- 1
- I aua ra ano i te mano e nui rawa ana, a kahore he kai ma ratou, ka karanga a Ihu ki ana akonga, ka mea ki a ratou,
- 2
- E aroha ana ahau ki nga tāngata, ka toru nei hoki o ratou ra e noho ana ki a au, a kahore ā ratou kai:
- 3
- A ki te tonoa pukutia ratou e ahau ki o ratou whare, ka hemo ki te ara: i haere mai hoki etahi o ratou i tawhiti.
- 4
- Na, ka whakahokia mai ki a ia e ana akonga, Me aha te tangata ka makona ai enei i te taro i konei i te koraha?
- 5
- Ka ui atu ia ki a ratou, E hia ā koutou taro? Ka mea mai ratou, E whitu.
- 6
- Na, ka mea ia ki te mano kia noho ki raro ki te whenua: a ka mau ki nga taro e whitu, ka whakawhetai, ka whawhati, a hoatu ana e ia ki ana akonga kia whakatakotoria; a whakatakotoria ana e ratou ma te mano.
- 7
- He ika ano ā ratou torutoru nei, he mea nonohi: a ka mutu te whakapai, ka mea kia whakatakotoria hoki era.
- 8
- Na, kai ana ratou, a ka makona: a kohia ake ana e ratou o nga whatiwhatinga i toe e whitu nga kete.
- 9
- A me te mea e wha mano te hunga i kai: a tonoa atu ana ratou e ia.
- 10
- Na, eke tonu atu ia, ratou tahi ko ana akonga, ki runga ki te kaipuke, a ka tae atu ki nga wahi o Taramanuta.
- 11
- Na, ka haere mai nga Parihi, ka anga ka totohe ki a ia, ka rapu tohu i a ia i te rangi, hei whakamatautau mona.
- 12
- Na, hotu tona wairua, ka mea ia, He aha tenei whakatupuranga ka rapu ai ki te tohu? he pono taku e mea nei ki a koutou, E kore e hoatu he tohu ki tenei whakatupuranga.
- 13
- Na, mahue ake ratou i a ia, a eke ana ano ia ki te kaipuke, rere ana ki tera taha.
- 14
- Na, i wareware ratou ki te mau taro atu, a kotahi anake a ratou taro i te kaipuke.
- 15
- Na, ka whakatupato ia i a ratou, ka mea, Kia mahara, kia tupato i te rewena a nga Parihi, i te rewena hoki a Herora.
- 16
- A ka korerorero ratou ki a ratou ano, ka mea, No te mea kahore ā tatou taro.
- 17
- A ka mohio a Ihu, ka mea ki a ratou, He aha koutou ka korerorero ai no te mea kahore ā koutou taro? kiano koutou i mātau noa, kiano i mahara? e pakeke tonu ana ano ranei o koutou ngakau?
- 18
- He kanohi nei o koutou, a e kore koutou e kite? he taringa nei o koutou, a e kore koutou e rongo? e kore ano hoki e mahara?
- 19
- I a au i whatiwhati i nga taro e rima ma nga mano e rima, e hia nga kete kī o nga whatiwhatinga i kohia ake e koutou? Ka mea mai ratou ki a ia, Kotahi tekau ma rua.
- 20
- I nga taro hoki e whitu ma nga mano e wha, e hia nga kete kī o nga whatiwhatinga i kohia ake e koutou? Ka mea ratou, E whitu.
- 21
- Na, ka mea ia ki a ratou, He aha ina koutou tē mātau ai?
- 22
- A, tona taenga mai ki Petahaira, ka kawea mai e ratou he matapo ki a ia, a ka inoi ki a ia kia whakapangia atu e ia.
- 23
- Na, ka mau ia ki te ringaringa o te matapo, ka arahi i a ia ki waho o te kāinga; ka tuwha atu hoki ki ona kanohi, whakapakia ana ona ringaringa ki a ia, ka ui atu ki a ia me kore ia e kite i tetahi mea.
- 24
- Na, ka titiro ake ia, ka mea, E kite atu ana ahau i nga tāngata e haereere ana me te mea he rakau.
- 25
- Me i reira ka whakapakia ano nga ringaringa ki ona kanohi, a ka mea i a ia kia titiro mai: na, ka ora ano ia, a ka mārama te titiro atu ki nga tāngata katoa.
- 26
- Na, ka tono atu ia i a ia ki tona whare, ka mea atu, Kaua e tomo atu ki te kāinga, kaua ano hoki e korerotia atu ki tetahi i te kāinga.
- 27
- Na, ka haere atu a Ihu, ratou ko ana akonga, ki nga kāinga o Hiharia Piripai: a i te ara ka ui atu ia ki ana akonga, ka mea ki a ratou, Ki ta nga tangata kī, ko wai ahau?
- 28
- Na, ko ta ratou whakahokinga mai, Ko Hoani Kai iriiri: ki ta etahi, ko Iraia; a ki ta etahi, ko tetahi o nga poropiti.
- 29
- Na, ka mea ia ki a ratou, A ki ta koutou kī, ko wai ahau? Na, ko te whakahokinga mai a Pita, ka mea ki a ia, Ko te Karaiti koe.
- 30
- Na, ka whakatupato ia i a ratou, kia kaua ia e korerotia ki tetahi tangata.
- 31
- Katahi ia ka anga ka whakaako i a ratou, kua takoto te tikanga kia maha nga mamae o te Tama a te tangata, kia whakakinongia hoki e nga kaumatua, e nga tohunga nui, e nga Karaipi, a kia whakamatea, kia ara ano hoki ina pahure nga ra e toru.
- 32
- I korerotia nuitia ano hoki taua kupu e ia. A ka mau a Pita ki a ia, ka anga ka whakahe ki tana.
- 33
- Otira ka tahuri ia ka titiro ki ana akonga, ka whakahe ki ta Pita, ka mea, Haere ki muri i a au, e Hatana: kahore hoki ou ngakau ki nga mea a te Atua, engari ki ā te tangata.
- 34
- Na, ka karangatia e ia te mano, ratou ko ana akonga, a ka mea ki a ratou, Ki te mea tetahi tangata kia haere mai ki te whai i a au, me whakakahore e ia tāna ake, me amo tona ripeka, ka aru i a au.
- 35
- Ki te whai tetahi kia ora, ka mate ano ia; a ki te mate tetahi, mona i whakaaro ki a au, ki te rongo pai ano hoki, ka ora ia.
- 36
- He aha hoki te pai ki te tangata, ki te riro mai i a ia te ao katoa, a ka kore he ora mona?
- 37
- He aha hoki ta te tangata e hoatu ai hei utu mona kia ora?
- 38
- Ki te whakama hoki tetahi ki a au me aku korero, i tenei whakatupuranga puremu, i tenei whakatupuranga kino; ka whakama ano hoki te Tama a te tangata ki a ia, ina haere mai i runga i te kororia o tona Matua, ratou ko nga anahera tapu.
Address: 
Phone: 
Email: