- 1
- A mea kau ake te ata ka runanga nga tohunga nui, nga kaumatua, nga Karaipi, me te runanga katoa, a ka oti a Ihu te here, ka arahina atu, a tukua atu ana ki a Pirato.
- 2
- A ka ui atu a Pirato ki a ia, Ko koe ranei te Kingi o nga Hurai? A ka whakahokia mai e ia, ka mea ki a ia, Kua korerotia mai na e koe.
- 3
- A he maha nga mea i whakawakia ai ia e nga tohunga nui.
- 4
- Ka ui atu ano a Pirato ki a ia, ka mea, Kahore āu kupu hei whakahokinga mai? na, te tini o nga kupu e korero nei ratou mou.
- 5
- Heoi kahore ā Ihu kupu; no ka miharo a Pirato.
- 6
- Na, kotahi te herehere e tukua ana ki a ratou i taua hakari, ta ratou e inoi ai.
- 7
- Na, i reira tetahi tangata ko Parapa te ingoa, e here tahi ana me ona hoa tutū, he hunga i patu tangata i te ngangaretanga.
- 8
- Na, ka karanga te mano, ka anga ka tono kia meatia e ia tana i mea ai ki a ratou i mua.
- 9
- Na, ka whakahokia mai e Pirato ki a ratou, ka mea, E pai ana ranei koutou kia tukua e ahau ki a koutou te Kingi o nga Hurai?
- 10
- I mahara hoki ia he hae i tukua ai ia e nga tohunga nui.
- 11
- Na, ka whakahihiri nga tohunga nui i te mano, engari ko Parapa kia tukua ki a ratou.
- 12
- A ka whakahokia mai ano e Pirato, ka mea ki a ratou, He aha oti ta koutou e pai ai kia meatia e ahau ki tenei, e meinga nei e koutou ko te Kingi o nga Hurai?
- 13
- Ka karanga ano ratou, Ripekatia.
- 14
- Na, ka kī mai a Pirato ki a ratou, He aha koia tana kino i mea ai? Heoi nui noa atu ta ratou hamama, Ripekatia ia.
- 15
- Na, ka mea a Pirato kia whakamanawarekatia te mano, a tukua ana e ia a Parapa ki a ratou, a ka oti a Ihu te whiu, ka tukua atu kia ripekatia.
- 16
- Na, ka arahina ia e nga hoia ki te marae, ara, ki te whare whakawa, a karangarangatia ana te hapu katoa.
- 17
- A ka whakakakahuria ia ki te kakahu papura, a ka oti tetahi karauna tataramoa te whiri, ka potaea, ki a ia.
- 18
- Na, ka anga ratou ka oha atu ki a ia, Tena koe, e te Kingi o nga Hurai!
- 19
- A patua ana e ratou tona mātenga ki te kakaho, tuwha ana ki a ia, a ka tukua nga turi ki a ia, ka koropiko ki a ia.
- 20
- Ano ka mutu to ratou taunu ki a ia, ka tangohia te kahu papura, a whakakakahuria ana ia ki ona ake kakahu, a arahina ana ia kia ripekatia.
- 21
- Na, ka meinga e ratou tetahi tangata e tika ana na reira, a Haimona no Hairini, kia amo i ton, ripeka; i haere mai ia i nga whenua, ko te pāpā o Arehanera raua ko Rupuha.
- 22
- Na, ka arahina ia ki tetahi wahi ki Korokota, tona tikanga ina whakamaoritia, Ko te wahi angaanga.
- 23
- A hoatu ana ki a ia he waina, he mea whakananu ki te maira, kia inumia: otira kihai i tangohia e ia.
- 24
- Na, ka oti ia te ripeka, ka wehewehea ona kakahu, he mea maka ki te rota, kia kitea ai ko te aha e riro i tetahi i tetahi.
- 25
- Na, ko te toru ia o nga haora, a ka ripeka ratou i a ia.
- 26
- I tuhituhia ano hoki ki runga te mea i whakawakia ai ia, KO TE KINGI O NGA HURAI.
- 27
- A tokorua nga tahae i ripekatia ngatahitia me ia; tetahi ki matau, tetahi ki tona maui.
- 28
- Na, ka rite te Karaipiture e mea nei, I tāua ngatahitia ia me te hunga hara.
- 29
- A tawai ana ki a ia te hunga e haereere ana i reira, me te oioi o ratou mātenga, ka mea, Ha, ko koe hei whakahoro i te whare tapu, hei hanga ano i nga ra e toru,
- 30
- Whakaorangia koe e koe ano, heke iho hoki i te ripeka.
- 31
- Me nga tohunga nui ano hoki, ratou ko nga Karaipi, i tawai, i mea tetahi ki tetahi, Ko era atu i whakaorangia e ia, tē taea a ia ake te whakaora e ia.
- 32
- Te Karaiti, te Kingi o Iharaira! kia heke iho i te ripeka, kia kite ai matou, kia whakapono ai. I tawai hoki ki a ia, te hunga i ripekatia ngatahitia me ia.
- 33
- Ano ka taea te ono o nga haora, ka pouri a runga o te whenua katoa, taea noatia te iwa o nga haora.
- 34
- A i te iwa o nga haora, ka karanga a Ihu, he nui te reo, ka mea, Iroi, Iroi, rama hapakatani? ko te tikanga tenei ina whakamaoritia, E toku Atua, e toku Atua, he aha koe i whakarere ai i a au?
- 35
- A, te rongonga o etahi o te hunga e tu ana i reira, ka mea, Nana, e karanga ana ia ki a Iraia.
- 36
- Na, ka oma tetahi, ka whakakī i tetahi hautai ki te winika, a whakanohoia ana ki te kakaho ka whakainu atu māna, ka mea, Kāti; kia kite tatou e haere mai ranei a Iraia ki te tango i a ia ki raro.
- 37
- Na, he nui te reo i puaki i a Ihu, a hemo ake.
- 38
- Na, kua pakaru te arai o te whare tapu, e rua nga wahi, o runga a puta noa ki raro.
- 39
- A, te kitenga o te keneturio e tu ana, e anga mai ana ki a ia, i penei tana karanga, a ka hemo, ka mea ia, He pono ko te Tama a te Atua tenei tangata.
- 40
- I reira hoki etahi wāhine e matakitaki mai ana i tawhiti: i roto i a ratou a Meri Makarini, a Meri hoki whaea o Hemi potopoto raua ko Hohi, me Haromi hoki;
- 41
- (Ara, nga wāhine i aru nei i a ia, i a ia i Kariri, a i mahi mea māna;) he tokomaha hoki era atu wāhine i haere tahi mai me ia ki Hiruharama.
- 42
- Na, kua tino ahiahi, ko te ra takanga ano hoki ia, ara, ko to mua ake i te hapati,
- 43
- Na, haere ana a Hohepa o Arimatia, he rangatira runanga, he tangata ano hoki e tatari ana ki te rangatiratanga o te Atua, haere maia ana ia ki a Pirato, inoia ana te tinana o Ihu.
- 44
- Na, ka miharo a Pirato, hua noa kahore ano i mate: a karangatia ana e ia te keneturio, ka ui atu ki a ia, Kua mate noa ake ranei ia?
- 45
- Ano ka rongo ki te keneturio, ka hoatu te tinana ki a Hohepa.
- 46
- A ka hokona e tera tetahi rinena, a tangohia ana ia ki raro, takaia ana ki te rinena, a whakatakotoria ana ia ki roto ki te urupa i haua ki roto ki te kamaka, a whakatakā atu ana he kohatu ki te kuwaha o te urupa.
- 47
- I kite ano a Meri Makarini, raua ko Meri whaea o Hohi, i te wahi i whakatakotoria ai ia.
Address: 
Phone: 
Email: