- 1
- A te pahemotanga o te hapati, ka hokona etahi mea kakara e Meri Makarini, ratou ko Meri whaea o Hemi, ko Haromi hoki, mo ta ratou haere ki te whakawahi i a ia.
- 2
- Na, i te atatu o te ra tuatahi o te wiki ka haere atu ratou ki te urupa i te putanga o te ra;
- 3
- A ka mea ki a ratou ano, Ko wai ta tatou hei whakataka i te kohatu i te kuwaha o te urupa?
- 4
- A ta ratou tirohanga atu, ka kite kua hurihia te kohatu: he mea nui whakaharahara ano hoki.
- 5
- Ano ka tomo atu ratou ki roto ki te urupa, ka kite i tetahi taitamariki e noho ana ki matau, he kakahu ma tona; a ka koera ratou.
- 6
- Na, ka mea ia ki a ratou, Kaua e koera: E rapu ana koutou i a Ihu o Nahareta i ripekatia: kua ara ia; kahore ia i konei: titiro mai ki te wahi i whakatakotoria ai ia.
- 7
- Otira haere, korerotia atu ki ana akonga, ki a Pita hoki, e haere ana ia i mua i a koutou ki Kariri: ko reira koutou kite ai i a ia, ko tana hoki tena i mea ai ki a koutou.
- 8
- A hohoro tonu ta ratou haere mai, oma mai ana i te urupa; i wiri hoki ratou, i koera: kihai rawa hoki i korero atu ki tetahi tangata; i wehi hoki.
- 9
- A, te aranga ake o Ihu i te atatu i te ra tuatahi o te wiki, ka mātua puta ia ki a Meri Makarini, e whitu nei nga rewera i peia e ia i roto i a ia.
- 10
- Haere ana tera, ka korero ki ana akonga ki mua, i a ratou e pouri ana, e tangi ana.
- 11
- A, to ratou rongonga ai e ora ana ia, a kua kitea e ia, kihai ratou i whakapono.
- 12
- Muri iho i enei mea ka puta ia, he ahua ke hoki tona, ki etahi atu o ratou tokorua, i a raua e haere ana, e anga ana ki nga whenua.
- 13
- Na, ka haere raua, ka korero ki era atu: kihai ano hoki ta raua i whakaponohia.
- 14
- Muri iho ka puta ia ki te tekau ma tahi, i a ratou e noho ana ki te kai, a riria iho e ia to ratou whakapono-kore, me te pakeke o te ngakau, mo ratou kihai i whakapono ki te hunga i kite nei i a ia kua ara.
- 15
- A ka mea ki a ratou, Haere koutou ki te ao katoa, kauwhautia te rongo pai ki nga tāngata katoa.
- 16
- Ko ia e whakapono ana, a ka oti te iriiri, ka whakaorangia; na, te tangata e kore e whakapono, ka meinga kia mate.
- 17
- A ka whai tahi enei tohu i te hunga e whakapono ana: Ma toku ingoa ratou ka pei rewera ai; ka korerotia ai e ratou nga reo hou;
- 18
- Ka tango ake ai ratou i nga nakahi; a ki te inu ratou i tetahi mea whakamate, e kore e ahatia; ka pa iho o ratou ringaringa ki nga turoro, a ka ora.
- 19
- Na, te mutunga o tana korerotanga ki a ratou, ka tangohia te Ariki ki te rangi, a noho ana ki te ringa matau o te Atua.
- 20
- Na, haere ana ratou, kauwhau ana i nga wahi katoa, me te mahi tahi ano te Ariki, me te whakau i te kupu ki nga tohu e whai tahi ana. Amine.
Address: 
Phone: 
Email: