- 1
- Ko nga whakatupuranga ano hoki enei o Arona raua ko Mohi i te ra i korero ai a Ihowa ki a Mohi i Maunga Hinai.
- 2
- Ko nga ingoa hoki enei o nga tama a Arona: ko Natapa ko te matamua ratou ko Apihu, ko Ereatara, ko Itamara.
- 3
- Ko nga ingoa enei o nga tama a Arona, o nga tohunga i whakawahia, i whakatohungatia, nei e ia hei tohunga.
- 4
- I mate hoki a Natapa raua ko Apihu ki te aroaro o Ihowa, i ta raua whakaherenga i te ahi ke ki te aroaro o Ihowa ki te koraha o Hinai, kahore ano hoki a raua tamariki: a i mahi a Ereatara raua ko Itamara i nga mahi a te tohunga i te tirohanga mai a ta raua papa a Arona.
- 5
- A i korero mai a Ihowa ki a Mohi, i mea,
- 6
- Kawea mai te iwi o Riwai, whakaturia hoki ki te aroaro o Arona tohunga, a hei kai mahi ratou mana.
- 7
- A ma ratou e tiaki nga mea hei tiakanga mana, hei tiakanga ma te whakaminenga katoa ki mua i te tapenakara o te whakaminenga, e mahi hoki nga mahi o te tapenakara.
- 8
- Ma ratou ano hoki e tiaki nga mea katoa o te tapenakara o te whakaminenga, nga mea hoki hei tiakanga ma nga tamariki a Iharaira, me mahi hoki nga mahi o te tapenakara.
- 9
- Me hoatu e koe nga Riwaiti ki a Arona ratou ko ana tama: me hoatu katoa ratou ki a ia i roto i nga tamariki a Iharaira.
- 10
- Me whakarite iho ano hoki e koe a Arona ratou ko ana tamariki kia u ai ratou ki ta ratou mahi tohunga: ki te whakatata mai hoki he tangata ke ka whakamatea.
- 11
- A i korero ano a Ihowa ki a Mohi, i mea,
- 12
- Me ahau hoki, nana, kua tango nei ahau i nga Riwaiti i roto i nga tamariki a Iharaira hei utu mo nga matamua katoa e orokoputa mai ana i te kopu i roto i nga tamariki a Iharaira: maku hoki nga Riwaiti;
- 13
- No te mea, naku nga matamua katoa; no te rangi ano i patu ai ahau i nga matamua katoa o te whenua o Ihipa taku whakatapunga i nga matamua katoa a Iharaira maku, i a te tangata, i a te kararehe: naku era: ko Ihowa ahau.
- 14
- A i korero mai ano a Ihowa ki a Mohi, i te koraha o Hinai, i mea,
- 15
- Taua nga tamariki a Riwai, tenei whare tenei whare o o ratou mātua, tenei hapu tenei hapu o ratou: me tatau ratou e koe, nga tane katoa kotahi nei te marama, me nga mea hoki i maha atu.
- 16
- Na ka taua ratou e Mohi ka peratia me ta Ihowa i ki ai, me tana i whakahau mai ai.
- 17
- A ko nga tama enei a Riwai me o ratou ingoa; ko Kerehona, ko Kohata, ko Merari.
- 18
- A ko nga ingoa enei o nga tama a Kerehona, o tenei hapu o tenei hapu a ratou; ko Ripini raua ko Himei.
- 19
- Me nga tama a Kohata, o tenei hapu o tenei hapu o ratou; ko Amarama, ko Itihara, ko Heperona, ko Utiere.
- 20
- Me nga tama a Merari, o tenei hapu o tenei hapu o ratou: ko Mahari, ko Muhi. Ko nga hapu enei o nga Riwaiti, o tenei whare o tenei whare o o ratou matua.
- 21
- Na Kerehona te hapu o nga Ripini, me te hapu o nga Himei: ko nga hapu enei o nga Kerehoni.
- 22
- Ko nga mea o ratou i taua, ko te tokomaha hoki o nga tane katoa, kotahi nei te marama, me nga mea hoki i maha atu, ko nga mea o ratou i taua e whitu mano e rima hoki rau.
- 23
- Hei muri i te tapenakara, hei te taha ki te hauauru, te puni o nga Kerehoni.
- 24
- Ko Eriahaka hoki tama a Raere hei ariki mo te whare o te matua o nga Kerehoni;
- 25
- A ko ta nga tama a Kerehona e tiaki ai i roto i te tapenakara o te whakaminenga, ko te tapenakara ko te teneti, ko tona hipoki, me te pa o te whatitoka o te tapenakara o te whakaminenga.
- 26
- Me nga pa o te marae, me te pa o te whatitoka o te marae, o tera i te tapenakara, i te aata hoki, a, tawhio noa, me ona aho hoki mo ona meatanga katoatanga.
- 27
- Na Kohata hoki te hapu o nga Amarami, me te hapu o nga Itihari, me te hapu o nga Heperoni, me te hapu o nga Utieri: ko nga hapu enei o nga Kohati.
- 28
- Ko te tokomahatanga o nga tane katoa, kotahi nei te marama, me nga mea i maha atu, e waru mano e ono hoki rau, ko ratou nga kai tiaki o te wahi tapu.
- 29
- Hei te taha whaka-te-tonga o te tapenakara he puni mo nga hapu o nga tama a Kohata.
- 30
- A ko Eritapana, tama a Utiere, hei ariki mo te whare o te matua o nga hapu o nga Kohati.
- 31
- A ko ta ratou e tiaki ai ko te aaka, ko te tepara, ko te turanga rama, ko nga aata, ko nga oko o te wahi tapu, ara, ko nga mea e minita ai ratou, me nga pa, me nga mea katoa o ena mahinga.
- 32
- A ko Ereatara tama a Arona tohunga hei ariki mo nga ariki o nga Riwaiti, mana hoki e tirotiro nga kai tiaki e tiaki ana i te wahi tapu.
- 33
- Na Merari te hapu o nga Mahari, me te hapu o nga Muhi: ko nga hapu enei o Merari.
- 34
- A ko nga mea o ratou i taua, ko te tokomaha o nga tane katoa, kotahi nei te marama, me nga mea hoki i maha atu, e ono mano e rua rau.
- 35
- A ko Turiere ko te tama a Apihaira hei ariki mo te whare o te matua o nga hapu o Merari: hei te taha ki te nota o te tapenakara he puni mo enei.
- 36
- Ko ta nga tama hoki a Merari e tupato ai, e tiaki ai, ko nga papa o te tapenakara, me ona kaho, me ona pou, me nga turanga pou, me nga mea katoa o aua mea, me nga mea katoa o ena mahinga.
- 37
- Me nga pou o te marae, tawhio noa, me nga turanga, me nga titi, me nga aho.
- 38
- A ko nga mea e noho ki mua i te tapenakara, ki tera taha ki te rawhiti, ara, ki mua i te tapenakara o te whakaminenga, ki te taha ki te rawhiti, ko Mohi, ratou ko Arona ko ana tama, hei tiaki i te wahi tapu, i nga mea hei tiakanga ma nga tamariki a Iharaira; ki te whakatata mai hoki te tangata ke ka whakamatea.
- 39
- Nga Riwaiti katoa i taua, era i taua e Mohi raua ko Arona, i ta Ihowa whakahaunga ai, puta noa i o ratou hapu, ko nga tane katoa kotahi nei te marama, me nga mea hoki i maha atu, e rua tekau ma rua mano.
- 40
- A i mea mai ano a Ihowa ki a Mohi, Taua nga tane matamua katoa o nga tamariki a Iharaira, nga mea kotahi nei te marama, me nga mea i maha atu, tuhituhia hoki te maha o o ratou ingoa.
- 41
- A me tango e koe nga Riwaiti maku, (ko Ihowa ahau,) hei utu mo nga matamua katoa o nga tamariki a Iharaira; me nga kararehe a nga Riwaiti hei utu mo nga matamua katoa i roto i nga kararehe a nga tamariki a Iharaira.
- 42
- Na, ka taua e Mohi, ka peratia ano me ta Ihowa i whakahau ai ki a ia, nga matamua katoa i roto i nga tamariki a Iharaira.
- 43
- A nga tane matamua katoa, te maha o nga ingoa, kotahi nei te marama, me nga mea hoki i maha ake, nga mea o ratou i taua, e rua tekau ma rua mano e rua rau e whitu tekau ma toru.
- 44
- A i korero a Ihowa ki a Mohi, i mea,
- 45
- Tangohia nga Riwaiti hei utu mo nga tane matamua katoa i roto i nga tamariki a Iharaira, me nga kararehe a nga Riwaiti hei utu mo a ratou kararehe; a maku nga Riwaiti: ko Ihowa ahau.
- 46
- A ko nga mea e whakahokia atu ki te utu, ko nga rau e rua me te whitu tekau ma toru o nga matamua o nga tamariki a Iharaira, ko nga hiranga ake i nga Riwaiti.
- 47
- Me tango e koe kia rima nga hekere mo tenei mo tenei o ratou; kia rite ki te hekere o te wahi tapu au e tango ai: e rua tekau nga kera o te hekere kotahi:
- 48
- Me hoatu hoki e koe te moni e utua ai nga hiranga o ratou, ki a Arona ratou ko ana tama.
- 49
- Na, ka tango a Mohi i te moni whakahoki, i a nga tangata i hira ake i era i utua ki nga Riwaiti:
- 50
- I tangohia mai e ia te moni i nga matamua a nga tamariki a Iharaira; kotahi mano e toru rau e ono tekau ma rima; he pera ano me te hekere o te wahi tapu:
- 51
- A i hoatu e Mohi te moni a te hunga i utua ki a Arona ratou ko ana tama; i pera ano ia me ta Ihowa i ki ai, me ta Ihowa i whakahau ai ki a Mohi.
Address: 
Phone: 
Email: