- 1
- I taua wa e haere ana a Ihu i te hapati ra waenga witi; a e mate ana ana akonga i te hiakai, na, ka anga ratou ka kakato i nga witi, ka kai.
- 2
- A, te kitenga o nga Parihi, ka mea ki a ia, Na, o akonga e mea ra i te mea e kore e tika kia meatia i te hapati.
- 3
- Ka mea mai ia ki a ratou, Kahore koutou i kite i ta Rawiri i mea ai i a ia e mate ana i te hiakai, ratou ko ona hoa;
- 4
- I tona tomokanga ki te whare o te Atua, i tana kainga i nga taro aroaro, i nga mea kihai nei i tika kia kainga e ia, e ona hoa ranei, engari ma nga tohunga anake?
- 5
- A kahore ano koutou i kite i roto i te ture, e whakanoatia ana te hapati e nga tohunga i roto i te temepara i nga hapati, a kahore he hē?
- 6
- Ko taku kupu ia tenei ki a koutou, Kei konei ano tetahi e rahi atu ana i te temepara.
- 7
- Otiia me i mātau koutou ki tenei, Ko taku e pai ai ko te tohu tangata, haunga te patunga tapu, kahore koutou i whakahe i te hunga hara-kore.
- 8
- Ko te Tama nei hoki a te tangata te Ariki o te hapati.
- 9
- A, tona haerenga atu i reira, ka haere ia ki to ratou whare karakia:
- 10
- Na, he tangata tera kua memenge tona ringa. A ka ui atu ratou ki a ia, ka mea, He mea tika ranei te whakaora i te hapati? he mea hoki kia whakapangia ai e ratou he hē ki a ia.
- 11
- Na, ko tana meatanga atu ki a ratou, Ko tehea tangata o koutou, ki te mea kotahi ana hipi, a ka taka ki roto ki te poka i te hapati, e kore ranei ia e mau ki taua hipi, e hapai ake?
- 12
- Na, tera atu to te tangata pai i to te hipi. Ina, e tika ana ano to mahi pai i nga hapati.
- 13
- Me i reira ka mea atu ia ki taua tangata, Torona mai tou ringa. A, te toronga mai kua ora ano, kua pera me tetahi.
- 14
- Na, ka haere nga Parihi ki waho, ka runanga mona ki te pehea e whakamate ai ia e ratou.
- 15
- Otira i mātau a Ihu, a haere atu ana i reira: a he tini te tangata i aru i a ia, a whakaorangia ana ratou katoa e ia;
- 16
- A i whakatupato ano ia i a ratou kei whakakitea ia:
- 17
- Na, ka rite ta Ihaia poropiti i korero ai, i mea ai,
- 18
- Na, taku pononga, tāku i whiriwhiri ai; tāku i aroha ai, ta toku Wairua i ahuareka atu ai: ka waiho e ahau toku Wairua ki runga ki a ia, a māna e whakapuaki te whakawa ki nga tauiwi.
- 19
- E kore ia e totohe, e kore ia e hāmama; e kore ano hoki e rangona tona reo i nga ara;
- 20
- E kore e whatiia porokeretia e ia te kakaho i mangungu, e kore e tineia te muka e whakapaoa ana; kia puta ra ano i a ia te whakawa ki te wikitoria.
- 21
- A ka tumanako atu nga tauiwi ki tona ingoa.
- 22
- Me i reira ka kawea mai ki a ia he tangata e nohoia ana e te rewera, he matapo, he wahangu: a whakaorangia ana ia e ia, no ka korero ka kite taua matapo taua wahangu.
- 23
- A ka oho mauri nga tāngata katoa, ka mea, Ehara ianei tenei i te Tama a Rawiri?
- 24
- A, te rongonga o nga Parihi, ka mea, Ehara i a ia nāna i pei nga rewera nei, engari na Perehepura na te rangatira o nga rewera.
- 25
- A i mātau a Ihu ki ā ratou whakaaro, a ka mea ki a ratou, Ki te tahuri iho tetahi rangatiratanga ki a ia ano, ka kore; a ki te tahuri iho ki a ia ano tetahi pa, tetahi whare ranei, e kore e tu:
- 26
- Na, ki te pei a Hatana i a Hatana ano, e tahuri iho ana ki a ia ano; me pehea e tu ai tona rangatiratanga?
- 27
- A ki te mea na Perehepura taku peinga rewera, na wai te peinga a a koutou tamariki? na, ko ratou hei kai whakahe mo koutou.
- 28
- Tena ki te mea na te Wairua o te Atua taku peinga rewera, ina, kua tae noa mai te rangatiratanga o te Atua ki a koutou.
- 29
- Me pehea oti ka tomo ai te tangata ki roto ki te whare o te tangata kaha, ka pahua ai i ona taonga, ki te kore ia e mātua here i taua tangata kaha? ko reira pahua ai i tona whare.
- 30
- Te tangata ehara i te hoa nuku, he hoa noku, riri ia ki a au; te tangata kahore e kohikohi tahi māua, e titaritari ana.
- 31
- Koia ahau ka mea nei ki a koutou, Ko nga hara katoa, me nga kohukohu a nga tāngata e murua: tena ko te kohukohunga ki te Wairua Tapu e kore e murua.
- 32
- A ki te korero whakahe tetahi mo te Tama a te tangata, e murua tāna: tena ki te korero whakahe tetahi mo te Wairua Tapu, e kore e murua tāna i tenei ao, e kore ano hoki i tera atu.
- 33
- Meinga ranei te rakau kia pai, a pai iho ona hua; meinga ranei te rakau kia kino, a kino iho ona hua; ma nga hua hoki ka mohiotia ai te rakau.
- 34
- E te uri nakahi, me pehea ka korero pai ai koutou te hunga kino? he purenatanga hoki no te ngakau nga kupu a te mangai.
- 35
- Te tangata pai he pai āna e whakaputa mai ai i roto i nga taonga pai o te ngakau: te tangata kino hoki he kino āna e whakaputa mai ai i roto i nga taonga kino.
- 36
- Na, ko taku kupu tenei ki a koutou, Me korero e nga tāngata, i te ra whakawa, te tikanga o nga kupu pokanoa katoa e puaki i a ratou.
- 37
- Ma āu kupu hoki koe ka whakatikaia ai, ma āu kupu hoki koe ka whakahēngia ai.
- 38
- Me i reira ka ki atu etahi o nga Karaipi o nga Parihi, ka mea, E te Kai whakaako, e mea ana matou kia kite i tetahi tohu āu.
- 39
- Na, ka whakahokia atu e ia, ka mea ki a ratou, E rapu ana te whakatupuranga kino te whakatupuranga puremu ki tetahi tohu; a e kore tetahi tohu e hoatu ko te tohu anake o Hona poropiti:
- 40
- E toru hoki nga ra o Hona e toru nga po i roto i te kopu o te tohora; waihoki ka toru nga ra ka toru nga po o te Tama a te tangata ki te ngakau o te whenua.
- 41
- E whakatika ngatahi nga tāngata o Ninewe me tenei whakatupuranga, i te whakawakanga, a e whakatau i te hē ki a ratou: i ripeneta hoki ratou i te kauwhautanga a Hona; a tenei ano tetahi e nui atu ana i a Hona.
- 42
- E whakatika ngatahi te kuini o te tonga me tenei whakatupuranga i te whakawakanga, a e whakatau i te hē ki a ratou: i haere mai hoki ia i nga pito o te whenua ki te whakarongo ki nga whakaaro nui o Horomona; a tenei ano, tetahi e nui atu ana i a Horomona.
- 43
- Ka puta mai te wairua poke i roto i te tangata, ka haereere ra nga wahi maroke rapu okiokinga ai, a tē kitea,
- 44
- Ka mea ia, Ka hoki atu ahau ki taku whare i puta mai ai ahau; a, te taenga atu rokohanga atu e takoto kauana, oti rawa te tahi, te whakapai.
- 45
- Na, ka haere ia, ka tango i etahi atu wairua tokowhitu, hei hoa mona, he kino noa atu i a ia ano, a ka tomo atu ratou ka noho i reira: a kino atu i te timatanga te whakamutunga ki taua tangata. Tera ano hoki e pera tenei whakatupuranga kino.
- 46
- I a ia ano e korero ana ki te mano, na, ko tona whaea ratou ko ona teina e tu ana i waho, e whai ana kia korero ki a ia.
- 47
- A ka mea tetahi ki a ia, Na, tou whaea me ou teina te tu mai nei i waho, e whai ana kia korero ki a koe.
- 48
- Na, ko tana whakahokinga mai ka mea ki te tangata i korero ki a ia, Ko wai toku whaea? ko wai hoki oku teina?
- 49
- Na, ka torona atu tona ringa ki ana akonga, a ka mea, Na, toku whaea, oku teina!
- 50
- Ki te meatia hoki e tetahi ta toku Matua i te rangi e pai ai, hei teina ia ki a au, hei tuahine, hei whaea.
Address: 
Phone: 
Email: