- 1
- A i korero a Ihowa ki a Mohi raua ko Arona, i mea,
- 2
- Ko te tikanga tenei o te ture i whakahaua mai e Ihowa; i mea mai ia, Korero atu ki nga tamariki a Iharaira kia tikina e ratou tetahi kuao kau mau, ki te uha, ki te mea whero, ki te mea kahore ona koha, kahore ano hoki i iokitia:
- 3
- A ka hoatu e koutou ki a Ereatara tohunga, a mana ia e kawe ki waho o te puni, ma tetahi hoki e patu ki tona aroaro.
- 4
- Na, ka tango a Ereatara te tohunga i tetahi wahi o ona toto ki tona maihao, ka tauhiuhi atu ai i ona toto; hei mua tonu o te tapenakara o te whakaminenga; kia whitu nga meatanga.
- 5
- Na, ka tahuna te kau i tana tirohanga atu; tona hiako, me ona kiko, me ona toto; me tahu tahi e ia me ona paru.
- 6
- Na, ka mau te tohunga ki te rakau hita, ki te hihopa, ki te mea ngangana, a ka makā e ia ki waenganui o te tahunga o te kau.
- 7
- Katahi ka horoi te tohunga i ona kakahu, ka horoi ano hoki i tona kiri ki te wai, a, muri iho ka haere ki te puni, ka poke hoki te tohunga, a ahiahi noa.
- 8
- Me te kai tahu ano hoki o taua mea, me horoi e ia ona kakahu ki te wai, me horoi ano hoki tona kiri ki te wai, ka poke hoki ia, a ahiahi noa.
- 9
- A me amene mai nga pungarehu o te kau e tetahi tangata poke-kore, a ka waiho i waho o te puni, i te wahi poke-kore, ka tiaki ai hei mea mo te whakaminenga o nga tamariki a Iharaira hei wai mo te whakamotuhaketanga hei mea horohoro tena mo te hara.
- 10
- Me horoi ano hoki ona kakahu e te kai amene i nga pungarehu o te kau, ka poke hoki ia, a ahiahi noa: me waiho ano hoki tena hei tikanga tuturu tonu iho ma nga tamariki a Iharaira, ma te manene hoki e noho manene ana i roto a ratou.
- 11
- Ki te pa tetahi ki te tinana mate o tetahi tangata, ka poke ia, a e whitu nga ra.
- 12
- Me pure ia e ia ki tana wai i te toru o nga ra, a i te whitu o nga ra ka kore ona poke: otiia ki te kore ia e pure i a ia i te toru o nga ra, e kore ia e poke-kore i te whitu o nga ra.
- 13
- Ki te pa tetahi ki te tinana mate o tetahi tangata kua mate rawa, a e kore e pure i a ia, e whakapokea ana e ia te tapenakara o Ihowa; a ka hatepea atu taua wairua i roto i a Iharaira; no te mea kihai i tauhiuhia mai ki a ia te wai o te whakamotuhaketanga, ka poke ano ia; e mau ana ano ki a ia tona poke.
- 14
- Ko te ture tenei ina mate te tangata i roto i te teneti: ko nga tangata katoa e haere mai ana ki roto ki te teneti, nga tangata katoa i roto i te teneti, ka poke ratou, a kia whitu ra ano nga ra.
- 15
- Ka poke ano hoki nga oko katoa e puare kau ana, kahore nei i herea iho te taupoki.
- 16
- Ki te pa hoki tetahi ki te tangata i patua ki te hoari ki waenga parae, ki te tupapaku ranei, ki te wheua tangata ranei, ki te urupa ranei, ka poke ia, a kia whitu nga ra.
- 17
- Na, he tangata poke, me tiki e ratou etahi o nga pungarehu o te kau i tahuna hei horohoronga mo nga hara, ka riringi ai ki te wai ora, ki roto ano ki te oko.
- 18
- Na, ka mau tetahi tangata poke-kore ki te hihopa, a ka tukua e ia ki te wai, na, ka tauhiuhia te teneti, me nga oko katoa, nga tangata ano hoki o reira, me te tangata i pa atu nei ki te wheua, ki te tangata ranei i patua, ki te tupapaku ranei, ki te urupa ranei.
- 19
- Me tauhiuhi atu ano hoki e te tangata poke-kore te tangata poke i te toru o nga ra, i te whitu hoki o nga ra; a me pure ia e ia ano i te whitu o nga ra, ka horoi ai i ona kakahu, ka horoi ano hoki i a ia ki te wai, a i te ahiahi ka kore te poke.
- 20
- A ki te poke tetahi tangata, a e kore e pure i a ia, ka hatepea atu taua wairua i roto i te huihuinga, mona i whakapoke i te wahi tapu o Ihowa: kihai te wai o te whakamotuhaketanga i tauhiuhia ki a ia; e poke ana ia.
- 21
- A hei tikanga tuturu iho tenei ma ratou, me horoi ona kakahu e te kai tauhiuhi o te wai whakamotuhaketanga; ka poke ano hoki, a ahiahi noa, te tangata e pa ana ki te wai whakamotuhaketanga.
- 22
- Ka poke ano hoki nga mea katoa e pa atu ai te tangata poke; a ka poke ano, a ahiahi noa, te wairua e pa atu ana ki taua mea.
Address: 
Phone: 
Email: