- 1
- Aue te mate mo te hunga e whakaaroa ana e ratou te he, a e mahi ana i te kino i runga i o ratou moenga! ka takiri te ata ka oti i a ratou, no te mea kua whai kaha o ratou ringa hei meatanga.
- 2
- E hiahia ana ano ratou ki nga māra, tangohia tonutia ake e ratou; ki nga whare ano hoki, riro tonu atu i a ratou: na, whakatupuria kinotia ana e ratou te tangata me tona whare, te tangata me tona wahi tupu,
- 3
- No reira tenei kupu a Ihowa, Tenei au te whakaaro nei i te kino mo tenei hapu, e kore ano o koutou kaki e neke mai i roto i taua kino; e kore ano koutou e haere whakapehapeha: he kino hoki tenei wa.
- 4
- I taua rangi ka ara ake i tetahi he whakatauki mo koutou, he nui noa atu ano hoki te tangi e tangi ai, ka mea ia, Kua pahuatia rawatia tatou: kua puta ke i a ia te wahi a toku iwi. Taukiri e, kua whakanekehia atu e ia i a au! tahuri atu ana ia, wehea ana e ia a tatou māra.
- 5
- Mo reira kahore he tangata māu hei maka i ta te rota taura i roto i te whakaminenga a Ihowa.
- 6
- Ta ratou kupu, Kaua e poropiti. Ka poropiti ano ratou. E kore e poropiti ki era: e kore te whakama e riro.
- 7
- E koe e karangatia nei, Ko te whare o Hakopa, kua iti ranei ta te wairua o Ihowa? ko ana mahi ianei enei? he teka ianei he pai te otinga o aku kupu ki te tangata e tika ana te haere?
- 8
- No enei ra nei ano te whakatikanga ake o toku iwi hei hoa riri: e huia ana e koutou te koroka me te kakahu o te hunga e haere wehi-kore noa atu ana, e ngakau-kore ana ki te whawhai.
- 9
- Kua oti nga wahine a toku iwi te pei e koutou i roto i o ratou whare ahuareka; kua tangohia e koutou toku kororia i ā ratou tamariki, a ake ake ake.
- 10
- Whakatika, haere; ehara hoki tenei i te okiokinga; kua poke nei hoki; he kino whakaharahara te whakangaromanga e whakangaromia ai koutou.
- 11
- Na, he tangata e haere ana i runga i te wairua teka, a, ka korero teka, ka mea, Ka poropititia e ahau he waina ki a koe, he wai kaha; ko ia te poropiti mo tenei iwi.
- 12
- Takoto rawa taku tikanga kohikohi i a koe katoa, e Hakopa; takoto rawa taku tikanga mo te whakaramemene i nga morehu o Iharaira; ka huihuia mai ratou e ahau, ka peratia me nga hipi o Potora, me te kahui ano i waenganui o to ratou taiepa: ka nui to ratou nge, i te tini hoki o te tangata.
- 13
- Kua tae ake te rorea i to ratou aroaro: kua pakaru mai ratou, kua tika i roto i te kuwaha, kua pahemo atu: ka tika ano hoki to ratou kingi i to ratou aroaro, a Ihowa ano hoki i to ratou upoko.
Address: 
Phone: 
Email: