- 1
- Na, nui whakaharahara te he ki a Hona, mura ana tana riri.
- 2
- Te tino inoinga ki a Ihowa; i mea ia, Aue, e Ihowa, he teka ianei ko taku tenei i mea ai i a au ano i toku whenua? No reira ahau i rere wawe ai ki Tarahihi; i mohio hoki ahau he Atua atawhai koe, he tohu tangata, e aweke ana ki te riri, e nui ana te aroha, e ripeneta ana ki te kino.
- 3
- Na, tena ra, e Ihowa, kia mate ahau inaianei; he pai atu hoki i te ora te mate moku.
- 4
- Ano ra hoki ko Ihowa, He mea pai ranei kia riri koe?
- 5
- Katahi a Hona ka puta mai i roto i te pa, a noho ana i te taha ki te rawhiti o te pa; kei te hanga i tetahi tihokahoka mona ki reira, noho ana i raro i te taumarumarunga iho, kia kite ra ano ia ka ahatia ranei te pa.
- 6
- Na, kua rite i a Ihowa tetahi hue, meinga ana e ia kia eke ki runga ki a Hona, kia ai hei taumarumaru mo tona māhunga, hei whakaora mona i roto i tona mamae. Na, nui atu te koa o Hona ki te hue.
- 7
- Na, kua rite ano i te Atua he huhu i te aonga ake o te ra, a ngaua iho e tera te hue, na, kua maroke.
- 8
- Na, i te whitinga o te ra kua rite mai ano i te Atua tetahi hau kaha, he marangai, aki tonu mai te ra ki runga ki te māhunga o Hona, whakaruhiruhi noa iho, a hiahia ana ia ki te mate, i mea ano ia, He pai atu i te ora te mate moku.
- 9
- Na, ko te meatanga atu a te Atua ki a Hona, He mea pai ranei kia riri koe ki te hue? Ano ra ko ia, He mea pai ano kia riri ahau, a mate noa.
- 10
- Ano ra hoki ko Ihowa, I manawapa koe ki te hue kihai na i mahia e koe, kihai ano hoki i whakatupuria e koe, kotahi ano te po i tupu ake ai, a kotahi ano te po i kore ai,
- 11
- A kaua ianei ahau e manawapa ki a Ninewe ki taua pa nui, he tokomaha nei ona tangata i nga mano e ono tekau topu, he hunga kahore nei e mohio ki o ratou ringa matau ki o ratou ringa maui, he maha ano hoki nga kararehe?
Address: 
Phone: 
Email: