- 1
- A, te rongonga o kingi Arara o te Kanaani, i noho nei ki te taha ki te tonga, e haere atu ana a Iharaira na te ara a nga tutei; na, ka tatau ia ki a Iharaira, a whakarautia ana etahi o ratou e ia hei whakarau.
- 2
- Na, ka puaki te kupu taurangi a Iharaira ki a Ihowa, a ka mea, Ki te tukua rawatia mai e koe tenei iwi ki toku ringa ka whakangaromia rawatia e ahau o ratou pa.
- 3
- A i whakarongo mai a Ihowa ki te reo o Iharaira, a homai ana e ia nga Kanaani; a whakangaromia ana ratou me o ratou pa e ratou: a huaina iho e ia te ingoa o taua wahi ko Horema.
- 4
- Na, ka turia atu e ratou i Maunga Horo na te ara o te Moana Whero ki te taiawhio i te whenua o Eroma: a pouri noa iho te wairua o te iwi i te ara.
- 5
- A ka korero whakahe te iwi mo te Atua, mo Mohi hoki, Na te aha i kawea mai ai matou ki runga nei i Ihipa kia mate ki te koraha? kahore nei hoki he taro, kahore he wai; a e whakarihariha ana to matou wairua ki tenei taro mama.
- 6
- Na, ka tukua mai e Ihowa he nakahi tuaahi ki roto ki te iwi, a ka ngaua te iwi e aua mea; a he tokomaha nga tangata o Iharaira i mate.
- 7
- Na, ka haere mai te iwi ki a Mohi, a ka mea, Kua hara matou i a matou i korero whakahe mo Ihowa, mou hoki; inoi atu ki a Ihowa kia tangohia atu e ia nga nakahi i a matou. Na, ka inoi a Mohi mo te iwi.
- 8
- Na, ko te meatanga mai a Ihowa ki a Mohi, Hangā tetahi nakahi tuaahi mau, ka whakanoho ai ki runga ki te pou: a ki te mea kua ngaua tetahi, a ka titiro atu ki taua mea, na, ka ora.
- 9
- Na, hangā ana e Mohi te nakahi ki te parahi, a whakanohoia ana e ia ki runga ki te pou, a ngaua rawatia ake tetahi e te nakahi, kua titiro ki te nakahi parahi, ora ake.
- 10
- Na, ka turia atu e nga tamariki a Iharaira, a noho ana i Opoto.
- 11
- A ka turia atu ano e ratou i Opoto, a noho ana i Ite-aparimi i te koraha i mua mai o Moapa, ki te taha ki te rawhiti.
- 12
- A i turia atu ano e ratou i reira, a noho ana i te raorao o Terete.
- 13
- I turia atu e ratou i reira, a noho ana i tera taha o Aranona o tera i te koraha e totoro mai ana i nga wahi o nga Amori: ko Aranona hoki te rohe ki a Moapa, kei te takiwa o Moapa o nga Amori.
- 14
- Koia i korerotia ai i te pukapuka o nga whawhai a Ihowa, Ko tana i mea ai ki te Moana Whero, ki nga awa hoki o Aranona,
- 15
- Ki nga hurihanga wai ano hoki e tika ana whaka-te-nohoanga i Ara, e piri nei ki te rohe o Moapa.
- 16
- I turia atu hoki e ratou i reira ki Peere: ko te puna ia i korero ai a Ihowa ki a Mohi, Huihuia mai te iwi, a maku e hoatu he wai ki a ratou.
- 17
- Katahi ka waiatatia tenei waiata e Iharaira, Pupuke ake, e te puna; waiatatia atu e koutou:
- 18
- I keria e nga rangatira te puna, i keria e nga ariki o te iwi ki o ratou tokotoko, he mea tohutohu na te kai whakatakoto tikanga. Na, ka turia atu e ratou i te koraha ki Matana:
- 19
- I Matana hoki ki Nahariere, i Nahariere hoki ki Pamoto:
- 20
- I Pamoto hoki i te raorao, i tera i te whenua o Moapa, ki te tihi o Pihika, ki tera e anga atu ana ki Iehimono.
- 21
- Na, ka unga tangata atu a Iharaira ki a Hihona ki te kingi o nga Amori, hei mea atu,
- 22
- Kia tika ahau na tou whenua; e kore matou e peka ki nga mara, ki nga mara waina ranei; e kore matou e inu i nga wai o te puna: ka haere matou na te huanui o te kingi, kia pahemo ra ano o rohe i a matou.
- 23
- Otiia kihai a Hihona i tuku i a Iharaira kia tika na tona wahi; na, huihuia ana e Hihona tona iwi katoa, a puta mai ana ki te tu i a Iharaira ki te koraha: na, ka haere mai ia ki Iahata ki te tatau i a Iharaira.
- 24
- A patua iho ia e Iharaira ki te mata o te hoari tangohia ana hoki e ratou tona whenua, o Aranona atu, a, tae noa ki Iapoko, ki nga tamariki a Amona: he rohe hoki e kore e taea ta nga tamariki a Amona.
- 25
- A riro ana i a Iharaira enei pa katoa: a nohoia ana e Iharaira nga pa katoa o nga Amori, a Hehepona, me ona pa ririki.
- 26
- He pa hoki a Hehepona no Hihona no te kingi o nga Amori; i whawhai hoki ia ki to mua kingi o Moapa, a tangohia mai ana e ia tona whenua katoa i tona ringa, a tae noa ki Aranona.
- 27
- Koia te hunga korero whakatauki ka mea ai, Haere mai ki Hehepona, kia hangā, kia whakapaia te pa o Hihona.
- 28
- Kua puta atu hoki he ahi i Hehepona, he mura i te pa o Hihona: a pau ake a Ara o Moapa, me nga ariki o nga wahi tiketike o Aranona.
- 29
- Aue te mate mou, e Moapa! ka ngaro koe, e te iwi o Kemoho: kua hoatu e ia ana tama i ora, me ana tamahine, hei pononga ma Hihona ma te kingi o nga Amori.
- 30
- I kopere atu hoki matou ki a ratou; kua ngaro a Hehepona, tae noa ki Ripono, kua hunā e matou tae noa ki Nopa e totoro atu nei ki Merepa.
- 31
- Na, ka noho a Iharaira ki te whenua o nga Amori.
- 32
- A ka tono tangata a Mohi ki te tutei i Iatere, a ka riro mai i a ratou nga pa ririki o reira, i panā hoki nga Amori e noho ana i reira.
- 33
- Na, ka tahuri ratou, a ka haere ki runga na te ara o Pahana: na, ko te putanga mai o Oka o te kingi o Pahana, ki te whakatau i a ratou, a ia, me tana iwi katoa ki te whawhai ki Eterei.
- 34
- A ka mea a Ihowa ki a Mohi, Kei wehi koe i a ia; ka hoatu hoki ia e ahau ki tou ringa, me tona iwi katoa hoki, me tona whenua; a ka rite tau e mea ai ki a ia ki tau i mea ai ki a Hihona ki te kingi o nga Amori i noho ra i Hehepona.
- 35
- Na, patua iho ia e ratou, me ana tama, me tona iwi katoa, a kore noa e toe tetahi morehu ona: a tangohia ana e ratou tona whenua.
Address: 
Phone: 
Email: