- 1
- A i korero ano a Ihowa ki a Mohi raua ko Arona, i mea,
- 2
- Tirohia te tokomahatanga o nga tamariki a Kohata, i roto i nga tamariki a Riwai, tenei hapu tenei hapu o ratou, me te whakaaro ano ki nga whare o o ratou mātua.
- 3
- Nga mea e toru nei tekau, i maha atu ranei o ratou tau, a tae noa ki nga mea e rima tekau o ratou tau, nga mea katoa, e uru ana ki te mahi, ki te mea i nga mea o te tapenakara o te whakaminenga.
- 4
- Ko te mahi tenei ma nga tama a Kohata i roto i te tapenakara o te whakaminenga, ko nga mea tino tapu:
- 5
- A ka maunu atu te puni, me haere mai a Arona ratou ko ana tama, a me tango e ratou te arai hipoki ki raro, a ka hipoki iho ki te aaka o te whakaaturanga:
- 6
- Na, ka makā iho e ratou te hipoki ki runga, ara, nga hiako pateri, a ka uhi iho i tetahi kakahu puuru katoa, ka kuhu ai hoki i nga amo.
- 7
- Me uhi ano hoki e ratou he kakahu puuru ki runga ki te tepara taro aroaro, ka whakatakoto ai i nga rihi ki runga, me nga koko, me nga peihana, me nga kapa hei ringihanga: hei runga ano hoki te taro pumau takoto ai:
- 8
- A me uhi iho e ratou he kakahu ngangana ki aua mea, ka hipoki iho ai i tetahi hiako pateri hei hipoki ki runga, ka kuhu ai i ona amo.
- 9
- Na, ka mau ratou ki tetahi kakahu puuru, ka hipoki ai i te turanga whakamārama, i ona rama hoki, me ona kuku, me ona takotoranga ngarahu, me ona oko hinu, nga mea hoki e minita ai ratou ki taua mea:
- 10
- Ka hoatu ai e ratou me ona mea katoa ki roto ki te takai, ki te mea hiako pateri, ka hoatu ai ki runga ki te amo.
- 11
- A me uhi iho e ratou he kakahu puuru ki runga ki te aata koura, ka hipoki ai ki tetahi hipoki hiako pateri, ka kuhu ai i ona amo:
- 12
- Na, ka mau ratou ki nga mea minita katoa e minita ai ratou i te wahi tapu, ka hoatu ai ki roto ki te kakahu puuru, ka hipoki ai ki tetahi hipoki hiako pateri, ka hoatu ai ki runga ki te amo:
- 13
- Na, ka tahia atu e ratou nga pungarehu o te aata, a ka hipoki i taua mea ki te kakahu papura:
- 14
- Me whakatakoto ano hoki ki runga ona oko katoa e minita ai ratou ki taua mea, nga tahu-kakara, nga marau kikokiko, nga koko pungarehu, nga peihana, nga mea katoa o te aata, ka hipokina ai e ratou ki te hipoki hiako pateri, ka kuhu ai hoki i ona amo.
- 15
- A ka oti i a Arona ratou ko ana tama te hipoki te wahi tapu, me nga oko katoa o te wahi tapu, ina tata te puni te maunu atu; ka mutu, na, ka haere mai nga tama a Kohata ki te kauhoa atu: otiia kaua ratou e pa ki tetahi mea tapu, kei mate ratou. Ko enei a nga tama a Kohata e mau ai o roto i te tapenakara o te whakaminenga.
- 16
- A ko ta Ereatara, ta te tama a te tohunga a Arona e whakaaro ai, ko te hinu mo te whakamārama, me te whakakakara reka, me te whakahere toto-kore o tenei ra o tenei ra, me te hinu whakawahi, me te tirotiro i te tapenakara katoa, i nga mea katoa hoki o roto i te wahi tapu, i nga oko katoa hoki o reira.
- 17
- A i korero ano a Ihowa ki a Mohi raua ko Arona, i mea,
- 18
- Kei hatepea atu e koutou te iwi o nga hapu o nga Kohati i roto i nga Riwaiti:
- 19
- Engari ko tenei ta koutou e mea ai ki a ratou, kia ora ai ratou, kei mate hoki, ina whakatata ki nga mea tino tapu: me haere a Arona ratou ko ana tama ki roto, ka whakarite ai i tenei tangata i tenei tangata ki tana mahi ki tana mahi, ki tana amohanga ki tana amohanga.
- 20
- Otiia, kaua ratou e haere ki roto ki te matakitaki ua hipokina nga mea tapu rawa, kei mate ratou.
- 21
- A i korero ano a Ihowa ki a Mohi, i mea,
- 22
- Tirohia hoki te tokomahatanga o nga tama a Kerehona, me te whakaaro ano ki nga whare o o ratou mātua, tenei hapu tenei hapu o ratou;
- 23
- Ko nga mea e toru nei tekau, i maha atu ranei nga tau, a tae noa ki nga mea e rima tekau o ratou tau, au e tatau ai; nga mea katoa hoki e uru ana ki te mahi, ki te mahi i te mahi i te tapenakara o te whakaminenga.
- 24
- Ko te mahi tenei ma nga hapu o nga Kerehoni, ko te mahi, ko te amo:
- 25
- Ma ratou hoki e amo nga pa o te tapenakara, te tapenakara hoki o te whakaminenga, tona hipoki, me te hipoki hiako pateri i waho ake, me te pa o te whatitoka o te tapenakara o te whakaminenga.
- 26
- Me nga pa o te marae, me te pa mo te whatitoka o te kuwaha o te marae, o tera i te tapenakara, i te aata, a, tawhio noa, me nga aho, me nga mea katoa mo te mahinga o aua mea, me nga mea katoa i hangā mo aua mea: ko ta ratou mahi tena.
- 27
- Kei a Arona ratou ko ana tama te tikanga mo nga mahi katoa a nga tama a nga Kerehoni, mo a ratou amohanga katoa, me a ratou mahi katoa: ma koutou hoki e tuku atu a ratou mea katoa e amo ai ki a ratou kia tiakina.
- 28
- Ko te mahi tenei ma nga hapu o nga tama a Kerehona i te tapenakara o te whakaminenga: a hei raro ano ratou i te ringa o Itamara o te tama a te tohunga a Arona tiaki ai.
- 29
- Ko nga tama a Merari, me tatau ratou e koe, tenei hapu tenei hapu o ratou, me te whakaaro ano ki nga whare o o ratou mātua;
- 30
- Ko nga mea e toru nei tekau, i maha atu ranei o ratou tau, a tae noa ki nga mea e rima tekau o ratou tau, au e tatau ai, nga tangata katoa e uru ana ki te mahi, ki te mahi i te mahi o te tapenakara o te whakaminenga.
- 31
- A ko a ratou mea tenei e amo ai, e tiaki ai, i a ratou mahinga katoatanga i te tapenakara o te whakaminenga; ko nga papa o te tapenakara, me ona kaho, me ona pou, me ona turanga pou,
- 32
- Me nga pou o te marae, a, tawhio noa, me nga turanga pou, me nga titi, me nga aho, me nga mea katoa o aua mea, me nga mea katoa o ena mahinga: me tatau a ingoa atu hoki e koutou nga aha noa hei amohanga hei tiakanga ma ratou.
- 33
- Ko te mahi tenei a nga hapu o nga tama a Merari, i a ratou mahinga katoatanga i te tapenakara o te whakaminenga, i raro i te ringa o Itamara o te tama a te tohunga a Arona.
- 34
- Na, ka taua e Mohi ratou ko Arona ko nga ariki o te whakaminenga nga tama a nga Kohati, tenei hapu tenei hapu o ratou, me te whakaaro ano ki nga whare o o ratou mātua,
- 35
- Nga mea e toru tekau, he maha atu ranei o ratou tau, a tae noa ki nga mea e rima tekau o ratou tau, nga tangata katoa i uru ki te mahi, ki te mahi i te tapenakara o te whakaminenga.
- 36
- A nga mea o ratou i taua, puta noa i o ratou hapu, e rua mano e whitu rau e rima tekau.
- 37
- Ko nga mea enei i taua o nga hapu o nga Kohati, ko nga tangata hei mahi i te tapenakara o te whakaminenga, taua nei e Mohi raua ko Arona, i peratia me ta Ihowa whakahaunga i whakapuakina e Mohi.
- 38
- A nga mea i taua o nga tama a Kerehona puta noa i o ratou hapu, me te whakaaro ano ki nga whare o o ratou mātua,
- 39
- Ko nga mea e toru tekau, he maha atu ranei o ratou tau, a tae noa ki nga mea e rima tekau o ratou tau, nga mea katoa i uru ki te mahi, ki te mahi i te tapenakara o te whakaminenga,
- 40
- Ko nga mea o ratou i taua, puta noa i o ratou hapu, me te whakaaro ano ki nga whare o o ratou mātua, e rua mano e ono rau e toru tekau.
- 41
- Ko nga mea enei i taua o nga hapu o nga tama a Kerehona, o nga tangata katoa hei mahi i te tapenakara o te whakaminenga, nga mea hoki i taua e Mohi raua ko Arona, i peratia me ta Ihowa i whakahau ai.
- 42
- A nga mea i taua o nga hapu o nga tama a Merari, puta noa i o ratou hapu, me te whakaaro ano ki nga whare o o ratou mātua,
- 43
- Nga mea hoki e toru tekau, he maha atu ranei o ratou tau, a tae noa ki nga mea e rima tekau o ratou tau, nga tangata katoa i uru ki te mahi, hei mahi i te tapenakara o te whakaminenga,
- 44
- Ko nga mea o ratou i taua, puta noa i o ratou hapu, e toru mano e rua rau.
- 45
- Ko nga mea enei i taua o nga hapu o nga tama a Merari, i taua nei e Mohi raua ko Arona, i peratia me ta Ihowa kupu i whakapuakina e Mohi.
- 46
- Ko nga tangata katoa o nga Riwaiti i taua, ko a Mohi ratou ko Arona ko nga ariki o Iharaira i tatau ai, puta noa i o ratou hapu, me te whakaaro ano ki nga whare o o ratou mātua,
- 47
- Nga mea hoki e toru tekau he maha atu ranei o ratou tau, a tae noa ki nga mea e rima tekau o ratou tau, nga tangata katoa i uru ki te mahi i nga mahi e mahia ana, ki te mahi amo hoki i te tapenakara o te whakaminenga,
- 48
- Ko nga mea o ratou i taua e waru mano e rima rau e waru tekau.
- 49
- Rite tonu ki ta Ihowa i whakahau ai te tauanga o ratou e te ringa o Mohi, tenei tangata tenei tangata me tana mahi me tana amohanga: na, poto ake ratou te tatau e ia, te pera me ta Ihowa i whakahau ai ki a Mohi.
Address: 
Phone: 
Email: