- 1
- Na, kua tata te hakari taro rewena-kore, e karangatia nei ko te Kapenga.
- 2
- A ka rapu nga tohunga nui me nga Karaipi ki te pehea e whakamate ai ratou i a ia: i mataku hoki ratou i te iwi.
- 3
- Na, ka tapoko a Hatana kia Hura, ko tona ingoa nei ko Ikariote, ko ia nei tetahi o te tekau ma rua.
- 4
- A ka haere ia, ka korero ki nga tohunga nui me nga rangatira hoia, ki te pehea e tukua ai ia ki a ratou.
- 5
- A ka hari ratou, ka whakaae ano hoki kia hoatu he moni ki a ia.
- 6
- Na, ka whakaae ia, a ka rapu i te wa pai e tukua ai ia ki a ratou, i te mea kahore he huihuinga tangata.
- 7
- Na, ka tae mai te ra o te taro rewena-kore, i tika nei kia patua te Kapenga.
- 8
- Ka tonoa e ia a Pita raua ko Hoani, ka mea, Tikina, takā te Kapenga ma tatou, kia kai ai tatou.
- 9
- Na, ka mea raua ki a ia, Ko hea koe pai ai kia takā e maua?
- 10
- A ka mea ia ki a raua, Na, ka tomo korua ki te pa, ka tutaki he tangata ki a korua e mau ana i te kahaka wai; e aru korua i a ia ki te whare e tomo ai ia.
- 11
- Ka mea atu ki te tangata i te whare, E mea ana te Kai whakaako ki a koe, Kei hea te ruma e kai ai matou ko aku akonga i te Kapenga?
- 12
- A ka whakaaturia e ia ki a korua, he ruma nui i runga, oti rawa te whariki: me taka e korua ki reira.
- 13
- Na, haere ana, a rokohanga atu rite tonu ki tana i korero ai ki a raua: a takā ana e raua to Kapenga.
- 14
- A ka rite te haora, ka noho ia, ratou ko nga apotoro kotahi tekau ma rua.
- 15
- Na, ka mea ia ki a ratou, Nui atu toku hiahia kia kai tahi tatou i tenei Kapenga, i te mea kahore ano ahau i mate noa:
- 16
- Ko taku kupu hoki tenei ki a koutou, E kore ahau e kai i tenei a muri ake nei, kia tino rite ra ano i te rangatiratanga o te Atua.
- 17
- Na, ka mau ia ki te kapa, ka mutu te whakawhetai, ka mea ia, Tangohia tenei, tuwhaina ma koutou:
- 18
- Ko taku kupu hoki tenei ki a koutou, E kore ahau e inu i te hua o te waina, kia tae mai ra ano te rangatiratanga o te Atua.
- 19
- Na, ka mau ia ki te taro, ka mutu te whakawhetai, ka whawhati, na, ka hoatu e ia ki a ratou, a ka mea, Ko toku tinana tenei e hoatu ana mo koutou: meinga tenei hei whakamaharatanga ki a au.
- 20
- I peneitia ano hoki te kapa, i muri iho i te hapa, i mea ia, Ko tenei kapa te kawenata hou i runga i oku toto e ringihia ana mo koutou.
- 21
- Otira, tenei kei ahau nei, kei te tepara, te ringaringa o te kai tuku i a au.
- 22
- Na, e haere ana te Tama a te tangata, e pera ana me te mea i whakaritea: otira aue te mate mo te tangata e tukua ai ia!
- 23
- Na, ka anga ratou ka rapu ki a ratou ano, ma wai o ratou tenei e mea.
- 24
- A he tautotohe ano ta ratou, ko wai o ratou e meinga te tangata nui.
- 25
- Na, ka, mea ia ki a ratou, Ko nga kingi o nga tauiwi hei whakatupu rangatira ki a ratou; a e huaina ana o ratou kai akiaki, He hunga atawhai.
- 26
- Otiia kaua koutou e pera: engari kia rite ki to muri rawa te mea nui o koutou: kia rite ano hoki te tino tangata ki te kai mahi.
- 27
- Ko wai hoki te mea nui, ko ia e noho ana ki te kai, ko te kai mahi ranei? ehara ranei te tangata e noho ana ki te kai? tenei raia ahau i roto i a koutou te rite nei ki te kai mahi.
- 28
- Na, ko koutou te hunga i noho tahi tatou i oku whakamatautauranga.
- 29
- A ka whakarite ahau i te rangatiratanga mo koutou, ka pera ano me taku Matua i whakarite mai moku;
- 30
- Kia kai ai kia inu ai koutou ki taku tepara i toku rangatiratanga, kia noho ai ano hoki ki runga ki nga torona, whakawa ai i nga iwi kotahi tekau ma rua o Iharaira.
- 31
- Na, ka mea te Ariki, E Haimona, e Haimona, na, kua inoia koutou e Hatana kia tātaria, ano he witi:
- 32
- Otiia kua inoi ahau mou, kei hemo tou whakapono: a ka tahuri mai koe, whakakahangia ou teina.
- 33
- Na, ka mea tera ki a ia, E te Ariki, e pai ana ahau kia haere hei hoa mou ki te whare herehere, ki te mate ano hoki.
- 34
- Ano ra ko ia, Tenei taku kupu ki a koe, e Pita, e kore te tikaokao e tangi aianei ka toru au whakakahoretanga i tou matauranga ki a au.
- 35
- I mea ano ia ki a ratou, I taku tononga i a koutou, a kahore a koutou pēke moni, kahore he putea, kahore he hu, i kore ranei tetahi mea ma koutou? Ka mea ratou, Kahore.
- 36
- Ano ra ko ia ki a ratou, Tena ko tenei ki te mea he pēke moni to tetahi, mauria atu, me te putea ano hoki: me ia hoki kahore ana hoari, kia hokona tona kakahu, ka hoko ai i tetahi.
- 37
- Ko taku kupu hoki tenei ki a koutou, Ko te tikanga tenei, kia rite ano hoki i a au te mea kua oti nei te tuhituhi, ara, Kua huihuia ia ki te hunga hara: he tutukitanga hoki to nga mea moku.
- 38
- Na, ka mea ratou, E te Ariki, na, e rua enei hoari. A ka mea ia ki a ratou, Kāti ano.
- 39
- Na, ka puta atu ia, ka haere ki maunga Oriwa, ko tana hanga hoki; me te aru ano ana akonga i a ia.
- 40
- A, te taenga ki taua wahi, ka mea ia ki a ratou, Me inoi kei uru koutou ki te whakamatautauranga.
- 41
- Na, ka mawehe atu ia i a ratou kei to te taunga kamaka te mataratanga, a ka tukua ona turi, ka inoi,
- 42
- Ka mea, E Pa, ki te pai koe, tangohia atu tenei kapa i a au: otira kauaka e waiho i taku e pai ai, engari i tāu.
- 43
- Na, ka puta mai ki a ia tetahi anahera i te rangi, e whakakaha ana i a ia.
- 44
- A, uaua tonu tana inoi, me te mea e oke ana: a ko tona kakawa, ano he tepe toto e turuturu iho ana ki te whenua.
- 45
- Na, ka ara ia i te inoi, a, te taenga atu ki ana akonga, rokohanga atu e moe ana ratou, he ngakau pouri hoki.
- 46
- Na, ko tana meatanga mai ki a ratou, He aha koutou ka moe ai? Whakatika ki te inoi, kei uru koutou ki te whakamatautauranga.
- 47
- A, i a ia e korero ana, na, ko te huihuinga tangata, me tera hoki i karangatia nei ko Hura, ko ia hoki tetahi o te tekau ma rua, e haere ana i mua i a ratou, na, ka whakatata mai ia ki a Ihu ki te kihi i a ia.
- 48
- Ano ra ko Ihu ki a ia, E Hura, he kihi tāu hei tuku mo te Tama a te tangata?
- 49
- A, te kitenga o ona hoa i nga mea meake meatia, ka mea ratou ki a ia, E te Ariki, me patu ranei matou ki te hoari?
- 50
- Na, hāua iho e tetahi o ratou te pononga o te tohunga nui, a tapahia ana tona taringa matau.
- 51
- Na, ka oho mai a Ihu, ka mea, Kāti ra i tenei. A whakapakia ana tona taringa, na, kua ora ia.
- 52
- Katahi ka mea a Ihu ki nga tohunga nui, ki nga rangatira o te temepara, ki nga kaumatua, i haere atu ki a ia, He tahae ahau i haere mai ai koutou me nga hoari me nga patu?
- 53
- I a au e noho ana i a koutou i te temepara ia ra ia ra, kihai i totoro mai o koutou ringa ki a au: otira no koutou tenei haora, ko te kahanga ano hoki o te pouri.
- 54
- Na, ka hopu ratou i a ia, ka arahi atu, a kawea ana ia e ratou ki roto ki te whare o te tino tohunga. Ko Pita ia i aru mai i tawhiti.
- 55
- Ano ka oti i a ratou he kapura te tahu ki waenga marae, i a ratou e noho tahi ana, ka noho hoki a Pita i waenganui o ratou.
- 56
- Na, ka kitea ia e tetahi kotiro, i a ia e noho ana i te kapura; a matatau tonu mai te titiro ki a ia, ka mea, I a ia ano hoki tenei.
- 57
- Na, ka whakakahore ia ki a ia, ka mea, E ko, kahore ahau a mohio ki a ia.
- 58
- A taro kau iho ka kite tetahi atu i a ia, ka mea, No ratou hoki koe. Na, ka mea a Pita, E mara, kahore.
- 59
- A, me te mea kotahi te haora ki te takiwa, ka tohe ano tetahi atu, ka mea, He pono ra hoki i a ia ano hoki tenei: no Kariri hoki.
- 60
- A ka mea a Pita, E mara, a kore ahau e mātau ki tau a mea. A i reira pu ano, i a ia e korero ana, ka tangi te tikaokao.
- 61
- Na, ka tahuri te Ariki, ka titiro ki a Pita. A ka mahara a Pita ki te kupu a te Ariki, ki tana meatanga ki a ia, E kore e tangi te tikaokao ka toru āu whakakahoretanga ki a au.
- 62
- Na, haere atu ana a Pita ki waho, a nui atu tana tangi.
- 63
- Na, ka taunu nga kai pupuri o Ihu ki a ia, ka whiu.
- 64
- A ka hipokina ia, ka pahiatia tona kanohi, ka ui atu ratou ki a ia, ka mea, Poropiti mai, na wai koe i papaki?
- 65
- A he maha era atu kupu kino i korero ai ratou ki a ia.
- 66
- Ano ka ao te ra, ka huihui nga kaumatua o te iwi, nga tohunga nui, me nga Karaipi, a arahina atu ana ia ki to ratou runanga, ka mea ratou,
- 67
- Ko te Karaiti ranei koe? meinga mai ki a matou. Ano ra ko ia ki a ratou, Ki te korerotia atu e ahau ki a koutou, e kore koutou e whakapono;
- 68
- A ki te ui atu ahau, e kore koutou e whakahoki kupu mai ki a au, a kore ano hoki e tuku i a au kia haere.
- 69
- Tenei ake ka noho to Tama a te tangata ki matau o te kaha o te Atua.
- 70
- Na, ka mea ratou katoa, Ko koe ranei te Tama a te Atua? Ano ra ko ia ki a ratou, Kua korerotia mai na e koutou ko ahau ia.
- 71
- Na, ka mea ratou, Hei aha ake he kai whakaatu ma tatou? kua rongo nei hoki tatou ake i ta tona mangai.
Address: 
Phone: 
Email: