- 1
- A ka mutu i a Ihu enei korero katoa, ka mea ia ki ana akonga,
- 2
- E mātau ana koutou kia rua ake ra ko te Kapenga, a ka tukua atu te Tama a te tangata kia ripekatia.
- 3
- Na, ka whakamine mai nga tohunga nui, nga Karaipi, me nga kaumatua o te iwi, ki te whare o te tino tohunga, ko tona ingoa nei ko Kaiapa,
- 4
- Ka whakatakoto korero ki tetahi tinihanga e mau ai a Ihu, e whakamatea ai.
- 5
- I mea hoki ratou, Kauaka i te hakari, kei ngangau te iwi.
- 6
- Na, i a Ihu i Petani, i te whare o Haimona repera,
- 7
- Ka haere mai he wahine ki a ia me tetahi pouaka kohatu kī tonu i te hinu kakara utu nui, a ringihia ana ki runga ki tona mātenga, i a ia e noho ana.
- 8
- A, te kitenga o ana akonga, ka riri, ka mea, Hei aha tenei maumau?
- 9
- He nui hoki te utu me i hokona tenei hinu kakara, na, ka hoatu ki te hunga rawa-kore.
- 10
- A i mohio a Ihu, a ka mea ki a ratou, He aha ta koutou e whakapawerawera i te wahine nei? he mahi pai hoki tana i mea nei ki a au.
- 11
- Kei a koutou tonu hoki te hunga rawa-kore i nga wa katoa; tena ko ahau e kore e noho tonu i a koutou.
- 12
- I ringihia ai hoki tenei hinu kakara ki toku tinana, he mea mo toku tanumanga.
- 13
- He pono taku e mea nei ki a koutou, Ko nga wahi o te ao katoa e kauwhautia ai tenei rongo pai, ka korerotia ano hoki ta tenei wahine i mea ai, hei whakamaharatanga ki a ia.
- 14
- Katahi ka haere tetahi o te tekau ma rua, ko Hura Ikariote te ingoa, ki nga tohunga nui,
- 15
- Ka mea, He aha ta koutou e pai ai kia homai ki a au, a maku ia e tuku atu ki a koutou? A e toru tekau hiriwa a ratou i whakarite ai ki a ia.
- 16
- A no reira ake ano ia i rapu ai i te wa pai e tukua ai ia.
- 17
- Na, i te ra tuatahi o te taro rewena-kore ka haere mai nga akonga ki a Ihu, ka mea ki a ia, Ko hea tau e pai ai kia takā e matou te Kapenga hei kai māu?
- 18
- Na, ka mea ia, Haere ki te pa ki a mea, ka mea atu ki a ia, E mea ana te Kai whakaako, Ka tata taku taima; hei a koe matou ko aku akonga mea ai i te Kapenga.
- 19
- Na, meatia ana e nga akonga ta Ihu i whakarite ai ki a ratou; a takā ana e ratou te Kapenga.
- 20
- A ka ahiahi, ka noho ia me te tekau ma rua.
- 21
- A i a ratou e kai ana, ka mea ia, He pono taku e mea nei ki a koutou, ma tetahi o koutou ahau e tuku atu.
- 22
- A pouri noa iho ratou, ka anga ka korero takitahi atu ki a ia, Ko ahau ranei, e te Ariki?
- 23
- A ka whakahokia atu e ia, ka mea, Ko te tangata e toutou tahi nei o maua ringa ki te rihi, māna ahau e tuku.
- 24
- E haere ana hoki te Tama a te tangata, e pera ana me te mea i tuhituhia mona: otiia aue te mate mo te tangata e tukua ai te Tama a te tangata! he mea pai mo taua tangata me i kaua ia e whanau.
- 25
- Katahi a Hura, tona kai tuku, ka oho mai, ka mea, E te Kai whakaako, ko ahau koia? Ano ra ko ia ki a ia, Kua korerotia mai na e koe.
- 26
- A i a ratou e kai ana, ka mau a Ihu ki te taro, a ka mutu te whakapai, ka whawhati, na, ka hoatu ki nga akonga, ka mea, Tangohia, kainga; ko toku tinana tenei.
- 27
- Na, ka mau ia ki te kapa, a ka mutu te whakawhetai, ka hoatu ki a ratou, ka mea, Inumia tetahi wahi o tenei e koutou katoa;
- 28
- Ko oku toto hoki enei, ko o te kawenata hou, e whakahekea ana mo te tini, hei murunga hara.
- 29
- Na, ko taku kupu tenei ki a koutou, E kore ahau e inu i tenei hua o te waina a mua ake nei, kia taea ra ano taua ra e inumia houtia ai e tatou i te rangatiratanga o toku Matua.
- 30
- Ano ka mutu ta ratou himene, ka haere atu ki maunga Oriwa.
- 31
- Katahi a Ihu ka mea ki a ratou, Ka hē katoa koutou ki a au i tenei po: kua oti hoki te tuhituhi, Ka patua e ahau te hepara, a ka whakamararatia nga hipi o te kahui.
- 32
- Otira muri iho i toku aranga mai, ka haere ahau ki mua i a koutou ki Kariri.
- 33
- Na, ka whakahokia mai e Pita, a ka mea ki a ia, Ahakoa hē noa te katoa ki a koe, e kore rawa ahau e hē.
- 34
- Ka mea a Ihu ki a ia, He pono taku e mea nei ki a koe, Ko tenei po ano, i te mea kahore ano i tangi noa te tikaokao, ka toru āu whakakahoretanga ki a au.
- 35
- Ka mea a Pita ki a ia, Ahakoa kua takoto te tikanga kia mate tahi taua, e kore ahau e whakakahore ki a koe. I pera ano hoki te kī a nga akonga katoa.
- 36
- Na, ka haere ratou ko Ihu ki tetahi wahi, ko tona ingoa nei ko Kehemane, a ka mea ia ki nga akonga, Hei konei koutou noho ai, kia haere ahau ki koina inoi ai.
- 37
- Na, ka mau ia ki a Pita ratou ko nga tamariki tokorua a Heperi, a ka timata te pouri, te tumatatenga.
- 38
- Na, ka mea ia ki a ratou, Karapoti pu toku wairua i te pouri, tata pu ki te mate: hei konei koutou noho ai, kia mataara tahi tatou.
- 39
- Heoi haere ana ia ki pahaki tata atu, takoto tapapa ana, ka inoi, ka mea, E toku Matua, ki te mea e ahei, kia pahemo ke atu tenei kapa i a au: otira kaua e waiho i taku e pai ai, engari i tāu.
- 40
- A ka haere mai ia ki nga akonga, rokohanga mai e moe ana, na, ka mea ia ki a Pita, Ha, ko ta koutou tenei, tē mataara tahi tatou kia kotahi haora?
- 41
- Kia mataara koutou, me te inoi, kei uru ki te whakamatautauranga. E hihiko ana te wairua, ko te kikokiko ia e ngoikore ana.
- 42
- Ka haere atu ano ia, ko te rua o ona hokinga, ka inoi, ka mea, E toku Matua, ki te kore e ahei kia pahemo ke atu tenei kapa i a au, a me inu ano e ahau, waiho ano i tau i pai ai.
- 43
- A, tona haerenga mai, na, rokohanga mai e moe ana ano ratou; i taimaha hoki o ratou kanohi.
- 44
- Na, ka waiho ano ratou e ia, a haere ana ano, ka inoi, ko te toru o nga inoinga, me te whakahua ano i taua kupu ano.
- 45
- Katahi ia ka haere mai ki ana akonga, ka mea ki a ratou, Moe tonu, takoto marie: na, ka tata te haora, a ka tukua te Tama a te tangata ki nga ringaringa o te hunga hara.
- 46
- Maranga, ka haere tatou: nana, ka tata te kai tuku i a au.
- 47
- A, i a ia ano e korero ana, na, ka tae mai a Hura, tetahi o te tekau ma rua, a he tini nga tāngata i a ia, me nga hoari me nga patu, he mea tono mai na nga tohunga nui, na nga kaumatua o te iwi.
- 48
- A kua oti tetahi tohu te whakarite ki a ratou e tona kai tuku, i mea ia, Na, taku tangata e kihi ai, koia tena: hopukia.
- 49
- Na, tika tonu atu ia ki a Ihu, ka mea atu, Tena koe, e te Kai whakaako; a kihi ana i a ia.
- 50
- Na, ko te meatanga atu a Ihu ki a ia, E hoa, i haere mai koe ki te aha? Me i reira ka haere mai ratou, ka pa o ratou ringaringa ki a Ihu, a hopukia ana ia.
- 51
- Na, ka totoro te ringaringa o tetahi o nga hoa o Ihu, a unuhia ana tana hoari, na, hāua iho te pononga o te tino tohunga, tapahia ana tona taringa.
- 52
- Katahi ka mea a Ihu ki a ia, Whakahokia iho to hoari ki tona pukoro: ka mate hoki i te hoari te hunga hapai hoari.
- 53
- E hua koe e kore e ahei i a au aianei te inoi ki toku Matua, a maha atu i nga rihiona anahera kotahi tekau ma rua āna e homai ai ki a au?
- 54
- Nei ra, ma te aha ka rite ai ta nga Karaipiture, ara, ko tenei kia meatia?
- 55
- I taua wa ano ka mea a Ihu ki nga mano, He tahae ahau i haere mai ai koutou me nga hoari me nga patu ki te hopu i a au? i a koutou ahau e noho ana i te temepara, e ako ana i tena ra i tena ra, a kihai koutou i hopu i a au.
- 56
- Na, i meatia katoatia tenei hei whakaritenga mo nga Karaipiture a nga poropiti. Na, ka whakarere nga akonga katoa i a ia, a oma ana.
- 57
- Katahi ka kawea a Ihu e nga kai hopu ki a Kaiapa, ki te tino tohunga, kei reira hoki nga Karaipi me nga kaumatua e huihui ana.
- 58
- A i aru mai a Pita i a ia i tawhiti ki te whare o te tino tohunga, a tomo ana ki roto, noho tahi ana me nga kai mahi, kia kite i te mutunga.
- 59
- Na, ka rapu nga tohunga nui, me nga kaumatua, me te runanga katoa, ki te whakapae teka mo Ihu, kia whakamate ai ratou i a ia:
- 60
- Heoi kihai i kitea: he tokomaha hoki nga kai whakapae teka i haere mai, a kihai i kitea. Muri iho ka puta mai nga kai whakapae teka tokorua,
- 61
- A ka mea, I mea ia, E taea e ahau te whakahoro te whare tapu o te Atua, a kia toru nga ra ka oti i a au te hanga.
- 62
- Na, ka whakatika te tino tohunga, ka mea ki a ia, Kahore āu kupu? he aha ta enei e whakaatu mai nei mou?
- 63
- Heoi kihai a Ihu i kuihi. No ka ki mai ano te tino tohunga, ka mea ki a ia, Ko te Atua ora taku whakaoati mou, na, korero mai ki a matou, ko koe ranei a te Karaiti te Tama a te Atua?
- 64
- Ka mea atu a Ihu ki a ia, Kua korerotia mai na e koe: tenei ano hoki taku kupu ki a koutou, Tenei ake ka kite koutou i te Tama a te tangata e noho ana i te taha ki matau o te kaha, e haere mai ana i runga i nga kapua o te rangi.
- 65
- Katahi ka haehae te tino tohunga i ona kakahu, ka mea, Kua kohukohu; hei aha atu ma tatou nga kai whakaatu? Na, kua rongo nei koutou i tana kohukohu.
- 66
- E pehea ana a koutou whakaaro? Na, ka whakahokia mai e ratou, ka mea, Ka tika kia mate.
- 67
- Na, ka tuwhaina tona mata e ratou, ka kurua ia; a ko etahi i papaki i a ia,
- 68
- I mea, Poropiti mai ki a matou, e te Karaiti, Na wai koe i papaki?
- 69
- Na, i waho a Pita e noho ana, i te marae: a ka haere mai tetahi kotiro ki a ia, ka mea, Ko koe hoki i a Ihu o Kariri.
- 70
- Otira ka whakakahore ia i te aroaro o ratou katoa, ka mea, Kahore ahau e mohio ki tāu e ki mai na.
- 71
- A ka riro atu ia ki waho ki te whakamahau, ka kite ano tetahi atu kotiro i a ia, a mea ana ki te hunga i reira, I a Ihu o Nahareta ano hoki tenei.
- 72
- A, ka whakakahore ano ia, me te oati ano, Kahore ahau e mohio ki tena tangata.
- 73
- A, muri tata iho ka haere mai te hunga e tu mai ana, ka mea ki a Pita, Koia ano, no ratou ano hoki koe; na tou reo hoki koe i kitea ai.
- 74
- Katahi ia ka timata te kanga, te oati, Kahore ra ahau e mohio ki tena tangata. A tangi tonu iho te tikaokao.
- 75
- Na, ka mahara a Pita ki ta Ihu kupu i mea ai ki a ia, E kore e tangi te tikaokao, ka toru āu whakakahoretanga ki a au. Na, haere atu ana ia ki waho, a nui atu tana tangi.
Address: 
Phone: 
Email: