- 1
- Na, ka tae mai nga tamariki a Iharaira, te whakaminenga katoa, ki te koraha o Tini i te marama tuatahi: a ka noho te iwi ki Karehe; na, ka mate a Miriama ki reira, a tanumia ana ki reira.
- 2
- A kahore he wai mo te whakaminenga: a ka huihui mai ratou ki te ngangare ki a Mohi raua ko Arona.
- 3
- Na, ka ngangau te iwi ki a Mohi, a ka korero, ka mea, Aue, me i mate matou i te matenga o o matou tuakana i te aroaro o Ihowa!
- 4
- Na te aha hoki i kawea mai ai e korua te whakaminenga a Ihowa ki tenei koraha, kia mate tahi matou me a matou kararehe ki konei?
- 5
- Na te aha hoki matou i meinga ai e korua kia haere mai i Ihipa, kia kawea matou ki tenei wahi kino? ehara nei i te wahi purapura, i te wahi piki, waina, pamekaranete; kahore ano hoki he wai hei inu.
- 6
- Na, ka haere atu a Mohi raua ko Arona i te aroaro o te whakaminenga ki te whatitoka o te tapenakara o te whakaminenga, a ka kupapa iho o raua mata: na, ko te putanga mai o te kororia o Ihowa ki a raua.
- 7
- A ka korero mai a Ihowa ki a Mohi, ka mea,
- 8
- Maua atu te tokotoko, huihuia mai ano te whakaminenga e korua ko tou tuakana, ko Arona, ka korero ai korua ki te kamaka i ta ratou tirohanga mai; a ka tukua mai tona wai, a ka whakaputaina mai e koe he wai mo ratou i roto i te kamaka: ka meinga ano hoki e koe te whakaminenga me a ratou kararehe kia inu.
- 9
- Na, ka maua atu e Mohi te tokotoko i te aroaro o Ihowa, pera ana ia me tana i whakahau ai.
- 10
- I huihuia mai hoki te whakaminenga e Mohi raua ko Arona ki mua atu o te kamaka, a ka mea ia ki a ratou, Whakarongo mai ra, e te hunga tutu; me whakaputa mai ano ranei e maua he wai mo koutou i roto i tenei kamaka?
- 11
- Na, ka ara te ringa o Mohi, a patua ana e ia te kamaka ki tona tokotoko, e rua nga meatanga; te tino putanga mai o te wai, tona nui, a inu ana te iwi me a ratou kararehe.
- 12
- Na, ko te meatanga mai a Ihowa ki a Mohi raua ko Arona, Na, kahore nei korua i whakapono ki a au, i whakatapu i a au i te tirohanga mai a nga tamariki a Iharaira, mo reira e kore korua e kawe i tenei whakaminenga ki te whenua e hoatu nei e ahau ki a ratou.
- 13
- Ko te wai tena o Meripa, i ngangau hoki nga tamariki a Iharaira ki a Ihowa ki reira, a meinga ana ratou hei whakatapu mona.
- 14
- Na, ka unga tangata atu a Mohi i Karehe ki te kingi o Eroma, Ko te kupu tenei a to teina a Iharaira, E mohio ana koe ki nga he katoa i pono mai ki a matou;
- 15
- Ki te hekenga atu o o matou mātua ki Ihipa, ki to matou nohoanga hoki i Ihipa, a, maha noa nga ra; a ka tukino mai nga Ihipiana i a matou ko o matou mātua:
- 16
- A, ta matou karangatanga atu ki a Ihowa, na, ka rongo mai ia ki to matou reo, a ungā mai ana e ia he anahera hei whakaputa mai i a matou i Ihipa: na, kei Karehe tenei matou, kei te pa whakamutunga o tau rohe:
- 17
- Tena, kia tika matou na tou whenua: e kore matou e haere na nga mara, na nga mara waina ranei, e kore ano hoki matou e inu i te wai o nga puna: ka haere matou i te huanui o te kingi, e kore matou e peka ki matau ki maui, kia pahemo ra ano i a matou au rohe.
- 18
- Na, ko te meatanga mai a Eroma ki a ia, E kore koe e tika na toku wahi, kei haere atu ahau me te hoari ki te tu i a koe.
- 19
- Na, ko te meatanga a nga tamariki a Iharaira ki a ia, Ka haere matou na te huanui: a ki te inu ahau me aku kahui i tou wai, me utu e ahau: heoi rawa taku e mea ai, ko te haere kau a oku waewae.
- 20
- Na, ka mea mai ia, E kore koe e tukua kia haere. A i puta mai ano a Eroma me te ope nui, me te ringa kaha, ki te tu i a ia.
- 21
- A i te korenga o Eroma e pai ki te tuku i a Iharaira kia haere na tana rohe, na ka peka ke atu a Iharaira i a ia.
- 22
- Na, ka turia atu e nga tamariki a Iharaira, e te whakaminenga katoa, i Karehe, a ka tae mai ki Maunga Horo.
- 23
- Na, ka korero mai a Ihowa ki a Mohi raua ko Arona i Maunga Horo i te rohe o te whenua o Eroma, ka mea,
- 24
- Ka kohia atu a Arona ki tona iwi; e kore hoki ia e tae ki te whenua ka hoatu nei e ahau ki nga tamariki a Iharaira, mo korua i whakatoi ki taku kupu i te wai o Meripa.
- 25
- Tangohia a Arona raua ko Ereatara ko tana tama, kawea atu hoki raua ki runga ki Maunga Horo:
- 26
- Unuhia hoki nga kakahu o Arona, ka whakakakahu atu ai ki tana tamaiti ki a Ereatara: a ka kohia atu a Arona ki tona iwi, ka mate hoki ki reira.
- 27
- Na, ka pera ano a Mohi me ta Ihowa i whakahau ai, a haere ana ratou ki runga ki Maunga Horo i te tirohanga a te whakaminenga katoa.
- 28
- Na, ka unuhia e Mohi nga kakahu o Arona, a whakakakahuria atu ana e ia ki tana tamaiti ki a Ereatara; a ka mate a Arona ki reira ki te tihi o te maunga: a ka heke iho a Mohi raua ko Ereatara i runga i te maunga.
- 29
- A, te kitenga o te whakaminenga katoa kua mate a Arona, na, e toru tekau nga ra i tangihia ai a Arona e ratou, e te whare katoa o Iharaira.
Address: 
Phone: 
Email: