- 1
- I mea ano ahau, Whakarongo ra, e nga upoko o Hakopa, e nga ariki o te whare o Iharaira; He teka ianei ma koutou te mātauranga ki te whakarite whakawa?
- 2
- E kino ana hoki ratou ki te pai, e aroha ana ki te kino, e tihorea ana e ratou to ratou kiri i piri ki a ratou, to ratou kikokiko ano hoki i piri ki o ratou wheua;
- 3
- E kai ana i nga kikokiko o toku iwi; to ratou kiri e piri ana ki a ratou tihorea ake e ratou; o ratou wheua ano hoki wawahia ake e ratou, tapatapahi rawa, ano he mea mo te kohua, ano he kikokiko i roto i te kohua nui.
- 4
- Ko reira ratou karanga ai ki a Ihowa; heoi e kore ia e whakahoki kupu mai ki a ratou: ka hunā ano e ia tona mata ki a ratou i taua wa, ka rite ki ta ratou kino i mahia e ratou.
- 5
- Ko te kupu tenei a Ihowa mo nga poropiti e whakapohehe nei i toku iwi, e ngau nei o ratou niho, a e karanga ana, He rongo mau! a ki te kahore e hoatu he mea e tetahi ki roto ki o ratou mangai, ka anga ratou ka whawhai ki a ia.
- 6
- No reira mo koutou ko te po, kahore he whakakitenga; ka pouri ano koutou, e kore ai koutou e kite tikanga, ka to ano hoki te ra ki nga poropiti, ka pouri ano hoki te ra ki a ratou.
- 7
- Ka whakama ano nga matakite, nga tohunga tuahu numinumi kau ana: ka araia ano o ratou ngutu e ratou katoa; no te mea kihai he kupu i whakahokia mai e te Atua.
- 8
- Otiia, pono tonu, kua ki ahau i te kaha, he mea na te wairua o Ihowa, i te whakarite whakawa ano hoki, i te mana, he mea kia whakaaturia ai e ahau tona pokanga ketanga ki a Hakopa, tona hara ki a Iharaira.
- 9
- Tena ra, whakarongo ki tenei, e nga upoko o te whare o Hakopa, e nga ariki o te whare o Iharaira, e whakarihariha nei ki te whakarite whakawa, a te tika whakapeaua ketia katoatia e ratou.
- 10
- E hangā ana a Hiona e ratou ki te toto, a Hiruharama ano hoki ki te he.
- 11
- Ona upoko, na te utu whakapati ta ratou whakarite whakawa, he whakaaro ki te utu i whakaako ai ona tohunga, ona poropiti na te hiriwa a ratou tikanga i kite ai; kei te whakawhirinaki ia ratou ki a Ihowa, e mea ana, He teka ianei kei roto a Ihowa i a tatou? e kore tetahi he e pa ki a tatou.
- 12
- Mo reira ka parautia a Hiona, ano he māra, he whakaaro hoki ki a koutou, ka waiho ano hoki a Hiruharama hei puranga, ka rite ano hoki te maunga o te whare ki nga wahi tiketike o te ngahere.
Address: 
Phone: 
Email: