- 1
- Na, ka haere mai ki a Ihu etahi Karaipi me etahi Parihi o Hiruharama, ka mea.
- 2
- He aha āu akonga ka takahi ai i te whakarerenga, iho a nga kaumatua? Kahore hoki ratou e horoi i o ratou ringaringa ina kai taro.
- 3
- Na, ka whakahokia e ia, ka mea ki a ratou, Na te aha hoki i waiho ai e koutou ta koutou whakarerenga iho hei takahi mo ta te Atua kupu ako?
- 4
- I ki hoki te Atua, i mea, Whakahonoretia tou pāpā me tou whaea: a, ki te kohukohua e tetahi tona pāpā, whaea ranei, kia mate ia mate rawa.
- 5
- Ko koutou ia hei mea, Ki te mea tetahi ki tona pāpā ki tona whaea ranei, Taku mea hei atawhainga mou kua whakaherea;
- 6
- Na, kaua ia e whakahonore i tona pāpā i tona whaea. Heoi waiho ana e koutou ta koutou whakarerenga iho hei whakakahore i te kupu ako a te Atua.
- 7
- E te hunga tinihanga, tika rawa ta Ihaia i poropiti ai mo koutou, i mea ai,
- 8
- Te iwi nei, ko o ratou mangai hei awhi mai ki ahau, ko nga ngutu hei whakahonore moku; matara noa atu ia i a au o ratou ngakau.
- 9
- Maumau karakia noa ratou ki a au, ko ta ratou nei hoki e whakaako ai ko nga whakahaunga a te tangata.
- 10
- A karangatia ana e ia te mano, ka mea ki a ratou, Kia rongo, kia mātau:
- 11
- E kore te tangata e poke i te mea e tapoko ana ki te mangai; engari te mea e puta mai ana i roto i te mangai, ma tena e poke ai te tangata.
- 12
- Me i reira ka haere mai ana akonga, ka mea ki a ia, E mohio ana ranei koe i hē nga Parihi i to ratou rongonga ai i taua kupu?
- 13
- Na, ka whakahokia mai e ia, a ka mea, Ka hutia nga mahuri katoa kihai i whakatokia e toku Matua i te rangi.
- 14
- Waiho atu ratou: he matapo ratou e arahi ana i te matopo. A ki te arahina te matapo e te matapo, ka taka tokorua tokorua ki te waikeri.
- 15
- Ka whakahokia atu e Pita, a ka mea ki a ia, Whakaaturia mai ki a matou tenei kupu whakarite.
- 16
- A ka mea mai a Ihu, E kuare ana ano ranei koutou?
- 17
- Kiano koutou i mātau noa, ko nga mea katoa e tapoko atu ana ki te mangai ka riro ki roto ki te kopu, a e akiritia ana ki te poka?
- 18
- Tena ko nga mea e puta mai ana i te mangai e haere ake ana i te ngakau; a ma ena e poke ai te tangata.
- 19
- No roto hoki no te ngakau te putanga ake o nga whakaaro kino, o nga kohuru, o nga puremu, o nga moe puku, o nga tahae, o nga whakapae teka, o nga kohukohunga:
- 20
- Ko nga mea enei e noa ai te tangata: tena ko te kai me nga ringaringa kihai i horoia, e kore te tangata e noa i tena.
- 21
- A ka haere atu a Ihu i reira, ka anga atu ki nga wahi o Taira o Hairona.
- 22
- Na, ko te haerenga mai i aua wahi o tetahi wahine, he Kanaani, ka karanga ki a ia, ka mea, E te Ariki, e te Tama a Rawiri, kia aroha mai ki a au; ko taku tamahine e ngaua kinotia ana e te rewera.
- 23
- A kahore ana kupu i whakahoki atu ai ki a ia. Na, ka haere mai ana akonga, ka ki atu ki a ia, ka mea, Tonoa kia haere; e karanga mai ana hoki i muri i a tatou.
- 24
- Otira whakahokia mai e ia, a ka mea, Heoi nga mea i tonoa mai ai ahau ko nga hipi ngaro o te whare o Iharaira.
- 25
- A ka haere mai tera, ka koropiko ki a ia, ka mea, E te Ariki, kia puta tou whakaaro ki a au.
- 26
- Na, ka whakahokia atu e ia, a ka mea, Ehara i te tika kia tangohia te taro a nga tamariki, kia makā ma nga kuri.
- 27
- A ka mea tera, Ae ra, e te Ariki: ahakoa ra e kai ana nga kuri i nga kongakonga e nga horo iho ana i te tepara a o ratou rangatira.
- 28
- Katahi ka whakahokia mai e Ihu, a ka mea ki a ia, E tai, nui atu tou whakapono: waiho ano i tāu i pai ai. A ora ake tana tamahine i taua wa pu ano.
- 29
- Na, ka whakatika atu a Ihu i reira, ka haere ki te taha o te moana o Kariri: a kake ana ki te maunga, noho ana i reira.
- 30
- A he tini nga tāngata i haere mai ki a ia, i a ratou ano hoki nga kopa, nga matapo, nga wahangu, nga mutu, me te tini ke atu, a tukua iho e ratou ki nga waewae o Ihu; a whakaorangia ana ratou e ia:
- 31
- Miharo noa te mano i to ratou kitenga ai i nga wahangu e korero ana, i nga mutu e ora ana, i nga kopa e haere ana, i nga matapo e titiro ana: a whakakororiatia ana e ratou te Atua o Iharaira.
- 32
- Na, ka karangatia e Ihu ana akonga, ka mea mai, E aroha ana ahau ki nga tāngata ra, ka toru nei hoki o ratou ra e noho ana ki a au, a kahore ā ratou kai: a e kore ahau e pai kia tonoa pukutia, kei hemo ki te ara.
- 33
- Na, ko te meatanga mai a ana akonga ki a ia, Nohea ā tatou taro i te koraha, e makona ai tenei ope nui?
- 34
- Na, ka mea mai a Ihu ki a ratou, E hia ā koutou taro? Ka mea ratou, E whitu, me nga ika nonohi, torutoru nei.
- 35
- Na, ka mea ia ki te mano kia noho ki raro ki te whenua.
- 36
- A ka mau ia ki nga taro e whitu, ki nga ika, ka whakawhetai, ka whawhati, a hoatu ana e ia ki ana akonga, a na nga akonga ki te mano.
- 37
- A kai ana ratou katoa, a ka makona: a e whitu nga kete i kohia ake e ratou, kī tonu i nga whatiwhatinga i toe.
- 38
- A te hunga i kai e wha mano nga tāne, haunga nga wāhine nga tamariki.
- 39
- A ka oti te mano te tono atu e ia, ka eke ia ki te kaipuke; na kua u ki nga wahi o Makarara.
Address: 
Phone: 
Email: