- 1
- Na, ka haere mai nga Parihi me nga Haruki, ka whakamātautau, ka tono kia whakakitea e ia ki a ratou tetahi tohu i te rangi.
- 2
- Na, ka whakahokia mai e ia, a ka mea ki a ratou, Ka ahiahi, ka mea koutou, He paki; ina e whero ana te rangi.
- 3
- A i te ata, He awhā aianei; e whero ana te rangi, e tuku pu ana. E te hunga tinihanga, e mātau ana koutou ki te titiro ki te mata o te rangi; tē taea e koutou nga tohu o nga taima?
- 4
- E rapu tohu ana te whakatupuranga kino, te whakatupuranga puremu; a heoi ano nga tohu e hoatu ki a ratou ko te tohu o Hona poropiti. Na, whakarerea ana ratou e ia, a haere ana.
- 5
- A, te unga atu o ana akonga ki tera taha, kua wareware ki te mau taro atu.
- 6
- Na, ka mea a Ihu ki a ratou, Kia mahara kia tupato i te rewena a nga Parihi a nga Haruki.
- 7
- A ka korerorero ratou ki a ratou ano, ka mea, No te mea kahore tatou i mau taro mai.
- 8
- A ka mohio a Ihu, ka mea mai ki a ratou, He aha koutou ka korerorero ai ki a koutou, e te hunga whakapono iti, no te mea kihai i maua mai he taro e koutou?
- 9
- Kiano koutou i mātau noa, kiano koutou i mahara ki nga taro e rima a nga mano e rima, ki te maha hoki o nga kete i riro i a koutou?
- 10
- Ki nga taro hoki e whitu a nga mano e wha, ki te maha ano hoki o nga kete i riro i a koutou?
- 11
- He aha koutou tē mātau ai, ehara i te mea mo te taro taku i korero ai ki a koutou, kia tupato i te rewena a nga Parihi a nga Haruki?
- 12
- Katahi ratou ka mātau kihai ia i mea kia tupato i te rewena o te taro, engari i te ako a nga Parihi a nga Haruki.
- 13
- Ka tae atu a Ihu ki nga wahi o Hiharia Piripai, ka ui ia ki ana akonga, ka mea, Ko wai ra ahau te Tama a te tangata ki ta na tāngata ki?
- 14
- Na, ka mea ratou, Ki ta etahi ko Hoani Kai iriiri: ki ta etahi ko Iraia; ki ta etahi, ko Heremaia, ko tetahi ranei o nga poropiti.
- 15
- Ka mea ia ki a ratou, A ki ta koutou kī ko wai ahau?
- 16
- Na, ka whakahokia atu e Haimona Pita, a ka mea, Ko te Karati koe, ko te Tama a te Atua Ora.
- 17
- Na, ka whakahokia mai e Ihu, a ka mea ki a ia, Ka koa koe, e Haimona Parahona: ehara hoki i te kikokiko, i te toto, nāna tenei i hura ki a koe, engari na toku Matua i te rangi.
- 18
- Na, ko taku kupu ano hoki tenei ki a koe, Ko koe a Pita, a ka hangā e ahau taku hahi ki runga ki tenei kamaka; e kore ano hoki e taea taua hahi e nga kuwaha o te reinga.
- 19
- A ka hoatu e ahau ki a koe nga ki o te rangatiratanga o te rangi: a ko āu e here ai i te whenua e herea ano i te rangi: ko āu hoki e wewete ai i te whenua e wetekia ano i te rangi.
- 20
- Me i reira ka whakatupato ia i ana akonga, kia kaua e korerotia e ratou ki te tangata ko Ihu ia ko te Karaiti.
- 21
- No reira ake ano i timata ai a Ihu te whakaatu ki ana akonga, kua takoto te tikanga kia haere ia ki Hiruharama, a he maha nga mamae e mamae ai ia i nga kaumatua, i nga tohunga nui, i nga Karaipi, a ka whakamatea, a i te toru o nga ra ka ara.
- 22
- Na, ka mau a Pita ki a ia, ka anga ka whakahe ki tāna, ka mea, Aue! engari te atawhai i a koe, e te Ariki! kauaka ra tenei e pa ki a koe.
- 23
- Na, ka tahuri ia, ka mea ki a Pita, Haere ki muri i a au, e Hatana: he tūtukitanga waewae koe ki ahau: kahore hoki ou ngakau ki nga mea a te Atua, engari ki a te tangata.
- 24
- Katahi a Ihu ka mea ki ana akonga, Ki te mea tetahi kia haere mai ki te whai i a au, me whakakahore e ia tāna ake, a me amo tona ripeka, ka aru ai i a au.
- 25
- Ki te whai hoki tetahi kia ora, ka mate ano ia; a ki te mate tetahi, mona i whakaaro ki a au, ka kite ano ia i te ora.
- 26
- He aha hoki te pai ki te tangata ki te riro mai i a ia te ao katoa, a ka kore he ora mona? He aha hoki ta te tangata e hoatu ai hei utu mona kia ora?
- 27
- Ta te mea hoki tenei ake ka haere mai te Tama a te tangata, ratou ko ana anahera, i runga i te kororia o tona Matua; a ko reira hoatu ai e ia ki tenei tangata ki tenei tangata te utu o tāna mahi.
- 28
- He pono taku e mea atu nei ki a koutou, Tenei ano etahi e tu nei e kore e pāngia e te mate, kia kite ra ano i te Tama a te tangata e haere mai ana i runga i tona rangatiratanga.
Address: 
Phone: 
Email: