- 1
- Na, ka huihui mai ki a ia nga Parihi, me etahi o nga Karaipi, i haere mai i Hiruharama.
- 2
- A, to ratou kitenga i etahi o ana akonga e kai taro ana me te noa ano nga ringaringa, ara, kihai i horoia, ka whakahe mai ratou.
- 3
- E kore hoki e kai nga Parihi, me nga Hurai katoa, ki te kahore i ata horoia nga ringaringa, e pupuri ana hoki i te whakarerenga iho a nga kaumatua.
- 4
- E kore ano ratou e kai ina hoki mai i te kāinga hoko, ki te mea kahore i horoi. He maha hoki era atu mea kua riro mai kia puritia e ratou, nga horoinga o nga kapa, o nga pāta, o nga mea parahi, o nga nohoanga.
- 5
- Katahi ka ui atu nga Parihi me nga Karaipi ki a ia, He aha o akonga tē haere ai i runga i te whakarerenga iho a nga kaumatua, a kahore nei e horoi i nga ringaringa ina kai taro?
- 6
- Na, ka whakahokia atu e ia, a ka mea ki a ratou, Tika rawa ta Ihaia i poropiti ai mo koutou mo te hunga tinihanga, te mea hoki i tuhituhia, Te iwi nei, ko nga ngutu nei hei whakahonore i a au, matara noa atu ia i a au o ratou ngakau.
- 7
- Otira maumau karakia noa ratou ki a au, ta ratou nei hoki e whakaako ai ko nga whakahaunga a te tangata.
- 8
- Kua whakarerea hoki e koutou ta te Atua kupu ako, pupuri ai i te whakarerenga iho a nga tāngata, i nga horoinga o nga pāta, o nga kapa: he maha hoki nga mea pena e meinga ana e koutou.
- 9
- I mea ano ia ki a ratou, Tena ra ta koutou hanga ki te whakakahore i te whakahaunga a te Atua, kia mau ai koutou ki ta koutou whakarerenga iho.
- 10
- I mea hoki a Mohi, Whakahonoretia tou pāpā me tou whaea; a, Ki te kohukohua e tetahi tona pāpā, whaea ranei, kia mate ia mate rawa:
- 11
- Ko koutou ia hei mea, Ki te mea tetahi ki tona pāpā, ki tona whaea ranei, Ko taku mea hei atawhainga mou, he koropana, ara, he mea i whakaherea,
- 12
- Na, heoi ano a koutou tukunga i a ia, ki te mea i tetahi mea ma tona pāpā ma tona whaea ranei;
- 13
- Ka waiho nei e koutou ta koutou whakarerenga iho, i whakarerea iho nei e koutou, hei whakakahore mo ta te Atua kupu: a he maha nga mea pena e meinga ana e koutou.
- 14
- Na, karangatia ana e ia te mano katoa, a mea atu ana ki a ratou, Whakarongo mai koutou katoa, kia mātau koutou:
- 15
- Kahore he mea o waho o te tangata ka tapoko nei ki roto ki a ia hei whakanoa i a ia: engari nga mea e puta mai ana i roto i a ia, ma enei e noa ai te tangata.
- 16
- Ki te whai taringa tetahi hei whakarongo, kia rongo ia.
- 17
- Ano ka mawehe mai ia i te mano ki roto ki te whare, ka ui mai ana akonga ki a ia ki te tikanga o tena kupu whakarite.
- 18
- Na, ka mea ia ki a ratou, Ha, e kuare ana ano hoki koutou? Kahore koutou i mātau, na, nga mea katoa o waho e tapoko nei ki roto ki te tangata, e kore ia e noa i era;
- 19
- No te mea e kore e tapoko ki roto ki tona ngakau, engari ki te kopu, a puta atu ano ki te poka, me te tahi ano i nga kai katoa?
- 20
- I mea ano ia, Ko te mea e puta ake ana i te tangata, ma tera e noa ai te tangata.
- 21
- No roto hoki no te ngakau o nga tāngata te putanga o nga whakaaro kino, o nga puremu, o nga moe puku, o nga kohuru,
- 22
- O nga tahae, o nga hiahia apo, o nga kino, o te tinihanga, o te hiahia taikaha, o te kanohi kino, o te kohukohu, o te whakapehapeha, o te wairangi:
- 23
- No roto te putanga ake o enei kino katoa, a ma reira e noa ai te tangata.
- 24
- Na, ka whakatika atu ia i reira, ka haere ki nga wahi o Taira o Hairona, a tomo ana ki roto ki tetahi whare, kihai hoki ia i pai kia rongo tetahi tangata: otiia kihai i ngaro.
- 25
- I rongo hoki ki a ia tetahi wahine, he wairua poke to tana kotiro, a haere ana takoto ana ki ona waewae:
- 26
- He wahine Kariki hoki ia, no Hairopinihia tona iwi; ka inoi ki a ia kia peia e ia te rewera i roto i tana kotiro.
- 27
- Na, ko te meatanga atu a Ihu ki a ia, Tukua kia mātua makona nga tamariki: e kore hoki e pai kia tangohia te taro a nga tamariki, kia makā ma nga kuri.
- 28
- Na, ka whakahokia mai e ia, a ka mea ki a ia, Ae ra, e te Ariki: ahakoa ra e kai ana nga kuri i raro i te tepara i nga kongakonga a nga tamariki.
- 29
- Na, ko tana meatanga atu ki a ia, Koia kei tena kupu, haere; kua puta mai te rewera i roto i to kotiro.
- 30
- A, tona haerenga ki tona whare, na, rokohanga atu kua puta mai te rewera, a ko tana kotiro e takoto ana i runga i te moenga.
- 31
- A i hoki atu ano ia i nga wahi o Taira, o Hairona, a haere ana ki te moana o Kariri, ra waenga o nga wahi o Rekaporihi.
- 32
- Na, ka mauria mai e ratou ki a ia he turi e whango ana; ka tohe ki a ia kia whakapākia iho tona ringa ki a ia.
- 33
- Na, ka tangohia atu ia i roto i te mano ki tahaki, a kuhua ana ona maihao ki ona taringa, na ka tuwha atu, ka whakapa atu ki tona arero;
- 34
- Ka titiro atu ki te rangi, ka hotu tona manawa, ka mea ki a ia, Epata, ara, Kia puare.
- 35
- Na, puare tonu iho ona taringa, a korokoro noa ana te here o tona arero, na, kua tika ana korero.
- 36
- Katahi ia ka whakatupato i a ratou kia kaua e korerotia ki te tangata: otira whakatupato noa ia i a ratou, nui noa atu ta ratou korero;
- 37
- A tino miharo rawa ratou, ka mea, Pai tonu tana meatanga i nga mea Katoa: e mea ana ia i nga turi kia rongo, i nga reo kore kia korero.
Address: 
Phone: 
Email: