- 1
- Na, ka korero a Ihowa ki a Mohi, ka mea,
- 2
- Me unga e koe etahi tangata hei tutei mo te whenua o Kanaana, mo tera e hoatu nei e ahau ki nga tamariki a Iharaira: kia kotahi ano tangata o tenei iwi o tenei iwi o o ratou mātua e tonoa e koutou, hei te rangatira anake ratou.
- 3
- Na, ka unga a Mohi i a ratou i te koraha o Parana, ka pera ano me ta Ihowa i ki ai: he upoko katoa enei tangata no nga tamariki a Iharaira.
- 4
- Ko o ratou ingoa hoki enei; no te iwi o Reupena, ko Hamua tama a Takuru.
- 5
- No te iwi o Himeona, ko Hapata tama a Hori.
- 6
- No te iwi o Hura, ko Karepe tama a Iepune.
- 7
- No te iwi o Ihakara, ko Ikara tama a Hohepa.
- 8
- No te iwi o Eperaima, ko Ohea tama a Nunu.
- 9
- No te iwi o Peniamine, ko Parati tama a Rapu.
- 10
- No te iwi o Hepuruna ko Kariere tama a Hori.
- 11
- No te iwi o Hohepa, ara, no te iwi o Manahe, ko Kari tama a Huhi.
- 12
- No te iwi o Rana, ko Amiere tama a Kemari.
- 13
- No te iwi o Ahera, ko Heturu tama a Mikaere.
- 14
- No te iwi o Napatari, ko Nahapi tama a Wopohi.
- 15
- No te iwi o Kara, ko Keuere tama a Maki.
- 16
- Ko nga ingoa enei o nga tangata i ungā nei e Mohi hei tutei mo te whenua. A huaina iho e Mohi a Ohea te tama a Nunu ko Iehohua.
- 17
- Na, ungā ana ratou e Mohi hei tutei mo te whenua o Kanaana, a ka mea ia ki a ratou, Haere atu ki runga na konei, na te tonga, ka kake ki te maunga:
- 18
- Ka titiro ai i te whenua, he aha ranei, i te iwi ano hoki e noho ana i reira, he kaha ranei, he kaha-kore ranei, he tokoouou ranei, he nui ranei.
- 19
- He pehea hoki te whenua e nohoia ana e ratou, he pai ranei, he kino ranei, he pehea hoki nga pa e nohoia ana e ratou, he teneti ranei, he mea taiepa ranei;
- 20
- He pehea hoki te whenua, he momona ranei, he kiko-kore ranei, he rakau ranei to reira, kahore ranei. Kia maia hoki koutou, maua mai ano hoki etahi o nga hua o te whenua. Na ko tena wa ko te wa o nga karepe matamua.
- 21
- Na, ko to ratou haerenga ki runga, a tuteia ana e ratou te whenua i te koraha o Tini, a tae noa ki Rehopo, ki te haerenga atu ki Hamata.
- 22
- I haere atu hoki ratou na te tonga, a ka tae ki Heperona, i reira ano hoki a Ahimana, a Hehai, a Taramai, nga tamariki a Anaka. (Na, te hanganga o Heperona, e whitu nga tau i mua i to Toana i Ihipa.)
- 23
- A, to ratou taenga ki te manga wai ki Ehekora, na tapahia iho ana i reira he manga karepe, kotahi tona tautau, a amohia mai ana e te tokorua i runga i te amo, me etahi pamekaranete, me etahi piki.
- 24
- A huaina iho taua wahi ko te manga wai o Ehekora, no te tautau karepe i tapahia iho e nga tamariki a Iharaira i reira.
- 25
- A i hoki mai ratou i te tutei i te whenua i te mutunga o nga ra e wha tekau.
- 26
- Na, ka haere mai ratou, a ka tae mai ki a Mohi, ratou ko Arona, ko te whakaminenga katoa o nga tamariki a Iharaira, ki te koraha o Parana, ki Karehe; ki te whakahoki mai i te korero ki a ratou ko te whakaminenga katoa, a whakakitea mai ana e ratou nga hua o te whenua ki a ratou.
- 27
- A ka korero mai ki a ia, ka mea, I tae matou ki te whenua i ungā nei matou e koe, a he pono e rerengia ana e te waiu me te honi; ko ona hua hoki tenei.
- 28
- Otiia e kaha ana ano te iwi e noho ana i taua whenua, e whai taiepa ana hoki nga pa, e nui rawa ana: i kite ano hoki matou i nga tamariki a Anaka ki reira.
- 29
- E noho ana nga Amareki i te whenua ki te tonga: ko nga Hiti hoki, ratou ko nga Iepuhi, ko nga Amori, e noho ana ratou i nga maunga: kei te taha hoki o te moana nga Kanaani e noho ana, kei te taha hoki o Horano.
- 30
- Na, ka whakamarietia te iwi e Karepe i te aroaro o Mohi, a ka mea ia, Kia hohoro ta tatou haere, ki te tango i reira; e taea hoki a reira e tatou.
- 31
- Ko nga tangata ia i haere tahi me ia ki runga, i mea, E kore e ahei i a tatou te haere ki runga ki taua iwi; e kaha ana hoki ratou i a tatou.
- 32
- Na, ka kawea mai e ratou he korero kino mo te whenua i tuteia e ratou ki nga tamariki a Iharaira, i mea ratou, Ko taua whenua i haerea ra e matou, i tuteia, he whenua e ngau ana i nga tangata o reira; he tangata nui whakaharahara hoki nga tangata katoa i kitea e matou ki reira.
- 33
- I kitea ano hoki e matou ki reira nga tangata roroa, nga tamariki a Anaka, te uri o nga tangata roroa: a, ki ta matou whakaaro iho, i rite ano matou ki te mawhitiwhiti, i pera ano hoki matou ki ta ratou titiro mai.
Address: 
Phone: 
Email: