- 1
- I mea ano hoki ia ki a ratou, He pono taku e mea atu nei ki a koutou, Tenei ano etahi o te hunga e tu nei, e kore e pāngia e te mate, kia kite ra ano i te rangatiratanga o te Atua e haere mai ana i runga i te kaha.
- 2
- A ka pahure nga ra e ono, ka mau a Ihu ki a Pita, ki a Hemi, ki a Hoani, na, kawea ana ratou e ia ki runga ki tetahi maunga tiketike, ko ratou anake: a ka puta ke tona ahua i to ratou aroaro.
- 3
- A kanapa tonu ona kakahu, ma tonu me te hukarere; e kore e taea e te kai horoi i runga i te whenua te mea kia pera te ma.
- 4
- Na, ka kitea e ratou a Iraia raua ko Mohi: e korerorero ana hoki raua ki a Ihu.
- 5
- Na, ka oho atu a Pita, ka mea ki a Ihu, E te Kai whakaako, he mea pai kia noho tatou ki konei: na, kia hangā e matou etahi wharau kia toru; kia kotahi mou, kia kotahi mo Mohi, kia kotahi mo Iraia.
- 6
- Kahore hoki ia i mātau ki tana e korero ai; i wehi hoki ratou.
- 7
- A ko tetahi kapua e taumarumaru ana ki runga ki a ratou: a ka puta mai he reo i te kapua, e mea ana, Ko taku Tama tenei i aroha ai; whakarongo ki a ia.
- 8
- A titiro rawa mai ratou ki tetahi taha ki tetahi taha, kahore a ratou tangata i kite ai, ko ratou anake ko Ihu.
- 9
- A i a ratou e heke iho ana i te maunga, ka whakatupato ia i a ratou kia kaua e korerotia ki te tangata ā ratou i kite ai, kia ara ra ano te Tama a te tangata i te hunga mate.
- 10
- A i puritia taua kupu e ratou, ka uiui ki a ratou ano, he aha ra te aranga ake i te hunga mate.
- 11
- A ka ui mai ratou ki a ia, ka mea, He aha nga Karaipi ka mea ai, ko Iraia kia mātua puta mai?
- 12
- Na, ka whakahokia atu e ia, a ka mea ki a ratou, E puta mai ana ano a Iraia ki mua, ki te whakatika i nga mea katoa; a kua oti ano te tuhituhi mo te Tama a te tangata, kia maha ona mamae, kia whakakahoretia.
- 13
- Ko taku kupu ia tenei ki a koutou, Kua tae mai ano a Iraia, heoi meatia ana e ratou ki a ia ta ratou i pai ai, nga mea hoki i tuhituhia mona.
- 14
- A, tona taenga atu ki nga akonga, ka kite ia he nui te tangata e karapoti ana i a ratou, me nga Karaipi e totohe ana ki a ratou.
- 15
- A kite kau mai te mano katoa i a ia, ka miharo, a oma ana, oha ana ki a ia.
- 16
- Na, ka ui atu ia ki nga Karaipi, He aha ta koutou e totohe na ki a ratou?
- 17
- Na, ka whakahokia mai e tetahi i roto i te mano, ka mea, E te Kai whakaako, kua kawea mai e ahau taku tamaiti ki a koe, he wairua reo-kore tona;
- 18
- A i nga wahi e hopu ai te wairua i a ia, ka taia iho: tutū ana te huka, tetea noa iho ona niho, a pakoko haere ana: i mea ano ahau ki āu akonga kia peia ia ki waho; heoi kihai i taea e ratou.
- 19
- Na, ko tana whakahokinga atu ki a ia, ka mea, E te uri whakapono-kore, kia pehea te roa o taku nohoanga ki a koutou? kia pehea te roa o taku manawanuitanga ki a koutou? Kawea mai ki a au.
- 20
- Na, kawea mai ana ia ki a ia: a, tona kitenga i a ia, na, haea tonutia iho ia e te wairua; a hinga ana ia ki te whenua, ka oke, ka huka.
- 21
- Na, ka ui atu ia ki tona matua, Pehea te roa o tenei mea i a ia? Ka mea mai ia, No te tamarikitanga:
- 22
- A he maha ana turakanga i a ia ki te kapura, ki te wai, kia mate ai: otira ki te taea e koe te aha ranei, arohaina mai maua, kia puta to whakaaro ki a maua.
- 23
- Ka mea a Ihu ki a ia, Ki te taea e koe te whakapono, ka taea nga mea katoa e te tangata whakapono.
- 24
- Na, karanga tonu mai te matua o te tamaiti, ka mea, me te heke ano nga roimata, E whakapono ana ahau, e te Ariki; kia puta to whakaaro ki taku whakapono-kore.
- 25
- Na te kitenga o Ihu i te mano e oma mai ana, ka riria e ia te wairua poke, ka mea ki a ia, E te wairua reo-kore, turi, ko taku kī tenei ki a koe, Puta mai i roto i a ia, kaua ano hoki e tomo atu ki roto ki a ia a muri ake nei.
- 26
- Na, hamama ana tera, a haehae noa iho i a ia, a puta mai ana ki waho: no ka pera taua tangata me te tupapaku, a he tokomaha i mea, Kua mate.
- 27
- Na, ka mau a Ihu ki tona ringa, ka whakaara i a ia; a ka whakatika ia.
- 28
- A ka tomo atu ia ki te whare, ka ui puku ana akonga ki a ia, He aha matou tē ahei ai te pei i a ia ki waho?
- 29
- Ano ra ko ia ki a ratou, E kore e puta noa mai te pena, ma te inoi anake, ma te noho puku.
- 30
- Na, ka hapainga atu e ratou i reira, a haere ana ra waenganui o Kariri; a kihai ia i pai kia rangona e tetahi.
- 31
- Ko tana hoki tena i whakaako ai ki ana akonga, i mea ai ki a ratou, Ka tukua te Tama a te tangata ki nga ringa o nga tāngata, a ma ratou ia e whakamate; a ka oti ia te whakamate, ka ara ake i te toru o nga ra.
- 32
- Na, kihai ratou i mātau ki taua kupu, a ka mataku ki te ui ki a ia.
- 33
- Na, tona taenga mai ki Kaperenauma: a i a ia i roto i te whare, ka ui ia ki a ratou, He aha ta koutou i korerorero ai ki a koutou i te ara?
- 34
- A kihai ratou i kīkī: ko ta ratou hoki i korerorero ai ki a ratou i te ara, ko wai e nui rawa.
- 35
- Na, ka noho ia, a ka karanga i te tekau ma rua, ka mea ki a ratou, Ki te whai tetahi kia waiho ko ia hei mua, ka waiho ia hei muri i te katoa, hei kai mahi ma te katoa.
- 36
- I mau ano ia ki tetahi tamaiti nohinohi, a whakaturia ana ki waenganui i a ratou: na, ka okooko i a ia, a ka mea ki a ratou,
- 37
- Ki te manako tetahi ki tetahi o nga tamariki penei, he whakaaro hoki ki toku ingoa, e manako ana ia ki a au: a ki te manako tetahi ki a au, ehara ahau i tana i manako ai, engari ko toku kai tono mai.
- 38
- Na, ka oho mai a Hoani ki a ia, ka mea, E te Kai whakaako, i kite matou i tetahi e pei rewera ana i runga i tou ingoa, a kahore e haere tahi nei me tatou: na, riria iho e matou, mona kahore e haere tahi me tatou.
- 39
- Na, ka mea a Ihu, Kaua ia e riria: ki te mea hoki noku te ingoa e mahi merekara ai tetahi, e kore e hohoro tana korero kino moku.
- 40
- Ko ia hoki ehara i te hoa riri ki a tatou, no tatou ia.
- 41
- Ki te whakainumia koutou e tetahi ki te kapa wai, he whakaaro ki toku ingoa, no te mea no te Karaiti koutou, he pono taku e mea nei ki a koutou, e kore ia e hapa i tana utu.
- 42
- Na, ki te mea tetahi kia hē tetahi o enei mea nonohi e whakapono nei ki a au, nui ke te pai ki a ia ki te whakawerewerea tetahi kohatu mira ki tona kakī, a ka makā ia ki te moana.
- 43
- Na, ki te hē koe i tou ringaringa, poutoa: he nui ke hoki te pai ki a koe kia tomo mutu atu koe ki te ora, a kia kaua e haere me te mau ano nga ringaringa e rua ki te reinga, ki te kapura e kore e tineia:
- 44
- Ki te wahi e kore ai e mate to ratou kutukutu, ki te kapura e kore e tineia.
- 45
- Ki te hē ano koe i tou waewae, poutoa: he nui ke hoki te pai ki a koe kia tomo kopa atu koe ki te ora, a kia kaua e makā me te mau ano nga waewae e rua ki te reinga, ki te kapura hoki e kore tineia:
- 46
- Ki te wahi e kore ai e mate to ratou kutukutu, ki te kapura e kore e tineia.
- 47
- Ki te hē ano hoki koe i tou kanohi, makā atu: he mea pai hoki ki a koe kia tomo kanohi tahi ki te rangatiratanga o te Atua, a kia kaua koe e makā me nga kanohi e rua ki te kapura o te reinga:
- 48
- Ki te wahi e kore ai e mate to ratou kutukutu, ki te kapura e kore e tineia.
- 49
- Ta te mea ka totetia nga tāngata katoa ki te kapura, ka totetia ano hoki nga patunga tapu katoa ki te tote.
- 50
- He mea pai te tote: otira ki te pirau te tote, ma te aha e whai tikanga tote ai? Kia whai tote i roto i a koutou, kia mau hoki te rongo a tetahi ki tetahi.
Address: 
Phone: 
Email: