- 1
- A i mea ano ia ki ana akonga, No mua tetahi tangata taonga, he tuari taonga tona; a ka korerotia ia ki a ia, e maumauria ana e ia ana mea.
- 2
- Na, ka karangatia ia, a ka mea ki a ia, He aha tenei e rangona nei e ahau mou? korerotia mai te tikanga o nga mea i tuaritia e koe; e kore hoki e ahei kia waiho koe hei tuari.
- 3
- Na, ko te meatanga a taua tuari i roto i a ia, Me aha ahau? e tangohia ana hoki i a au te tuaritanga e toku ariki: e kore ahau e kaha ki te keri; e whakama ana ahau ki te tono mea maku.
- 4
- E mohio ana ahau ki taku e mea ai, mo toku peinga rawatanga atu i te tuaritanga, ka ai o ratou whare hei tukunga atu moku.
- 5
- Na, ka karangatia e ia tenei tangata tenei tangata o te hunga i a ratou nei etahi mea a tona ariki, a ka mea ki te tuatahi, E hia nga mea a toku ariki i a koe?
- 6
- Na, ka mea mai tera, Kotahi rau nga mehua hinu. Na, ko tana meatanga atu ki a ia, Tangohia to pukapuka, hohoro te noho, tuhituhia e rima tekau.
- 7
- Katahi ia ka mea ki tetahi, E hia hoki i a koe? Ka mea ia, Kotahi rau nga mehua witi. Na, ka mea ia ki a ia, Tangohia to pukapuka, tuhituhia e waru tekau.
- 8
- A ka whakamoemititia te tuari kino e te ariki, mona i whai whakaaro: engari hoki nga tamariki o tenei ao, i to ratou whakapaparanga, e nui ana te whakaaro i to nga tamariki o te mārama.
- 9
- Na, ko taku kupu tenei ki a koutou, Waiho te taonga kino hei mea i etahi hoa aroha mo koutou; mo te hē rawa iho o koutou, ka ai he tukunga atu mo koutou ki nga whare ora tonu.
- 10
- Ko ia e pono ana i te mea nohinohi rawa, e pono ano i te mea nui: a ko ia e kore e tika i te mea nohinohi rawa, e kore e tika i te mea nui.
- 11
- Na, ki te kahore i pono to koutou mahi ki te taonga hē, ma wai e tuku ki a koutou te taonga pono?
- 12
- A ki te kahore koutou i pono i to te tangata ke, ma wai e hoatu he mea ma koutou ake ki a koutou?
- 13
- E kore e ahei i tetahi tangata te mahi ki nga rangatira tokorua: ka kino hoki ki tetahi, ka aroha ki tetahi; ka u ranei ki tetahi, a ka whakahawea ki tetahi. E kore e ahei i a koutou te mahi ki te Atua ki te taonga ano hoki.
- 14
- A i rongo ano nga Parihi ki enei mea katoa, he hunga apoapo moni hoki ratou: a ka whakahi ki a ia.
- 15
- Na, ko tana meatanga mai ki a ratou, Ko koutou te hunga e whakatikatika ana i a koutou ano i te aroaro o nga tāngata; ko te Atua ia e mātau ana ki o koutou ngakau: ko te mea nui hoki ki nga tāngata hei mea whakarihariha ki te aroaro o te Atua.
- 16
- I tutuki atu te ture me nga poropiti ki a Hoani: no reira ake i kauwhautia ai te rangatiratanga o te Atua, a taruke ana nga tāngata katoa ki roto.
- 17
- Erangi te pahemotanga o te rangi o te whenua e takoto noa ana, e kore ia tetahi tohu o te ture e taka.
- 18
- Ki te whakarere tetahi i tana wahine, a ka marena i tetahi atu, e puremu ana ia: a ki te marena tetahi i te wahine kua whakarerea e te tangata, e puremu ana ia.
- 19
- I mua tetahi tangata taonga, he kakahu papura ona, he rinena, i kai ano i nga kai papai i nga ra katoa:
- 20
- Na, ko tetahi tangata rawa-kore ko Raharuhi te ingoa, ka whakatakotoria ki tona kuwaha, he tuwhenua,
- 21
- A e hiahia ana kia whangainga ki nga kongakonga e ngahoro iho ana i te tepara a te tangata taonga: i haere mai ano hoki nga kuri, a mitimiti ana i ona mate.
- 22
- Nawaia, ka mate te tangata rawa-kore, a kawea ana e nga anahera ki te uma o Aperahama: i mate ano hoki te tangata taonga, a tanumia ana;
- 23
- A tana tirohanga ake i te reinga, i a ia e whakamamaetia ana, ka kite i a Aperahama i tawhiti, me Raharuhi i tona uma.
- 24
- Na, ka karanga ia, ka mea, E pa, e Aperahama, kia aroha ki a au, tonoa mai hoki a Raharuhi ki te tou i te pito o tana matihao ki te wai, hei whakamatao i toku arero; e mamae ana hoki ahau i tenei muramura.
- 25
- Na, ka mea a Aperahama, E tama, kia mahara kua riro i a koe āu mea papai i tou oranga, i kino hoki nga mea i a Raharuhi: na, ka whakamarietia nei ia, a e whakamamaetia ana koe.
- 26
- A haunga ano enei mea katoa, kua oti te whakapumau tetahi tawha nui ki te takiwa o koutou o matou: a ki te mea etahi ki te whakawhiti atu i konei ki a koutou, e kore e ahei; e kore ano hoki e whiti mai i kona ki a matou.
- 27
- Ano ra ko tera, Koia ahau ka mea nei ki a koe, e pa, kia tonoa ia ki te whare o toku pāpā:
- 28
- Tokorima hoki oku teina; kia korero ai ia ki a ratou, kei haere mai hoki ratou ki tenei wahi mamae.
- 29
- Ka mea mai a Aperahama ki a ia, Kei a ratou a Mohi ratou ko nga poropiti; me whakarongo ki a ratou.
- 30
- Ka mea atu ia, Kahore, e pa, e Aperahama: engari ki te haere tetahi ki a ratou o te hunga mate, ka ripeneta ratou.
- 31
- Na, ka mea mai tera ki a ia, Ki te kore ratou e whakarongo ki a Mohi, ki nga poropiti, e kore ano hoki e whakaae, ahakoa ara atu te tangata i te hunga mate.
Address: 
Phone: 
Email: