- 1
- Na, ka turia atu e nga tamariki a Iharaira, a ka noho ki nga mania o Moapa, ki tenei taha o Horano ki te ritenga atu o Heriko.
- 2
- A, te kitenga o Paraka o te tama a Tiporo i nga mea katoa i mea ai a Iharaira ki nga Amori,
- 3
- Na, nui atu te wehi o Moapa ki te iwi, no te mea he tokomaha ratou: a tuatea noa iho a Moapa i nga tamariki a Iharaira.
- 4
- Na, ka mea a Moapa ki nga kaumatua o Miriana, Akuanei tenei whakaminenga horomiti ai i nga tangata katoa i tetahi taha o tatou i tetahi taha, pera ai me te kau e horomiti nei i te tarutaru a te mara. A ko Paraka tama a Tiporo te kingi a Moapa i taua wa.
- 5
- Na, ka ungā etahi karere e ia ki a Paraama tama a Peoro ki Petoro, ki te taha o te awa o te whenua o nga tamariki o tona iwi, ki te tiki i a ia, hei mea hoki, He iwi tenei kua puta mai i Ihipa, na, kapi ana i a ratou te mata o te whenua; a e noho nei ano ratou i toku aroaro:
- 6
- Na, tena, haere mai hei kai kanga maku i tenei iwi; e kaha ana hoki ratou i a au: tera pea e taea ratou e ahau te patu, te pei hoki i te whenua: e mohio ana hoki ahau ko tau e manaaki ai ka manaakitia, ko tau hoki e kanga ai ka kangā.
- 7
- Na, ka haere nga kaumatua o Moapa ratou ko nga kaumatua o Miriana me nga utu makutu i o ratou ringaringa; a ka tae mai ki a Paraama, a korerotia ana e ratou nga kupu a Paraka.
- 8
- Na, ka mea mai ia ki a ratou, E noho ki konei i tenei po, a me whakahoki mai he korero e ahau ki a koutou, ta Ihowa hoki e korero mai ai ki a au. Na, ka noho nga rangatira o Moapa ki a Paraama.
- 9
- Na, ka haere mai te Atua ki a Paraama, a ka mea, Ko wai ena tangata i a koe na?
- 10
- A ka mea a Paraama ki te Atua, Kua unga tangata mai a Paraka tama a Tiporo, te kingi o Moapa, ki a au, e ki ana,
- 11
- He iwi tenei kua puta mai i Ihipa, a kapi ana i a ratou te mata o te whenua: tena, haere mai hei kai kanga maku i a ratou; tera pea e taea e ahau te whawhai ki a ia, te pei hoki i a ia.
- 12
- Na, ko te meatanga mai a te Atua ki a Paraama, kaua e haere tahi i a ratou; kaua e kangā tena iwi: kua oti hoki ratou te manaaki.
- 13
- Na, ka maranga a Paraama i te ata, a ka mea ki nga rangatira o Paraka, Haere koutou ki to koutou whenua: e kore hoki a Ihowa e pai ki te tuku i a au kia haere i a koutou.
- 14
- Na, ka whakatika nga rangatira o Moapa, a ka haere mai ki a Paraka, ka mea hoki, Kihai a Paraama i pai ki te haere tahi mai i a matou.
- 15
- Na, ka tonoa mai e Paraka etahi atu rangatira, he tokomaha atu, he nui atu i era.
- 16
- A, to ratou taenga mai ki a Paraama, na, ka mea ratou ki a ia, Ko te kupu tenei a Paraka a te tama a Tiporo, Kei puritia atu koe e tetahi mea, haere mai ra ki a au:
- 17
- Ka whakanuia rawatia hoki koe e ahau, a ka meatia ano e ahau nga mea katoa e mea mai ai koe ki a au: haere mai ra, hei kai kanga maku i tenei iwi.
- 18
- Na, ko te whakahokinga mai a Paraama, te meatanga mai hoki ki nga tangata a Paraka, Ahakoa i ki tona whare i te hiriwa i te koura e homai e Paraka ki a au, e kore e ahei i a au te whakawhiti ke i te kupu a Ihowa a toku Atua, te mea i te mea iti, i te mea nui ranei.
- 19
- Na, e noho ano hoki koutou ki konei i tenei po, kia mohio ahau ki ta Ihowa e mea mai ai ano ki a au.
- 20
- A i puta mai te Atua ki a Paraama i te po, a ka mea ki a ia, Ki te haere mai aua tangata ki te karanga i a koe, whakatika atu, haere atu i a ratou: ko te kupu ia e korero ai ahau ki a koe, ko tena tau e mea ai.
- 21
- Na, ka maranga a Paraama i te ata, a whakanohoia ana e ia tana kaihe, a haere ana i nga rangatira o Moapa.
- 22
- Na, ka mura te riri a te Atua mona i haere, a ka tu te anahera a Ihowa ki te ara hei hoa riri mona. A i runga ia i tona kaihe e noho ana, ko ona tangata tokorua hoki ona hoa.
- 23
- A, te kitenga o te kaihe i te anahera a Ihowa e tu ana i te ara, me tana hoari i tona ringa, unu rawa: na, ina peka atu te kaihe i te ara, a ka haere ki te parae: na, ka whiua e Paraama te kaihe kia anga ki te ara.
- 24
- Katahi ka tu te anahera a Ihowa ki tetahi huarahi o nga mara waina, he taiepa kei tenei taha, he taiepa hoki kei tera taha.
- 25
- A, te kitenga o te kaihe i te anahera a Ihowa, na, ka whakapiri ki te taiepa, a karapitia ana e ia te waewae o Paraama ki te taiepa: na ka whiua ano ia e ia.
- 26
- Na, ka neke atu ano te anahera a Ihowa, a ka tu ki te wahi kuiti, kahore nei he ara hei pekanga atu ki matau ki maui.
- 27
- A, te kitenga o te kaihe i te anahera a Ihowa, na, ka takoto ki raro i a Paraama: a ka mura te riri a Paraama, a ka patua e ia te kaihe ki te rakau.
- 28
- Katahi ka whakahamumutia e Ihowa te waha o te kaihe, a ka korero mai ki a Paraama, I aha ahau ki a koe, i toru ai enei patunga au i a au?
- 29
- A ka mea mai a Paraama ki te kaihe, Mo to mamingatanga ra ki a au: me he hoari i toku ringa, ina, kua whakamatea koe e ahau inaianei.
- 30
- Na, ka mea ake te kaihe ki a Paraama, Ehara ianei ahau i te kaihe noa, i ekengia nei e koe o toku rironga ra i a koe, a tae noa ki tenei ra? he penei ranei taku hanga ki a koe i mua? A ka mea mai ia, Kahore.
- 31
- Na, ka whakatirohia e Ihowa nga kanohi o Paraama, a ka kite ia i te anahera o Ihowa e tu ana i te ara, me tana hoari i tona ringa, unu rawa: na ka tuohu ia, a ka piko iho tona mata.
- 32
- Na, ka mea te anahera a Ihowa ki a ia, Na te aha enei patunga e toru au i to kaihe? nana, i puta atu ahau hei hoa riri mou, no te mea e peau ke ana tou ara i toku aroaro.
- 33
- A, te kitenga o te kaihe i au, na, ka toru ana pekanga atu ki tahaki i toku aroaro: me i kahore ia te peka atu ki tahaki i toku aroaro, ina, kua patua tenei koe e ahau, a ko ia kua whakaorangia.
- 34
- Na, ka mea a Paraama ki te anahera a Ihowa, Kua hara ahau; noku kihai i mohio ko koe te tu mai ana i te ara ki te whakatau i a au: na, ki te he tenei ki tau titiro, me hoki ahau.
- 35
- Na, ko te meatanga mai a te anahera a Ihowa ki a Paraama, Haere i aua tangata: ko te kupu ia e korero nei ahau ki a koe, ko tena anake tau e korero ai. Na, ka haere a Paraama i nga rangatira a Paraka.
- 36
- A, te rongonga o Paraka e haere mai ana a Paraama, ka haere atu ia ki te whakatau i a ia ki tetahi pa o Moapa i te rohe o Aranona, i te rohe whakamutunga.
- 37
- A ka mea a Paraka ki a Paraama, Kahore ianei ahau i ata unga atu ki a koe, ki te karanga i a koe? na te aha koe tē haere mai ai ki a au? he pono ranei e kore e ahei i a au te whakanui i a koe?
- 38
- Na, ko te meatanga mai a Paraama ki a Paraka, Na, kua tae mai nei ahau ki a koe: tera ranei e taea e ahau te korero tetahi mea ahakoa iti? ko te kupu e homai e te Atua ki toku waha, ko tena taku e korero ai.
- 39
- Na, ka haere a Paraama i a Paraka, a ka tae mai raua ki Kiriatahutoto.
- 40
- Na ka patu a Paraka i etahi kau me etahi hipi, a ka unga tangata mai ki a Paraama ratou ko ona hoa ko nga rangatira.
- 41
- A i te ata, na, ka mau a Paraka ki a Paraama, a kawea ana e ia ki runga ki nga wahi teitei o Paara, a ka whakaturia mai e ia i reira te pito whakamutunga o te iwi.
Address: 
Phone: 
Email: