahi o raua i takoto tahanga na.
- 11
- Kei takoto tahanga i a koe te tamahine a te wahine a tou papa, te whanau a to papa, (he tuahine ia nou), kei hurahia ia e koe kia takoto tahanga.
- 12
- Kei hurahia te tuahine o tou papa kia takoto tahanga: he whanaunga tupu ia no tou papa.
- 13
- Kei hurahia e koe te tuakana teina ranei o tou whaea kia takoto tahanga: he whanaunga tupu hoki ia no tou whaea.
- 14
- Kei hurahia e koe kia takoto tahanga te teina, te tuakana ranei, o tou papa, kei whakatata koe ki tana wahine; ko to whaea keke ia.
- 15
- Kei hurahia e koe to hunaonga kia takoto tahanga: ko te wahine ia a to tama, kei hurahia ia e koe kia takoto tahanga.
- 16
- Kei hurahia e koe kia takoto tahanga te wahine a tou tuakana, teina ranei; no tou tuakana, teina ranei, taua wahi i takoto tahanga na.
- 17
- Kei hurahia e koe kia takoto tahanga te wahine raua ko tana tamahine, kaua ano hoki e tangohia te tamahine a tana tama, te tamahine ranei a tana tamahine, hura ai i a ia kia takoto tahanga; he whanaunga pu hoki ratou ki a ia: he mea kino tena.
- 18
- Kaua ano hoki e tangohia mai te tuakana, te teina ranei, o tau wahine, hei whakatetetete ki a ia, kaua ia e hurahia kia takoto tahanga, me te ora ano hoki tera.
- 19
- Kaua ano hoki e whakatata atu ki te wahine ki te hura i a ia kia takoto tahanga, i te mea kei tahaki ia mo tona poke.
- 20
- Kaua ano hoki e takoto puremu ki te wahine a tou hoa, whakapoke ai i a koe ki a ia.
- 21
- Kaua ano e tukua tetahi o ou uri kia haere na waenga i te ahi hei mea ki a Moreke, kaua ano hoki e whakanoatia te ingoa o tou Atua: ko Ihowa ahau.
- 22
- Kei rite ki te moe ki te wahine tau moe ki te tane: he mea whakarihariha tena.
- 23
- Kaua ano hoki koe e takoto ki tetahi kararehe, whakapoke ai i a koe ki taua mea: kaua hoki tetahi wahine e tu ki te aroaro o tetahi kararehe, takoto tahi ai raua: he mea anuanu tena.
- 24
- Kei poke koutou i tetahi o enei mea: e poke ana hoki i enei mea katoa nga iwi ka peia nei e ahau i to koutou aroaro:
- 25
- Kua poke ano hoki te whenua: koia ahau i mea ai kia tau iho tona kino ki runga ki a ia; a e ruaki mai ana te whenua i ona tangata.
- 26
- Mo reira kia mau koutou ki aku tikanga me aku whakaritenga whakawa; kaua ano hoki e mahia tetahi o enei mea whakarihariha e tetahi tangata whenua, e te tangata iwi ke ranei e noho ana i a koutou:
- 27
- (No te mea kua mahia enei mea whakarihariha katoa e nga tangata whenua o mua i a koutou, a poke iho te whenua;)
- 28
- Kei ruakina mai ano hoki koutou e te whenua, ina poke i a koutou, me nga iwi e ruakina atu nei i to koutou aroaro.
- 29
- No te mea hoki, ki te mahia tetahi o enei mea whakarihariha e tetahi tangata, ina, ka hatepea atu aua tangata i pena i roto i to ratou iwi.
- 30
- Engari kia mau ki aku i whakamahara atu ai, kei mahia e koutou tetahi o enei ritenga whakarihariha i mahia nei i mua i a koutou, kei poke hoki koutou i aua mea: ko Ihowa ahau ko to koutou Atua.
Address: 
Phone: 
Email: