- 1
- A, tona kitenga i te whakaminenga tāngata, ka haere ia ki runga ki te maunga: ano ka noho ia ka haere mai ana akonga ki a ia:
- 2
- Na, ka puaki tona mangai, a ka whakaako ia i a ratou, ka mea,
- 3
- Ka koa te hunga e rawa-kore ana te wairua: no ratou hoki te rangatiratanga o te rangi.
- 4
- Ka koa te hunga e tangi ana: ka whakamarietia hoki ratou.
- 5
- Ka koa te hunga ngakau māhaki: ka riro mai hoki i a ratou te whenua.
- 6
- Ka koa te hunga e hiakai ana, e hiainu ana, ki te tika: e makona hoki ratou.
- 7
- Ka koa te hunga tohu tangata: e tohungia hoki ratou.
- 8
- Ka koa te hunga ngakau ma: e kite hoki ratou i te Atua.
- 9
- Ka koa te hunga hohou rongo: ka huaina hoki ratou he tamariki na te Atua.
- 10
- Ka koa te hunga e whakatoia ana mo te tika: no ratou hoki te rangatiratanga o te rangi.
- 11
- Ka koa koutou ina tawai ratou i a koutou, ina whakatoi, ina puaki i a ratou nga kupu kino katoa mo koutou, he mea teka, he whakaaro ki a au.
- 12
- Kia hari, kia whakamanamana: e rahi ana hoki te utu mo koutou i te rangi: he penei hoki ta ratou whakatoinga i nga poropiti i mua i a koutou.
- 13
- Ko koutou te tote o te whenua: otira ki te hemo te ha o te tote, ma te aha e whai tikanga tote ai? heoi ano tona painga, na, ka akiritia ki waho, ka takahia e nga tāngata.
- 14
- Ko koutou te whakamārama o te ao. E kore e ngaro te pa e tu ana i runga i te maunga.
- 15
- E kore ano hoki e tahuna te rama, a e whakaturia ki raro o te mehua, engari ki runga ki te turanga; a ka tiaho ki nga tāngata katoa i roto i te whare.
- 16
- Kia tiaho raia to koutou māramatanga ki te aroaro o nga tāngata, kia kite ai ratou i ā koutou hanga pai, kia whakakororia ai hoki i to koutou Matua i te rangi.
- 17
- Kei mea koutou i haere mai ahau ki te whakakahore i te ture i nga poropiti ranei: kihai ahau i haere mai ki te whakakahore, engari ki te whakatutuki.
- 18
- He pono nei hoki taku e mea atu nei ki a koutou, E kore tetahi tongi tetahi tohu ranei o te ture e pahemo, a, te pahemotanga ra ano o te rangi me te whenua, engari kia rite katoa ra ano.
- 19
- Na, ki te whakakahore tetahi i tetahi mea iti rawa o enei kupu ako, a ka akona e ia nga tāngata kia pera, ka kiia ia ko te iti rawa i te rangatiratanga o te rangi: a ki te whakaritea e tetahi, ki te whakaakona, ka kiia ia he nui i te rangatiratanga o te rangi.
- 20
- Ko taku kupu hoki tenei ki a koutou, Ki te kore e nui ake ta koutou mahi tika i ta nga Karaipi ratou ko nga Parihi, e kore rawa koutou e tapoko atu ki te rangatiratanga o te rangi.
- 21
- Kua rongo koutou, i korerotia e nga tupuna, Kaua e patu tangata; a ki te patu tangata tetahi, ka tika te whakawakanga mona:
- 22
- Na, ko taku kupu tenei ki a koutou, Ki te riri noa tetahi ki tona teina, ka tau te he ki a ia: a ki te mea tetahi ki tona teina, Wairangi! ka tika kia komititia ki te mea tetahi, Poauau! ka tika mona te kapura o te reinga.
- 23
- Na reira ki te mauria atu e koe to whakahere ki te āta, a ka mahara i reira i hara koe ki tou hoa;
- 24
- Waiho to whakahere i reira i mua o te āta, a haere, mātua houhia te rongo ki tou teina, ka haere mai ai, ka mau mai i to whakahere.
- 25
- Kia hohoro te whakarite i ta korua korero ko tou hoa tauwhāinga, i a korua ano i te huarahi, kei tukua koe e te hoa tauwhāinga ki te kai whakawa, a ka tukua e te kai whakawa ki te katipa, a ka makā, koe ki te whare herehere.
- 26
- He pono taku e mea atu nei ki a koe, E kore rawa koe e puta mai i reira, kia utua mai ra ano te patene whakamutunga.
- 27
- Kua rongo koutou, i korerotia e nga tupuna, Kaua koe e puremu:
- 28
- Na, ko taku kupu tenei ki a koutou, Ki te titiro atu tetahi ki te wahine, he hiahia atu ki a ia, kua puremu ke ki a ia i roto i tona ngakau.
- 29
- Ki te hē koe i tou kanohi matau, hikarohia, makā atu: he nui ke hoki te pai ki a koe ki te mate tetahi wahi ou, a ka kore e makā tou tinana katoa ki roto ki te reinga.
- 30
- Ki te hē ano hoki koe i tou ringa matau, poutoa, makā atu: he nui ke hoki te pai ki a koe ki te mate tetahi wahi ou, a ka kore e makā tou tinana katoa ki roto ki te reinga.
- 31
- I korerotia ano hoki, Ki te whakarere tetahi i tana wahine, me hoatu ki a ia tetahi pukapuka whakarere:
- 32
- Na, ko taku kupu tenei ki a koutou, Ki te whakarere tetahi i tana wahine, a ehara i te take puremu, e mea ana ia i te wahine kia puremu: a ki te marena tetahi i te wahine i whakarērea, e puremu ana ia.
- 33
- Kua rongo ano hoki koutou, i korerotia e nga tupuna, Kaua koe e oati teka, engari me whakamana āu oati ki te Ariki:
- 34
- Na, ko taku kupu tenei ki a koutou, Kaua rawa tetahi mea e oatitia; kaua te rangi, ko to te Atua torona hoki ia:
- 35
- Kaua hoki te whenua; no te mea nona tera turanga waewae: kaua hoki a Hiruharama; no te mea ko te pa ia o te Kingi nui.
- 36
- Kaua ano hoki e oatitia tou mātenga, e kore hoki e ahei i a koe te mea kia ma tetahi makawe, kia mangu ranei.
- 37
- Erangi ko tenei hei kupu ma koutou, Ae, ae; Kahore, kahore: no te mea ki te maha atu i ena, no te kino.
- 38
- Kua rongo koutou i korerotia, He kanohi mo te kanohi, he niho mo te niho:
- 39
- Na, ko taku kupu tenei ki a koutou, Kaua e whakauaua atu ki te kino: erangi ki te pakia tou paparinga matau e tetahi, tahuri atu hoki tera ki a ia.
- 40
- A ki te mea tetahi kia whakawakia koe, a kia tangohia tou koti, tukua atu hoki tou ngeri ki a ia.
- 41
- A ki te tonoa koe e tetahi kia haere ko tahi ano te maero, kia rua āu e haere tahi ai me ia.
- 42
- Hoatu ki te tangata e tono mea ana i a koe, kaua ano e whakahokia atu te tangata e mea ana ki te taonga tarewa i a koe.
- 43
- Kua rongo koutou i korerotia, Kia aroha atu koe ki tou hoa tata, kia kino hoki ki tou hoa whawhai:
- 44
- Na, ko taku kupu tenei ki a koutou, Arohaina atu o koutou hoa whawhai, manaakitia te hunga e kanga ana i a koutou, kia pai te mahi ki te hunga e kino ana ki a koutou, a inoi atu mo te hunga e whakawhiu ana i a koutou, e whakatoi ana i a koutou.
- 45
- Kia whakatupu tamariki ai koutou ki to koutou Matua i te rangi: e mea nei hoki ia i tona ra kia whiti ki runga ki te hunga kino ki te hunga pai, kia ua hoki te ua ki runga ki te hunga tika ki te hunga he.
- 46
- Ki te aroha atu hoki koutou ki te hunga e aroha mai ana ki a koutou, he aha te utu e riro mai i a koutou? e kore ianei hoki nga pupirikana e pena?
- 47
- A ki te oha atu koutou ki o koutou teina anake, nohea te nui o ta koutou mahi? e kore ianei hoki e pena nga pupirikana?
- 48
- Na, kia tika koutou, kia pera me to koutou Matua i te rangi e tika ana.
Address: 
Phone: 
Email: