- 1
- Te kupu a Ihowa i puta mai ki a Mika Morahati i nga ra o enei kingi o Hura, o Iotama, o Ahata, o Hetekia, tana i kite ai mo Hamaria raua ko Hiruharama.
- 2
- Whakarongo, e nga iwi katoa, kia whai taringa mai, e te whenua, me ona tini mea, ko te Ariki ano hoki ko Ihowa hei whakaatu i to koutou he, ko te Ariki ano i tona temepara tapu.
- 3
- Ko Ihowa hoki tenei te puta mai nei i tona wahi, ka heke iho ano ia, ka takahi ki runga ki nga wahi tiketike o te whenua.
- 4
- Ka rewa ano hoki nga maunga i raro i a ia, ka kohera ano hoki nga raorao ano he wakiha i mua i te ahi, ano he wai i ringitia ki te heketanga.
- 5
- Mo te he o Hakopa tenei katoa, mo nga hara ano hoki o te whare o Iharaira. He aha te he o Hakopa? he teka ianei ko Hamaria? He aha ano hoki nga wahi tiketike o Hura? he teka ianei ko Hiruharama?
- 6
- Mo reira ka meinga e ahau a Hamaria kia rite ki te puranga o te māra, ki nga whakatokanga o te māra waina; ka ringitia atu ano e ahau ona kohatu ki te raorao, ka hurahia ano e ahau ona turanga.
- 7
- Ka wawahia ona whakapakoko katoa, ka tahuna ano hoki ona utu katoa ki te ahi, ka meinga ano hoki e ahau ona whakapakoko katoa kia tu kau noa iho: no te mea he utu na te wahine puremu i amenetia ai e ia, a ka hoki atu ano ki te utu mo te wahine puremu.
- 8
- Mo reira ka tangi ahau, ka aue, nga kakahu whakarere rawa, ka haereere tahanga ahau, ka rite taku tangi ki ta nga tarakona, taku uhunga ki ta nga tamahine a te ruru.
- 9
- No te mea e kore tona mate e taea te rongoa; no te mea kua tae ki Hura; kua pa ia ki te kuwaha o toku iwi, ki Hiruharama.
- 10
- Kaua e whakaaturia ki Kata, kaua rawa e tangi, titakataka i roto i te puehu i te whare o Apara.
- 11
- Haere tonu koutou, e te wahine e noho ana i Hapiri, me te takoto kau ano tau i whakama ai, kihai te wahine e noho ana i Taanana i puta mai i te tangihanga o Pete-etere; ka riro mai i a ia he turanga mona i a koutou.
- 12
- I tatari marie hoki te wahine e noho ana i Maroto ki te pai; heoi kua heke iho he kino i a Ihowa ki te kuwaha o Hiruharama.
- 13
- Whakanohoia te muera ki te hariata, e te wahine e noho ana i Rakihi. Ko ia te timatanga o te hara o te tamahine o Hiona: kua kitea na hoki nga he o Iharaira i roto i a koe.
- 14
- Mo reira ka hoatu e koe etahi hakari ki Morehete-kata: hei korero teka nga whare o Akatipi ki nga kingi o Iharaira.
- 15
- Tenei ake ka kawea atu e ahau ki a koe he tangata māna nga taonga, e te wahine e noho ana i Mareha: ka tae atu ano ia ki Aturama ki te kororia o Iharaira.
- 16
- Moremorea to māhunga, kutikutia, he whakaaro ki o tamariki whakatarapi; kia rite te nui o to pakira ki to te ekara; kua mawehe atu hoki ratou i a koe, kua whakaraua.
Address: 
Phone: 
Email: