- 1
- Na, ka puaki nui te reo o te whakaminenga katoa, a ka tangi; a tangi tonu te iwi i taua po.
- 2
- A amuamu ana nga tamariki katoa a Iharaira ki a Mohi raua ko Arona: a ka mea te whakaminenga katoa ki a raua, Aue, me i mate tatou ki te whenua o Ihipa! aue, me i mate ranei tatou ki tenei koraha!
- 3
- Na te aha tatou i kawea mai ai e Ihowa ki tenei whenua, kia hinga i te hoari, kia waiho a tatou wahine me a tatou tamariki hei taonga pārau? ehara ianei te hoki ki Ihipa i te mea pai ma tatou?
- 4
- A ka mea ano ratou tetahi ki tetahi, Kia whakarite tatou i tetahi rangatira, a kia hoki ki Ihipa.
- 5
- Na ka hinga tapapa iho a Mohi raua ko Arona ki te aroaro o te huihui katoa o te whakaminenga o nga tamariki a Iharaira.
- 6
- A ka haehae a Hohua tama a Nunu raua ko Karepe tama a Iepune i o raua kakahu; no nga kai tutei o te whenua na hoki raua:
- 7
- A ka korero mai ki te whakaminenga katoa o nga tamariki a Iharaira, ka mea, He whenua pai whakaharahara te whenua i haerea, i tuteia e matou.
- 8
- Ki te aro mai a Ihowa ki a tatou, na, ka kawea tatou e ia ki taua whenua, ka homai ano hoki e ia ki a tatou; he whenua hoki e rerengia ana e te waiu e te honi.
- 9
- Kaua raia koutou e tutu ki a Ihowa, kaua hoki e wehi i nga tangata o taua whenua; he taro hoki ratou ma tatou: kua mahue hoki ratou i to ratou whakamarumaru, kei a tatou ano hoki a Ihowa: kaua ratou e wehingia.
- 10
- Heoi ko ta te whakaminenga katoa ki, kia akina raua ki te kohatu. Na, ko te putanga mai o te kororia o Ihowa i runga i te tapenakara o te whakaminenga ki te aroaro o nga tamariki katoa a Iharaira.
- 11
- No te meatanga mai hoki a Ihowa ki a Mohi, Kia pehea ake te roa o te whakapataritaringa a tenei iwi ki a au? ahea ranei ratou whakapono ai ki a au; he maha nei hoki aku tohu i whakakitea e ahau i roto i a ratou.
- 12
- Ka patua ratou e ahau ki te mate uruta, ka whakakahoretia, a ka meinga koe e ahau hei iwi nui atu, kaha atu, i a ratou.
- 13
- Na, ko te meatanga atu a Mohi ki a Ihowa, Akuanei, kei te rongonga o nga Ihipiana, (nau nei hoki tenei iwi i whakaputa mai i runga i tou kaha i roto i a ratou;)
- 14
- Na, ka korerotia e ratou ki nga tangata o tenei whenua: kua rongo hoki ratou kei roto koe, e Ihowa, i tenei iwi, e kitea ana ano koe e Ihowa, titiro atu titiro mai, e tu ana hoki tou kapua i runga i a ratou, a e haere ana koe i mua i a ratou i roto i te pou kapua i te awatea, i roto hoki i te pou ahi i te po.
- 15
- Na, ki te whakamatea e koe tenei iwi ano he tangata kotahi, katahi nga iwi i rongo nei ki tou rongo ka whai kupu, ka mea,
- 16
- No te mea kihai i kaha a Ihowa ki te kawe i tenei iwi ki te whenua i oati ai ia ki a ratou, koia i whakamatea ai ratou e ia ki te koraha.
- 17
- Na, kia nui ra te kaha o toku Ariki, kia rite ki tau i korero ai i mea ai,
- 18
- E puhoi ana a Ihowa ki te riri, e nui ana tana atawhai, e muru ana i te kino, i te tutu, e kore rawa ano hoki e tuku noa atu i te he, e mea ana i te kino o nga mātua kia tau iho ki nga tamariki, a, te toru, te wha ra ano, o nga whakatupuranga.
- 19
- Tena ra, murua te kino o tenei iwi, kia rite ki te nui o tou atawhai, ki tau murunga ano hoki i nga hara o tenei iwi, o Ihipa mai ano, a taea noatia a konei.
- 20
- Na, ko te meatanga mai a Ihowa, Ka murua e ahau, ka peratia me tau ki mai na:
- 21
- Otiia, e ora ana ahau, ina, ka kapi te whenua katoa i te kororia o Ihowa.
- 22
- Na, enei tangata katoa i kite nei i taku kororia, i aku merekara hoki i meinga e ahau ki Ihipa, ki te koraha, a ka tekau nei a ratou whakamatautauranga i a au, kahore ano hoki i whakarongo ki toku reo;
- 23
- Ina e kore ratou e kite i te whenua i oati ai ahau ki o ratou mātua, e kore ano tetahi o te hunga i whakapataritari nei ki a au e kite i reira:
- 24
- Engari taku pononga a Karepe, he wairua ke hoki tona, a kua tino whai ano ia i a au; e kawea ano ia e ahau ki te whenua i haere atu na ia; a ka riro mai a reira i ona uri.
- 25
- (Na, i te raorao nga Amareki me nga Kanaani e noho ana.) Tahuri atu koutou apopo, haere atu ki te koraha, na te huarahi ki te Moana Whero.
- 26
- A i korero ano a Ihowa ki a Mohi raua ko Arona, i mea,
- 27
- Kia pehea ake te roa o taku whakamanawanuitanga ki tenei whakaminenga kino, e amuamu nei ki a au? Kua rangona e ahau nga amuamunga a nga tamariki a Iharaira, e amuamu nei ratou ki a au.
- 28
- Mea atu ki a ratou, E ora ana ahau, e ai ta Ihowa, ko ta koutou i korero mai ai ki oku taringa ko taku tena e mea ai ki a koutou.
- 29
- Ka hinga o koutou tinana ki tenei koraha; nga mea katoa hoki o koutou i taua, puta noa atu i to koutou tokomahatanga, nga mea e rua tekau, he maha ake hoki, o ratou tau, te hunga hoki i amuamu nei ki a au.
- 30
- E kore rawa koutou e tae ki te whenua i oati ai ahau ka whakanohoia koutou ki reira, heoi ano ko Karepe tama a Iepune, raua ko Hohua tama a Nunu.
- 31
- Ko a koutou potiki hoki, i mea na koutou ka waiho hei taonga pārau, ka kawea atu ratou e ahau, a ka mohio ratou ki te whenua i whakahaweatia nei e koutou.
- 32
- Ko koutou ia, ko o koutou tinana, ka hinga ki tenei koraha.
- 33
- A ka kopikopiko a koutou tamariki ki te koraha, a wha noa tekau nga tau, me waha hoki e ratou a koutou puremutanga, kia poto ra rano o koutou tinana ki te koraha.
- 34
- Kia rite ra ano ki te maha o nga ra, ki nga ra e wha tekau, i tuteia ai e koutou te whenua, he tau he ra he tau he ra; e wha tekau nga tau, e wahā ai e koutou a koutou kino, a ka mohio koutou ki te takanga o taku kupu.
- 35
- Na, ko taku kupu tenei, ko ta Ihowa, ina, ka meatia tenei e ahau ki tenei whakaminenga kino katoa, kua huihui nei ki te whakahe ki a au: ka poto ratou ki tenei koraha, ka mate ano hoki ki konei.
- 36
- Na nga tangata i ungā e Mohi hei tutei mo te whenua, a i to ratou hokinga mai i mea kia amuamutia ia e te whakaminenga katoa, i te kawenga mai o te korero kino mo te whenua,
- 37
- I mate ano i te whiu ki te aroaro o Ihowa aua tangata i kawea mai ai te korero kino mo te whenua.
- 38
- Ko Hohua ia tama a Nunu raua ko Karepe tama a Iepune, ko raua i ora o nga tangata i haere ki te tutei i te whenua.
- 39
- Na, korerotia atu ana e Mohi enei kupu katoa ki nga tamariki katoa a Iharaira: a ka pouri rawa te iwi.
- 40
- Na, ka maranga wawe ratou i te ata, a ka haere ki runga ki te tihi o te maunga, ka mea, Tenei matou, a ka haere matou ki runga ki te wahi i korerotia mai e Ihowa: kua hara hoki matou.
- 41
- Na, ko te meatanga a Mohi, Na te aha ra koutou i takahi ai i te kupu a Ihowa? otiia e kore koutou e whai wahi.
- 42
- Kaua e haere ki runga, kahore na hoki a Ihowa i roto i a koutou, kei patua koutou ki te aroaro o o koutou hoa riri.
- 43
- Kei reira hoki nga Amareki ratou ko nga Kanaani, kei mua i a koutou, a ka hinga koutou i te hoari: mo koutou kua tahuri atu i te whai i a Ihowa, koia a Ihowa tē tata ai ki a koutou.
- 44
- Heoi, ka pokanoa ano ratou ki te piki atu ki te tihi o te maunga; otiia kihai te aaka o te kawenata o Ihowa, me Mohi hoki, i haere atu i te puni.
- 45
- Na, ka heke iho nga Amareki ratou ko nga Kanaani e noho ana i taua maunga, a patua ana ratou, a tukituki rawa, a taea noatia a Horema.
Address: 
Phone: 
Email: