- 1
- A i mea ano a Ihowa ki a Arona, Mau, ma o tama, ma koutou tahi ko te whare o tou papa e waha te kino o te wahi tapu: ma koutou tahi hoki ko o tama e waha te kino o ta koutou mahi tohunga.
- 2
- A ko o teina o te iwi o Riwai, o te iwi o tou papa, me whakatata tahi me koe, kia tapiritia mai ai ratou ki a koe, hei minita ki a koe: ko koutou tahi ia ko o tama ki te tapenakara o te whakaaturanga.
- 3
- A ma ratou e tiaki au mea e tiaki ai, me tiaki ano hoki te tapenakara katoa: otiia kaua ratou e whakatata mai ki nga oko o te wahi tapu, ki te aata ranei, kei mate ko ratou, ko koutou.
- 4
- A ka tapiritia mai ratou ki a koe, a me tiaki e ratou nga mea o te tapenakara o te whakaminenga, mo nga mahi katoa ratou o te tapenakara: kaua hoki te tangata ke e tata mai ki a koutou:
- 5
- Ma koutou hoki e tiaki nga mea o te wahi tapu, me nga mea o te aata; kei puta he riri ki nga tamariki a Iharaira, a muri ake nei.
- 6
- Me au hoki, nana, kua tango ahau i o koutou teina i nga Riwaiti i roto i nga tamariki a Iharaira: he ohaohatanga ratou ka hoatu nei ki a koutou ma Ihowa, hei mahi i nga mahi o te tapenakara o te whakaminenga.
- 7
- Ko koutou ia ko o tama, kia mau ki ta koutou mahi tohunga ki nga mea katoa o te aata, o roto atu ano hoki i te arai, hei mahi ma koutou: he mea hoatu noa atu ta koutou mahi tohunga e hoatu nei e ahau: a ka whakamatea te tangata ke e whakatata mai ana.
- 8
- A i korero ano a Ihowa ki a Arona, Na, kua tukua atu nei e ahau ki a koe te tiakanga o aku whakahere hapahapai o roto o nga mea tapu katoa a nga tamariki a Iharaira; ka hoatu aua mea e ahau ki a koutou ko au tama, he whakaaro hoki ki te whakawahinga. Hei tikanga tenei, a, ake ake ake.
- 9
- Ko nga mea tenei mau o nga mea tino tapu e kore nei e tukua ki te ahi: ko nga whakahere katoa a ratou, ko nga whakahere toto-kore a ratou, ko nga whakahere hara hoki a ratou, me nga whakahere katoa a ratou mo te he e whakaherea mai e ratou ki a au, ka tino tapu ena ma koutou ko o tama.
- 10
- Me kai e koutou ki te wahi tino tapu, me kai e nga tane katoa: e tapu ana tena mea mau.
- 11
- Mau ano hoki tenei; nga whakahere hapahapai e homai ana e ratou; me nga whakahere poipoi katoa a nga tamariki a Iharaira: ka hoatu aua mea e ahau ki a koe, ki a koutou tahi ko au tama ko au tamahine; hei tikanga tenei, a, ake ake ake: me kai taua mea e nga tangata poke-kore katoa o tou whare.
- 12
- Ko nga wahi pai katoa o te hinu, me nga wahi pai katoa o te waina, o te witi hoki, nga tuapora o aua mea e homai ana e ratou ki a Ihowa, kua hoatu ena e ahau ki a koe.
- 13
- Mau nga hua mataati o nga mea katoa o te whenua, e kawea mai ana e ratou ki a Ihowa; me kai e nga tangata poke-kore katoa o tou whare.
- 14
- Mau nga mea katoa i oti rawa mai i roto i a Iharaira.
- 15
- Ko nga mea katoa e orokoputa mai ana i te kopu o nga kikokiko katoa, nga mea hoki e whakaherea ana e ratou ma Ihowa, o te tangata o te kararehe, mau ena: otiia me tino whakahoki atu e koe ki te utu nga matamua a te tangata, me tango utu ano hoki koe mo nga matamua a te kararehe poke.
- 16
- A ko nga mea e utua ana e whakahokia ana ka kotahi marama o tona whanautanga, na, me tango ona utu e koe; kia rite ki tau e whakarite ai, kia rima hekere nga moni; hei nga hekere wahi tapu, e rua tekau nei nga kera.
- 17
- Ko te matamua ia a te kau, me te matamua a te hipi, me te matamua a te koati, kaua e whakahokia atu e koe; e tapu ana ena: me tauhi atu e koe o ratou toto ki te aata, me tahu ano hoki o ratou ngako hei whakahere ahi, hei kakara reka ki a Ihowa.
- 18
- A mau o ratou kikokiko, ka pera me te uma poipoinga, me te peke matau, nau hoki ena.
- 19
- Ko nga whakahere hapahapai katoa o roto o nga mea tapu e whakaherea ana e nga tamariki a Iharaira ki a Ihowa, kua hoatu e ahau ki a koe, ki au tama ki a koutou tahi ko o tamahine; hei tikanga tenei, ake ake ake: hei kawenata toto i te aroaro o Ihowa, ake ake ake, ki a koutou tahi ko ou uri.
- 20
- A i korero mai a Ihowa ki a Arona, Kahore he kāinga tupu mou i to ratou whenua, kahore ano hoki he wahi mou i roto i a ratou: ko ahau te wahi mou, me tou kāinga tupu i roto i nga tamariki a Iharaira.
- 21
- Kua hoatu nei hoki e ahau ki nga tamariki a Riwai nga whakatekau katoa i roto i a Iharaira hei taonga tupu, hei utu mo ta ratou mahi e mahi ai ratou, mo te mahinga i te tapenakara o te whakaminenga.
- 22
- Kaua ano hoki nga tamariki a Iharaira e whakatata a muri ake nei ki te tapenakara o te whakaminenga, kei whai here ratou, a ka mate.
- 23
- A ma nga Riwaiti e mahi nga mahi o te tapenakara o te whakaminenga, me waha ano hoki e ratou to ratou kino. Hei tikanga tenei ake ake ake ma o koutou whakatupuranga, kia kahore he kāinga tupu mo ratou i roto i nga tamariki a Iharaira.
- 24
- Engari nga whakatekau a nga tamariki a Iharaira, e whakaherea nei e ratou hei whakahere hapahapai ki a Ihowa, kua hoatu e ahau hei wahi tupu ki nga Riwaiti: koia ahau i mea ai ki a ratou, E kore ratou e whai kāinga tupu i roto i nga tamariki a Iharaira.
- 25
- A i korero ano a Ihowa ki a Mohi, i mea,
- 26
- Korero atu ano hoki ki nga Riwaiti, mea atu ki a ratou, Ka tangohia e koutou nga whakatekau a nga tamariki a Iharaira e hoatu nei e ahau ki a koutou i roto i a ratou mea hei wahi tupu mo koutou, na me whakahere he whakahere hapahapai e koutou ki a Ihowa i roto i taua mea,—te wahi whakatekau o aua whakatekau.
- 27
- A ka kiia tenei whakahere hapahapai he mea na koutou, he pera me te witi o te patunga witi, me te purenatanga hoki o te poka waina.
- 28
- Na, ka whakaherea ano hoki e koutou he whakahere hapahapai ki a Ihowa i roto i a koutou whakatekaunga katoa e tangohia mai ana e koutou i nga tamariki a Iharaira; a me homai e koutou te whakahere hapahapai a Ihowa i roto i taua mea ki te tohunga ki a Arona.
- 29
- Me whakahere e koutou nga whakahere hapahapai katoa ma Ihowa i roto i nga mea katoa e homai ana ki a koutou, i roto i nga mea papai katoa o tena mea, ara, tona wahi tapu i roto ano i tena mea.
- 30
- Me ki atu hoki e koe ki a ratou, Ka oti te hapahapai e koutou te wahi pai o tena mea i roto ano i tena mea, na ka kiia atu he mea na nga Riwaiti, he pera me te hua o te patunga witi, me te purenatanga hoki o te poka waina.
- 31
- A me kai taua mea ki nga wahi katoa e koutou ko o koutou whare: ko ta koutou utu hoki ia mo ta koutou mahi i te tapenakara o te whakaminenga.
- 32
- A e kore e wahā e koutou he hara i taua mea, ina hapahapainga e koutou te wahi pai o tena mea i roto ano i tena mea: kaua ano hoki e whakapokea e koutou nga mea tapu a nga tamariki a Iharaira, kei mate koutou.
Address: 
Phone: 
Email: