- 1
- A tana tirohanga ake, ka kite i te hunga taonga, e maka ana i a ratou moni hoatu noa ki te takotoranga moni.
- 2
- A ka kite ano hoki ia i tetahi pouaru rawa-kore, e maka ana i nga moni nohinohi rawa e rua ki reira.
- 3
- Na, ka mea ia, He pono taku e mea atu nei ki a koutou, nui ke ta tenei pouaru rawa-kore i maka ai i ā ratou katoa:
- 4
- Ko ratou katoa hoki, e hira nei o ratou, a māka ana ko tetahi wahi ki roto ki nga mea ma te Atua: ko tenei ia he rawa-kore, a makā ana e ia tona oranga katoa.
- 5
- A i etahi e korero ana ki te temepara, ka oti nei te whakapaipai ki nga kohatu papai ki nga whakahere, ka, mea ia,
- 6
- Na, enei mea e kite nei koutou, tera e tae mai nga ra e kore ai e toe tetahi kohatu i runga i tetahi kohatu, engari ka whakahoroa.
- 7
- Na, ka ui ratou ki a ia, ka mea, E te Kai whakaako, ko ahea enei mea? a he aha te tohu ina tata enei mea te puta?
- 8
- A ka mea ia, Kia mahara kei mamingatia koutou: he tokomaha hoki e haere mai i runga i toku ingoa, e mea, Ko ahau ia; a kua tata te taima: na, kei haere koutou i muri i a ratou.
- 9
- Na, ka rongo koutou ki nga taua ki nga whakaoho, kaua e mataku: kua takoto hoki te tikanga mo enei mea kia mātua puta mai; taihoa ia te whakamutunga.
- 10
- Katahi ia ka mea ki a ratou, Ka whakatika tetahi iwi ki tetahi iwi, tetahi rangatiratanga ki tetahi rangatiratanga;
- 11
- A e nui nga ru i te tini o nga wahi, me nga wa o te mate kai, me nga mate uruta; me nga mataku hoki, me nga tohu nui o te rangi.
- 12
- A ko mua ake i anei mea katoa pa ai o ratou ringaringa ki a koutou, tukino ai i a koutou, tuku ai ki nga whare whakawa, ki nga whare herehere, he mea arahi ki nga kingi ki nga kawana, mo toku ingoa.
- 13
- A ka waiho ki a koutou hei tohu whakaatu.
- 14
- Na, kia tūturu o koutou ngakau, kia kaua e whakaaroa wawetia ta koutou kupu e whakahoki atu ai:
- 15
- Maku hoki e hoatu ki a koutou he mangai he matauranga, e kore e taea te whakakahore, te pehi, e o koutou hoa whawhai katoa.
- 16
- A ka tukua atu koutou e nga mātua, e nga teina, e nga whanaunga, e nga hoa; ka whakamatea ano hoki etahi o koutou.
- 17
- Ka kino ano hoki nga tāngata katoa ki a koutou, he whakaaro ki toku ingoa.
- 18
- Otiia e kore e ngaro tetahi makawe o o koutou upoko.
- 19
- Ma te manawanui e mau ai o koutou wairua.
- 20
- Otira ka kite koutou i Hiruharama e karapotia ana e nga taua, ko reira koutou mohio ai, kua tata tona whakangaromanga.
- 21
- Hei reira kia oma te hunga i Huria ki nga maunga; me te hunga i waenganui o reira kia haere atu; kei haere hoki ki reira te hunga i nga tuawhenua.
- 22
- Ko nga ra hoki enei o te rapunga utu, e rite ai nga mea katoa kua oti te tuhituhi.
- 23
- Otira aue te mate o te hunga e hapū ana, o nga mea e whangai ana ki te u, i aua ra! e nui hoki te aitua ki te whenua, me te riri ki tenei iwi.
- 24
- A ka hinga ratou i te mata o te hoari, ka riro pārau ki nga iwi katoa: a ka takahia ano hoki Hiruharama e nga tauiwi, kia rite ra ano nga wa o nga tauiwi.
- 25
- Na, ka whai tohu te ra, te marama, me nga whetu; a i runga i te whenua he pawera no nga tauiwi, he tumatatenga; me te haruru ano te moana, te ngaru;
- 26
- Ka hemo ano nga tāngata i te mataku, i te tāringa atu ki nga mea e puta mai ana ki te ao: e ngaueue hoki nga mea kaha o nga rangi.
- 27
- Ko reira ano hoki ratou kite ai i te Tama a te tangata e haere mai ana i runga i te kapua, me te kaha ano me te kororia nui.
- 28
- Ano ka timata anei mea to puta, titiro ake, kia ara hoki o koutou mātenga; ka tata hoki to koutou whakaoranga.
- 29
- Na, ka korerotia e ia tetahi kupu whakarite ki a ratou; Titiro koutou ki te piki, me nga rakau katoa;
- 30
- I te mea e pihi ake ana, na, ka kite koutou, ka, mātau noa ake kua tata te raumati.
- 31
- Whaihoki, ko koutou, ina kite i enei mea e puta mai ana, ka mātau kua tata te rangatiratanga o te Atua.
- 32
- He pono taku e mea atu nei ki a koutou, E kore rawa e pahemo tenei whakatupuranga, kia puta enei mea katoa.
- 33
- E pahemo te rangi me te whenua, ko aku kupu ia e kore e pahemo.
- 34
- Otira kia tupato ki a koutou ano, kei taimaha o koutou ngakau i te kakai, i te haurangi, i nga raruraru o te ao, a ka puta whakarere mai taua ra ki a koutou.
- 35
- Ka puta mai hoki, ano he reti, ki nga tāngata katoa e noho ana i te mata o te whenua katoa.
- 36
- Mo konei ra kia mataara, kia inoi tonu, kia paingia ai koutou, kia whakaorangia i enei mea katoa meake nei puta, a kia tu i te aroaro o te Tama a te tangata.
- 37
- A i whakaako ia i te temepara i te awatea; na, i te po ka haere, ka noho ki te maunga i karangatia nei ko to nga Oriwa.
- 38
- A i haere katoa mai te iwi ki a ia i te atatu ki te temepara, ki te whakarongo ki a ia.
Address: 
Phone: 
Email: