- 1
- A, te kitenga o Paraama ko ta Ihowa i pai ai he manaaki i a Iharaira, na, kihai ia i haere me era meatanga ki te whai i te mea makutu; engari i anga atu tona mata, ki te koraha.
- 2
- Na, ka maranga ake nga kanohi o Paraama, a ka kite i a Iharaira e noho ana, tenei iwi tenei iwi o ratou; na, ko te putanga mai o te wairua o te Atua ki runga ki a ia.
- 3
- Na, ka tikina e ia tana ki pepeha, a ka mea, He ki tenei na Paraama tama a Peoro, he ki hoki na te tangata e titiro ana ona kanohi:
- 4
- He ki na te tangata i rangona ai nga kupu a te Atua, i kitea ai te whakakitenga a te Kaha rawa; i parangia hoki ia, me te titiro ano ona kanohi.
- 5
- Ano te pai o ou teneti, e Hakopa, o ou nohoanga, e Iharaira!
- 6
- Me te mea ko nga awaawa e takoto atu ana, rite tahi ano ki nga kari i te taha o te awa, ki nga aroe i whakatokia e Ihowa, ki nga hita i te taha o nga wai.
- 7
- Ka ringitia iho te wai i roto i ana peere, a ka tupu ana purapura ki nga wai maha, ka whakanuia ake ano tona kingi i a Akaka, ka kake hoki tona kingitanga.
- 8
- Na te Atua ia i whakaputa mai i Ihipa; rite tahi ano tona kaha ki to te unikanga: ka pau nga iwi ona hoa riri i a ia, ka whatiwhatiia e ia o ratou wheua, ka werohia hoki ratou ki ana pere.
- 9
- I tapapa iho ia, i takoto, ano he raiona, rite tahi ano hoki ki te raiona katua: ma wai ia e whakaoho? Ka manaakitia te tangata e manaaki ana i a koe, ka kangā hoki te tangata e kanga ana i a koe.
- 10
- Na, ka mura te riri a Paraka ki a Paraama, a ka papaki ona ringa: na, ko te meatanga mai a Paraka ki a Paraama, He kanga i oku hoa riri i karanga ai ahau i a koe, na, ka toru nei au manaakitanga i a ratou.
- 11
- Na, rere atu ki tou wahi: I mea ahau kia whakanuia rawatia koe; a kua puritia nei koe e Ihowa kei whai kororia.
- 12
- Na, ko te meatanga atu a Paraama ki a Paraka, Kahore ianei ahau i korero, i mea ki o karere i ungā ake ra e koe ki a au,
- 13
- Ahakoa i ki tona whare i te hiriwa i te koura e homai e Paraka ki a au, e kore e ahei i a au te whakawhiti ke i te kupu a Ihowa, te mea i te pai, i te kino ranei, i ta toku ngakau ake; ko ta Ihowa e korero ai, ko tena taku e korero ai?
- 14
- Na, ka haere tenei ahau ki toku iwi: haere mai, a me whakaatu e ahau ki a koe ta tenei iwi e mea ai ki tou iwi i nga ra whakamutunga.
- 15
- Na, ka tikina e ia tana ki pepeha, a ka mea, He ki tenei na Paraama na te tama a Peoro, he ki hoki na te tangata e titiro ana ona kanohi:
- 16
- He ki na te tangata i whakarongo atu ki nga kupu a te Atua, i mohio ki nga mea a te Runga rawa, i kite nei i te whakakitenga mai a te Kaha rawa, i parangia, me te titiro ano ona kanohi:
- 17
- E kite ano ahau i a ia, otiia kahore aianei: e titiro atu ahau ki a ia, otiia e kore e tata: tera e puta he Whetu i roto i a Hakopa, ka ara ake ano hoki he Hepeta i roto i a Iharaira, a ka patua e ia nga pito o Moapa, ka hunā ano hoki e ia nga tamariki katoa a Hete.
- 18
- A ka riro mai ano a Eroma, ka riro mai ano hoki a Heira, i ona hoa riri; a ka maia te mahi a Iharaira.
- 19
- A ka whai rangatiratanga tetahi e puta mai i roto i a Hakopa, a ka hunā e ia nga morehu o te pa.
- 20
- Na, ka titiro ia ki a Amareke, a ka tikina tana ki pepeha, ka mea, Ko Amareke te timatanga o nga iwi; ko tona whakamutunga ia he whakangaromanga, ake ake ake.
- 21
- Na, ka titiro ia ki nga Keni, a ka tikina tana ki pepeha, ka mea, E kaha ana tou nohoanga, kua hangā ano hoki tou ohanga ki te kamaka.
- 22
- He ahakoa ra ka pau te Keni: a, whakataurerekatia noatia koe e te Ahiriana?
- 23
- Na, ka tikina ano e ia tana ki pepeha, a ka mea, Aue, ko wai e ora, ina meatia tenei e te Atua!
- 24
- A ka u mai ano he kaipuke i te taha o Kitimi, a ka tukinotia e ratou te Ahiriana, ka tukinotia ano hoki a Epere, ko ia ano hoki ka ngaro, a ake ake ake.
- 25
- Katahi ka whakatika a Paraama, a haere ana hoki ana ki tona wahi; me Paraka ano hoki i haere i tana ara.
Address: 
Phone: 
Email: