- 1
- Na, ka mea ia ki nga akonga, E kore e taea te whakakahore te putanga mai o nga take hē: otiia aue te mate mo te tangata e puta mai ai!
- 2
- E nui te pai ki a ia ki te whakawerewerea ki tona kakī te kohatu mira kaihe, kia makā hoki ia ki te moana, a kia kaua ia e whakahe i tetahi o enei mea nohinohi.
- 3
- Kia tupato ki a koutou: Ki te hara kia koe tou teina, riria; a ki te ripeneta, murua tāna.
- 4
- A ki te whitu nga haranga ki a koe i te ra tahi, a ka whitu ona hokinga ki a koe i te ra tahi, a ka mea, E ripeneta ana ahau; murua tāna.
- 5
- A ka mea nga apotoro ki te Ariki, Whakanuia to matou whakapono.
- 6
- Na, ka mea te Ariki, Ki te mea he whakapono to koutou, me te pua nani te rahi, ka mea atu koutou ki tenei hikamaina, Kia ranga atu koe, kia whakatokia ki te moana; na, ka rongo kia koutou.
- 7
- Na, ko wai o koutou he pononga tana e parau ana, e tiaki ana ranei i nga hipi, a, tona hokinga mai i te māra, ka mea tonu atu ki a ia, Haere ake, e noho ki te kai?
- 8
- A e kore e mea ki a ia, Takā he hapa maku, ka whitiki ai i a koe, ka tuari mai ki a au, kia kai ahau kia inu; a ka mutu enei mea, ka kai hoki koe, ka inu?
- 9
- E whakawhetai oti ia ki taua pononga, mona i mea i nga mea i whakahaua ai ia? E mea ana ahau, Kahore.
- 10
- Whaihoki ko koutou, ka oti nga mea, katoa i whakahaua ai koutou, me kī atu, He pononga kino matou: ko ta matou i mea ai, ko te mea kua takoto nei te tikanga kia mahia e matou.
- 11
- A i a ia e haere ana ki Hiruharama, ka haere ia ra waenganui o Hamaria, o Kariri.
- 12
- A, i a ia e tomo ana ki tetahi kāinga koraha, kotahi tekau nga tāngata i tutaki ki a ia, he repera, na, ka tu mai ratou i tawhiti:
- 13
- A ka karanga, ka mea, E kara, e Ihu, kia aroha ki a matou.
- 14
- A, tona kitenga atu, ka mea ki a ratou, Haere, kia kite nga tohunga i a koutou. A i a ratou e haere ana, na, kua ma.
- 15
- A, te kitenga o tetahi o ratou, kua ora ia, ka hoki mai, a he rahi tona reo ki te whakakororia i te Atua,
- 16
- A takoto tapapa ana ia ki ona waewae, ka whakawhetai atu ki a ia: a no Hamaria ia.
- 17
- A ka oho mai a Ihu, ka mea Kihai ranei te tekau i whakaorangia? a kei hea nga tokoiwa?
- 18
- Heoi ano nga mea i kitea e hoki mai ana ki te homai i te kororia ki te Atua, ko tenei tangata iwi ke.
- 19
- Na, ka mea ki a ia, Whakatika, haere: na to whakapono koe i ora ai.
- 20
- A ka uia ia e nga Parihi, ko ahea puta mai ai te rangatiratanga o te Atua, na, ka whakahokia atu e ia ki a ratou, ka mea, E kore e kitea te putanga mai o te rangatiratanga o te Atua:
- 21
- E kore ratou e mea, Na, tenei! na, tera! kei roto hoki i a koutou te rangatiratanga o te Atua.
- 22
- A i mea ano ia ki nga akonga, Tera e tae mai nga ra e hiahia ai koutou kia kite i tetahi o nga ra o te Tama a te tangata, a e kore e kite.
- 23
- A e mea ratou ki a koutou, Na, tenei; na, tera: kaua e haere atu, kaua e aru atu.
- 24
- Ka rite hoki ki te uira e hiko mai ana i tetahi wahi i raro o te rangi; a tiaho atu ana ki tetahi wahi i raro o te rangi; e pera ano hoki te Tama a te tangata i tona ra.
- 25
- Otiia ko te tikanga tenei kia maha nga mamae mona ki mua, kia whakakinoa ano hoki e tenei whakapaparanga.
- 26
- Ka rite hoki ki nga ra i a Noa nga ra o te Tama a te tangata.
- 27
- E kai ana ratou, e inu ana, e marena ana, e tukua ana ki te marena, taea noatia te ra i tomo ai a Noa ki roto ki te aka, a, te putanga o te waipuke, na, ngaro katoa.
- 28
- Ka rite ano hoki ki nga ra i Rota; e kai ana ratou, e inu ana, e hoko mai ana, e hoko atu ana, e whakato ana, e hanga whare ana;
- 29
- A, te ra i puta ai a Rota i Horoma, ka uaina he kapura he whanariki i te rangi, na, ngaro katoa.
- 30
- Ka pera ano i te ra e whakakitea mai ai te Tama a te tangata.
- 31
- I taua ra, kei runga tetahi i te whare, me ona taonga hoki i roto i te whare, kaua ia e heke iho ki te tiki i aua mea: te tangata hoki i te māra, kaua hoki ia e hoki atu ki nga mea o muri.
- 32
- Kia mahara ki te wahine a Rota.
- 33
- Ki te whai tetahi kia ora ia, ka mate ano ia; a ki te mate tetahi, ka ora ano ia.
- 34
- Ko taku kupu tenei kia koutou, I taua po tokorua i te moenga kotahi; kotahi e tangohia, kotahi e waiho.
- 35
- Tokorua nga wāhine e huri ana; kotahi e tangohia, kotahi e waiho.
- 36
- Tokorua nga tāngata i te māra; kotahi e tangohia, kotahi e waiho.
- 37
- Na, ka whakahokia atu e ratou, ka mea ki a ia, Ko hea, e te Ariki? Ka mea mai ia ki a ratou, Ko te wahi i te tupapaku, ko reira huihui ai nga ekara.
Address: 
Phone: 
Email: