- 1
- I taua ra ano i haere atu a Ihu i te whare, a ka noho ki te taha o te moana.
- 2
- Na, he tini te tangata i huihui mai ki a ia, a ka eke ia ki runga ki te kaipuke noho ai; i te takutai ano hoki nga mano katoa e tu ana.
- 3
- A he maha ana korero ki a ratou, he mea whakarite, i mea ia, Na, i haere atu te kai rui ki te rui;
- 4
- A i a ia e rui ana, ka ngahoro etahi o nga purapura ki te taha o te ara, a, te rerenga mai o nga manu, na, kainga ake:
- 5
- Ko etahi i ngahoro ki nga wahi kamaka, ki nga wahi kihai i nui te oneone: na pihi tonu ake, kahore hoki i hohonu te oneone;
- 6
- A, te whitinga o te ra, ngaua iho; a, no te mea kahore he putake, memenge noa iho:
- 7
- Ko etahi i ngahoro ki roto ki nga tataramoa; a, te tupunga ake o nga tataramoa, koaoaotia ana nga purapura:
- 8
- Ko etahi i ngahoro ki te oneone pai, a ka hua, no etahi kotahi rau, no etahi e ono tekau, no etahi e toru tekau.
- 9
- Ki te whai taringa tetahi hei whakarongo, kia rongo ia.
- 10
- A ka haere mai nga akonga, ka mea ki a ia, Na te aha koe i korero whakarite tonu ai ki a ratou?
- 11
- Na, ko tana whakahokinga atu ki a ratou, ka mea atu, No te mea kua hoatu ki a koutou te matauranga ki nga mea ngaro o te rangatiratanga o te rangi, ki a ratou ia kahore i hoatu.
- 12
- Ki te whai mea hoki tetahi, ka hoatu ano ki a ia, a ka maha atu ana: a ki te kahore he mea a tetahi, ko ana ake ka tangohia i a ia.
- 13
- Na reira enei kupu whakarite aku ki a ratou; no te mea kite rawa ratou, a kahore e kite; rongo rawa, kahore e rongo, kahore hoki e mātau.
- 14
- A ka rite i a ratou te poropititanga a Ihaia, e mea nei, Rongo noa koutou, kahore e mātau; titiro noa koutou, kahore e kite:
- 15
- Kua matotoru hoki te ngakau o tenei iwi, kua puhoi nga taringa ki te whakarongo ko nga kanohi kua oti te whakamoe e ratou; kei kite o ratou kanohi, kei rongo nga taringa, a ka mātau te ngakau, na, ka tahuri ratou, a ka whakaorangia e ahau.
- 16
- Koa tonu ia o koutou kanohi, no te mea ka kite; o koutou taringa hoki, no te mea ka rongo.
- 17
- He pono hoki taku e mea nei ki a koutou, He tokomaha nga poropiti me nga tāngata tika i hiahia kia kite i nga mea e kite nei koutou, a kahore i kite; kia rongo hoki i nga mea e rongo nei koutou, a kahore i rongo.
- 18
- Na, whakarongo mai ki te kupu i whakaritea ki te kai rui.
- 19
- Ki te rongo tetahi ki te kupu o te rangatiratanga, a e kore e mātau, na, ka haere mai te wairua kino, ka kapo i te mea ka oti na te rui ki tona ngakau. Ko te mea tenei i ruia ki te taha o te ara.
- 20
- Na, te mea i ruia ki nga wahi kohatu, ko te tangata i rongo ki te kupu, a hohoro tonu te tango mai, hari tonu;
- 21
- Otiia kahore ona pakiaka, he mea nonaianei kau nei: a, te pānga mai o te whakapawera, o te whakatoinga ranei, mo te kupu, na, hē tonu iho.
- 22
- Te mea hoki i ruia ki roto ki nga tataramoa ko te tangata i rongo ki te kupu; a, ko te whakaaroaronga ki tenei ao, me te hangarau o nga taonga, hei whakakoaoao i te kupu, a kore ake he hua.
- 23
- Na, te mea i ruia ki te oneone pai ko te tangata e rongo ana i te kupu, a e mātau ana; a ka whai hua, ea ake, no tetahi kotahi rau, no tetahi e ono tekau, no tetahi e toru tekau.
- 24
- Tenei ake ano hoki tetahi kupu whakarite i makā e ia ki a ratou, i mea ia, E rite ana te rangatiratanga o te rangi ki tetahi tangata i rui i te purapura pai ki tana māra:
- 25
- A i nga tāngata e moe ana, ka haere mai tona hoa riri, ruia iho he taru kino ki waenga witi, a haere ana.
- 26
- Ano ka pihi ake te rau, a ka hua, katahi ka kitea ano hoki nga taru.
- 27
- Na, ka haere mai nga pononga o taua rangatira, ka mea ki a ia, E mara, kihai ianei koe i rui i te purapura pai ki to māra? No hea ra ona taru?
- 28
- Na, ka kī atu ia ki a ratou, Na te hoa riri tenei i mea. Katahi ka mea nga pononga ki a ia, E pai ranei koe kia haere matou ki te huhuti i aua taru?
- 29
- A ka mea ia, Kahore; kei hutia ngatahitia ano hoki nga witi ina hutia nga taru.
- 30
- Tukua kia tupu tahi, a taea noatia te kotinga: a i te wa o te kotinga ka mea ahau ki nga kai kokoti, Mātua hutia nga taru, ka paihere ai hei paihere kia tahuna; ko te witi ia me kohi ki taku whare witi.
- 31
- Tenei ake ano hoki tetahi kupu whakarite i makā atu e ia ki a ratou, i mea ia, E rite ana te rangatiratanga o te rangi ki te pua nani, i kawea e te tangata, i ruia ki tana māra:
- 32
- He iti rawa ia i nga purapura katoa: a ka tupu, ko te nui rawa o nga otaota, a whakarakau ana, no ka rere mai nga manu o te rangi, ka noho ki ona manga.
- 33
- Tenei ake ano hoki tetahi kupu whakarite i korerotia e ia ki a ratou, E rite ana te rangatiratanga o te rangi ki te rewena i tangohia e tetahi wahine, a whaongia ana ki roto ki nga mehua paraoa e toru, no ka rewenatia katoatia.
- 34
- Ko anei mea katoa i korerotia e Ihu ki nga tāngata, he mea whakarite; a heoi ano āna kupu ki a ratou he kupu whakarite anake:
- 35
- I rite ai ta te poropiti i korero ai, i mea ai, E puaki i taku mangai nga kupu whakarite; ka korerotia e ahau nga mea i ngaro te timatanga ra ano o te ao.
- 36
- Katahi ka tonoa e Ihu nga tāngata, ka haere ia ki te whare: a ka haere mai ana akonga ki a ia, ka mea, Whakaaturina mai ki a matou te kupu i whakaritea ki nga taru i te māra.
- 37
- Na, ka whakahokia mai e ia, a ka mea ki a ratou, Te kai rui o te purapura pai ko te Tama a te tangata;
- 38
- Te māra ko te ao; te purapura pai ko nga tamariki o te rangatiratanga; a, nga taru ko nga tamariki a te kino;
- 39
- Te hoa riri i ruia ai, ko te rewera; te kotinga ko te mutunga o te ao; nga kai kokoti ko nga anahera.
- 40
- Na, e hutihutia ana nga taru e tahuna, ana ki te ahi; ka pera ano hoki i te mutunga, o tenei ao.
- 41
- Ka tono te Tama a te tangata i ana anahera, ki te huihui mai i roto i tona, rangatiratanga i nga mea katoa e tutuki ai te waewae me nga kai mahi i te kino;
- 42
- A ka makā e ratou ki roto ki te oumu ahi; ko te wahi tera o te tangihanga me te teteatanga o nga niho.
- 43
- Ko reira te hunga tika whiti ai me te ra, ki te rangatiratanga o to ratou Matua. Ki te whai taringa tetahi hei whakarongo, kia rongo ia.
- 44
- Tenei hoki tetahi, e rite ana te rangatiratanga o te rangi ki te taonga i hunā ki te māra; a, te kitenga o tetahi tangata, na, ka hunā e ia, a haere ana, he koa hoki ki taua mea, na hokona ana āna mea katoa, a hokona ana taua māra māna.
- 45
- Tenei hoki tetahi, e rite ana te rangatiratanga o te rangi ki te kai hokohoko, e rapu ana i nga peara papai:
- 46
- A, tona kitenga i tetahi peara utu nui, haere ana hokona ana āna mea katoa, a hokona, ana taua peara māna.
- 47
- Tenei hoki tetahi, e rite ana te rangatiratanga o te rangi ki te kupenga i tukua ki te moana, a haoa ana, etahi o nga ika o ia ahua o ia ahua:
- 48
- A ka ki, ka kumea e ratou ki uta, a noho iho ana, kohikohia ana nga ika papai ki nga, kete, ko nga mea kikino ia i akiritia ki waho.
- 49
- Ka pera ano a te mutunga o te ao: ka haere atu nga anahera, ka wehewehe i te hunga kino i roto i te hunga tika,
- 50
- A ka maka i a ratou ki roto ki te oumu ahi: ko te wahi tera o te tangihanga o te teteatanga o nga niho.
- 51
- Ka mea mai a Ihu ki a ratou, Kua mātau ranei koutou ki enei mea katoa? Ka mea ratou ki a ia, Ae, e te Ariki.
- 52
- Na, ko tana meatanga mai ki a ratou, Koia nga Karaipi katoa, i akona ki te rangatiratanga o te rangi, i rite ai ki tetahi rangatira whare e whakaputa mai ana i nga mea hou, i nga mea tawhito, i roto i tana toa.
- 53
- A ka mutu enei kupu whakarite a Ihu, ka haere atu ia i reira.
- 54
- A ka tae ki tona kāinga tupu, ka ako ia i a ratou i roto i to ratou whare karakia, a miharo noa ratou, ka mea, No hea enei whakaaro nui me nga merekara a tenei tangata?
- 55
- Ehara ianei tenei i te tama a te kamura? He teka ianei ko Meri te ingoa o tona whaea? A ko Hemi, ratou ko Hohi, ko Haimona, ko Hura, ona teina?
- 56
- Me ona tuāhine hoki, kahore ianei ratou katoa i a tatou nei? Nohea ra enei mea, katoa a tenei tangata?
- 57
- Heoi ka hē ratou ki a ia. Otira ka mea a Ihu ki a ratou, Kei tona, kāinga kei tona whare anake te poropiti hapa ai i te honore.
- 58
- A kihai i maha nga merekara i meatia e ia ki reira, i to ratou whakapono-kore hoki.
Address: 
Phone: 
Email: