- 1
- Kaua e whakahe, kei whakahekia koutou.
- 2
- Na, ko to whakahenga e whakahe ai koutou, hei whakahenga ano tena mo koutou: a ko te mehua e mehua ai koutou, hei mehua mai ano tena ki a koutou.
- 3
- He aha hoki tau e titiro ki te otaota i roto i te kanohi o tou teina, tē mahara ki te kurupae i roto i tou kanohi?
- 4
- Me pehea ranei to kupu ki tou teina, Iaua, kia kapea atu e ahau te otaota i tou kanohi; a he kurupae ano tena kei roto i tou kanohi?
- 5
- E te tangata tinihanga, mātua kapea mai e koe te kurupae i tou kanohi; katahi koe ka mārama ki te kape i te otaota i roto i te kanohi o tou teina.
- 6
- Kaua e hoatu te mea tapu ki nga kuri, kaua ano hoki e makā a koutou peara ki te aroaro o nga poaka, kei takatakahia, e o ratou waewae, a ka tahuri mai ka haehae i a koutou.
- 7
- Inoia, a ka hoatu ki a koutou; rapua, a ka kitea e koutou; patukia, a ka uakina ki a koutou:
- 8
- Ta te mea ka whiwhi nga tāngata katoa ina inoi; ka kite ina rapu; ka uakina hoki ki te tangata e patuki ana.
- 9
- Ko tehea tangata ranei o koutou, ki te inoi atu ki a ia tana tama ki tetahi taro, e hoatu ranei ki a ia he kohatu?
- 10
- A ki te inoia he ika, e hoata ranei ki a ia he nakahi!
- 11
- Na e mātau na koutou te hunga kino ki te hoatu mea papai ki a koutou tamariki, a, tera noa ake te homaitanga o nga mea papai e to koutou Matua i te rangi ki te hunga e inoi ana ki a ia.
- 12
- Na, nga mea katoa e pai ai koutou kia meatia e nga tāngata ki a koutou, meatia ano e koutou ki a ratou: ko ta te ture me ta nga poropiti hoki tenei.
- 13
- Tomo atu ma te kuwaha kuiti: he wharahi hoki te kuwaha, he nui noa atu te ara e tika ana ki te whakangaromanga, a he tokomaha e haere ana ra reira:
- 14
- E kuiti ana hoki te kuwaha, e kiki ana te ara e tika ana ki te ora, a he ruarua te hunga e kitea ai.
- 15
- Na, kia tupato ki nga poropiti teka e haere mai nei ki a koutou he hipi te kakahu, ko roto ia he wuruhi kai kino.
- 16
- Ma o ratou hua ka mohiotia ai ratou e koutou. E whakiia ana ranei te karepe i runga i te tataramoa, te piki ranei i runga i te tumatakuru?
- 17
- Waihoki he hua ataahua nga hua o nga rakau pai katoa; he hua kino ia nga hua o te rakau kino.
- 18
- E kore te rakau pai e ahei te hua i te hua kino, e kore ano hoki te rakau kino e hua i te hua ataahua.
- 19
- Ka tuakina nga rakau katoa e kore e hua i te hua ataahua, ka makā hoki ki te ahi.
- 20
- Ina, ma o ratou hua ka mohiotia, ai ratou e koutou.
- 21
- E kore e tomo atu ki roto ki te rangatiratanga, o te rangi nga tāngata katoa e mea mai ana ki a au, E te Ariki, e te Ariki; engari ia e mea ana i ta toku Matua i te rangi i pai ai.
- 22
- He tokomaha e mea mai ki a au i taua ra, E te Ariki, e te Ariki; kihai koia matou i poropiti i runga i tou ingoa? i pei rewera hoki i runga i tou ingoa? he tini hoki nga mahi nui i meatia e matou i runga i tou ingoa?
- 23
- Ko reira ano hoki ahau mea atu ai ki a ratou, Kahore rawa ahau i mohio ki a koutou; mawehe atu i a au, e nga kai mahi i te tutū.
- 24
- Na, nga tāngata katoa e rongo ana ki enei kupu aku, a e mahia ana e ratou, ka whakaritea e ahau ki te tangata mahara, i hanga i tona whare ki runga ki te kamaka:
- 25
- A ka ua te ua, ka puta nga waipuke, ka pupuhi nga hau, te tino akinga mai ki taua whare; kihai hoki i hinga: no te mea i hangā ki runga ki te kamaka.
- 26
- Me nga tāngata katoa hoki e rongo ana ki enei kupu aku, a kahore e mahi, ka whakaritea, ki te tangata whakaaro kore, i hanga i tona whare ki runga ki te onepu:
- 27
- Na, ka ua te ua, ka puta nga waipuke, ka pupuhi nga hau, a pa ana ki taua whare; na, kua hinga: he rahi ano hoki tona hinganga.
- 28
- Ano ka mutu enei korero a Ihu, ka miharo nga tāngata ki tana ako:
- 29
- I rite hoki tana ako i a ratou ki ta te tangata whai mana, kihai hoki i rite ta nga Karaipi.
Address: 
Phone: 
Email: