- 1
- A i korero ano a Ihowa ki a Mohi, i mea,
- 2
- Whakahaua atu nga tamariki a Iharaira kia motuhia ketia atu nga repara katoa i roto i te puni, me nga tangata katoa e rere ana te pirau, me nga tangata katoa e poke ana i te tupapaku.
- 3
- Me whakamotuhake atu e koutou nga tane me nga wahine, me whakamotuhake atu ki waho o te puni: kei poke i a ratou o ratou puni, e nohoia nei e ahau.
- 4
- Na, peratia ana e nga tamariki a Iharaira, a motuhia ketia ana ratou i roto i te puni: rite tonu ki ta Ihowa i korero ai ki a Mohi ta nga tamariki a Iharaira i mea ai.
- 5
- A i korero ano a Ihowa ki a Mohi, i mea,
- 6
- Mea atu ki nga tamariki a Iharaira, Ki te mahia e te tangata, e te wahine ranei, tetahi mea e hara ai te tangata, ki te kino te mahi ki a Ihowa, a ka he taua tangata;
- 7
- Na, me whaki atu tona hara i hara ai; me whakahoki mai ano e ia te mea i he ai ia, te tino mea, me tapiri mai ano hoki te wahi whakarima o taua mea, ka hoatu ai ma te tangata i hara nei ia ki a ia.
- 8
- Otiia ki te kahore he whanaunga o taua tangata hei hoatutanga mo te utu, me hoatu te utu mo te hara ki a Ihowa, ara, ki te tohunga; hei tapiri mo te hipi whakamarie e meinga ai he whakamarietanga mona.
- 9
- Ma te tohunga ano hoki nga whakahere katoa o nga mea tapu katoa a nga tamariki a Iharaira, e kawea mai ana e ratou ki a ia.
- 10
- Mana hoki nga mea tapu a tenei tangata a tenei tangata: ma te tohunga nga mea katoa e homai ana e tenei e tenei.
- 11
- A i korero ano a Ihowa ki a Mohi, i mea,
- 12
- Korero atu ki nga tamariki a Iharaira, mea atu ki a ratou, Ki te peka ke te wahine a tetahi tangata, a ka hara ki a ia,
- 13
- A ka takoto ka puremu tetahi tangata ki a ia, a ka ngaro i nga kanohi o tona tahu, ka hunā, a ka poke te wahine, kahore ano hoki he kai whakaatu mo tona he, kahore ano hoki ia i mau rawa;
- 14
- A ka tau iho ki a ia te wairua hae, a ka hae ia ki tana wahine, a e poke ana ano te wahine: ki te tau iho ranei ki a ia te wairua hae, a ka hae ia ki tana wahine, a kahore ano ia i poke;
- 15
- Katahi ka kawe taua tangata i tana wahine ki te tohunga, me kawe mai ano hoki e ia ta te wahine whakahere hei mea mona, te wahi whakatekau o te epa paraoa parei; kaua he hinu e ringitia e ia ki runga, kaua ano hoki he parakihe e whakatakotoria ki runga; he whakahere hae hoki, he whakahere whakamahara, hei whakamahara ki te kino.
- 16
- Na, ka nekehia ia e te tohunga kia tata mai, a ka whakaturia ki te aroaro o Ihowa:
- 17
- A ka mau te tohunga ki te wai tapu i roto i te oko oneone; ka mau ano hoki te tohunga ki tetahi wahi o te puehu o te papa o te tapenakara, ka maka ai ki te wai:
- 18
- Na, ka whakaturia e te tohunga te wahine ki te aroaro o Ihowa, a ka tangohia ano e ia te taupoki o te mātenga o te wahine, ka hoatu ai i te whakahere whakamahara ki ona ringa, ara, te whakahere hae: hei te ringa ia o te tohunga te wai kawa e tau ai te kanga:
- 19
- Na ka whakaoati te tohunga i a ia, a ka mea ki te wahine, Ki te mea kahore ano tetahi tangata i takoto ki a koe, ki te kahore ano hoki koe i peka atu, i poke i tetahi atu ehara nei i te tane nau, kia ora koe i tenei wai kawa e tau ai te kanga:
- 20
- Tena ko tenei, kua peka ke atu koe ki tetahi atu ehara nei i te tane nau, a kua poke, a kua takoto ki a koe tetahi tangata ehara nei i te tane nau:
- 21
- Katahi ka whakaoati te tohunga i te wahine ki te oati kanga, a ka mea te tohunga ki te wahine, Ma Ihowa koe e mea hei kanga hei oati i roto i tou iwi, ina mea a Ihowa kia pirau tou huha, kia pupuhi hoki tou puku;
- 22
- A ka tae ki roto ki ou whekau tenei wai e tau ai te kanga, hei mea i tou puku kia pupuhi, i tou huha hoki kia pirau: a me ki mai te wahine, Amine, amine.
- 23
- A me tuhituhi enei kanga e te tohunga ki te pukapuka, ka horoi atu ano e ia ki te wai kawa:
- 24
- Na, ka whakainumia e ia te wahine ki te wai kawa e tau ai te kanga a ka tae te wai e tau ai te kanga ki roto ki a ia, a ka kawa.
- 25
- Katahi te tohunga ka tango i te whakahere hae i te ringa o te wahine, a ka poipoia te whakahere ki te aroaro o Ihowa; ka whakaherea hoki ki runga ki te aata:
- 26
- Na, ka aohia mai e te tohunga tetahi wahi o te whakahere, kia ki te ringa, hei whakamaharatanga ki taua mea, a ka tahuna ki runga ki te aata, a, muri iho ka whakainumia te wahine ki te wai.
- 27
- A ka oti ia te whakainu e ia ki te wai, na, ki te mea kua poke ia, a kua hara ki tona tahu, na, ka tae ki roto ki a ia te wai e tau ai te kanga, a ka kawa, a ka pupuhi tona puku, ka pirau hoki tona huha: a hei kanganga tena wahine i roto i tona iwi.
- 28
- A ki te mea kihai i poke te wahine, a e ma ana; na, ka ora, a ka whai tamariki.
- 29
- Ko te ture tenei mo nga hae, ina peka ke te wahine ki tetahi ehara nei i te tane nana, a ka poke;
- 30
- Ina tau iho ranei te wairua hae ki a ia; a ka hae ia ki tana wahine, a ka whakaturia taua wahine e ia ki te aroaro o Ihowa; na, ka whakaritea e te tohunga tenei ture katoa ki a ia.
- 31
- Ma konei e watea ai te tangata i te kino, a ka wahā ano e taua wahine tona kino.
Address: 
Phone: 
Email: