- 1
- A i korero ano a Ihowa ki a Mohi, i mea,
- 2
- Korero atu ki nga tamariki a Iharaira, mea atu ki a ratou, E whakamotuhake te tangata te wahine ranei i a ia, e puaki i a ia te ki taurangi, ta te Natari, mona kia whakamotuhaketia ma Ihowa:
- 3
- Me whakamotuhake kei tata ki a ia te waina, te wai whakahaurangi ranei, kaua ano hoki ia e inu i te winika waina, i te winika whakahaurangi, kaua hoki ia e inu i te wai o nga karepe, kaua ano hoki e kainga e ia nga karepe kaiota, nga mea maroke ranei.
- 4
- I nga ra katoa e whakamotuhaketia ai ia kaua ia e kai i tetahi mea no te rakau waina nei te mea i hangā ai, ahakoa nganga, ahakoa peha.
- 5
- I nga ra katoa o tana ki whakamotuhake kaua te heu e heua ki tona mātenga: ka tapu ia, a rite noa nga ra e whakamotuhaketia ai ia ki a Ihowa, me whakatupu e ia tona mahunga, ara, nga makawe o tona mātenga.
- 6
- Kaua ia e whakatata ki te tupapaku i nga ra katoa e whakamotuhaketia ai ia ki a Ihowa.
- 7
- Kaua ia e whakapoke i a ia mo tona papa, mo tona whaea, mo tona tuakana, teina ranei, mo tona tuahine, ina mate ratou; no te mea kei runga i tona mātenga te whakamotuhaketanga a tona Atua.
- 8
- Ka tapu ia ki a Ihowa i nga ra katoa e whakamotuhaketia ai ia.
- 9
- A ki te mate tetahi tangata ki tona taha, he mea pa whakarere, a kua poke i a ia tona mātenga i whakamotuhaketia nei; na, me heu e ia tona mātenga i te ra e purea ai ia, me heu e ia i te whitu o nga ra.
- 10
- A i te waru o nga ra me kawe mai e ia nga kukupa e rua, nga pi kukupa ranei e rua, ki te tohunga, ki te whatitoka o te tapenakara o te whakaminenga:
- 11
- A me whakahere atu tetahi e te tohunga whakahere hara, me tetahi hei tahunga tinana, a ka meinga he whakamarietanga mona, nona hoki i whai hara i te tupapaku, ka whakatapua ano hoki tona mātenga i taua rangi ano.
- 12
- A me whakatapu e ia ki a Ihowa nga ra o tona whakamotuhaketanga, me kawe mai ano hoki he reme, he tau-tahi, hei whakahere mo te he: ko nga ra ia o mua ka whakataka, no te mea kua poke tona whakamotuhaketanga.
- 13
- A ko te ture tenei mo te Natari, ina rite nga ra e whakamotuhaketia ai ia: me kawe ia ki te whatitoka o te tapenakara o te whakaminenga:
- 14
- A me whakahere atu e ia tana whakahere ki a Ihowa, kia kotahi ano reme, ki te tane, ki te tau-tahi, ki te mea koha-kore, hei tahunga tinana, me tetahi reme uha, ki te tau-tahi, ki te mea koha-kore, hei whakahere hara, me tetahi hipi toa, ki te mea koha-kore, hei whakamarietanga,
- 15
- Me tetahi kete taro rewena-kore, ki nga keke paraoa i konatunatua ki te hinu, me etahi mea angiangi ano hoki, ki nga mea rewena-kore, ki nga mea i pania ki te hinu, me te whakahere toto-kore, me nga ringihanga o aua mea.
- 16
- A me kawe mai aua mea e te tohunga ki te aroaro o Ihowa, a ka whakaherea tana whakahere hara, me tana tahunga tinana:
- 17
- Me whakahere ano e ia te hipi toa, hei patunga tapu, hei whakamarietanga ki a Ihowa, me te kete taro rewena-kore ano hoki: me whakahere ano hoki e te tohunga tana whakahere toto-kore, me tana ringihanga.
- 18
- A me heu e te Natari tona mātenga, i whakamotuhaketia nei, ki te whatitoka o te tapenakara o te whakaminenga, ka tango ai i nga makawe o tona mātenga i whakamotuhaketia nei, a ka makā ki roto ki te ahi, ki tera i raro i te patunga tapu o nga whakamarietanga.
- 19
- A me tango ano e te tohunga te peke o te hipi toa, ina oti te kohua, me tetahi o nga keke rewena-kore i roto i te kete, me tetahi o nga keke angiangi, o nga mea rewena-kore, a ka hoatu e ia ki runga ki nga ringa o te Natari, i muri iho i te heunga o ona makawe i whakamotuhaketia nei.
- 20
- A ka poipoia aua mea e te tohunga hei whakahere poipoi ki te aroaro o Ihowa: ka tapu tenei ma te tohunga, me te uma poipoi, me te peke hapahapai: a muri iho ka inu te Natari i te waina.
- 21
- Ko te ture tenei mo te Natari, nana te ki whakamotuhake, mo tana whakahere hoki ki a Ihowa ina whakamotuhaketia, hei tapiri mo ta tona ringa i whiwhi ai: kia rite tonu ki tana ki i ki ai ia; kei te ture o tona whakamotuhaketanga te tikanga mo tana e mea ai.
- 22
- A i korero ano a Ihowa ki a Mohi, i mea,
- 23
- Korero atu ki a Arona ratou ko ana tama, mea atu, Kia penei ta koutou manaakitanga i nga tamariki a Iharaira, mea atu ki a ratou,
- 24
- Ma Ihowa koe e manaaki, mana koe e tiaki:
- 25
- Ma Ihowa e mea kia mārama tona kanohi ki a koe, mana ano hoki koe e atawhai:
- 26
- Ma Ihowa hoki e mea kia ara tona mata ki runga ki a koe, mana ano e tuku iho te rangimarie ki a koe:
- 27
- A ka karangatia iho e ratou toku ingoa ki runga ki nga tamariki a Iharaira, a ka manaakitia ratou e ahau.
Address: 
Phone: 
Email: