- 1
- Na Paora, raua ko Timoti, na nga pononga a Ihu Karaiti, ki te hunga tapu katoa i roto i a Karaiti Ihu e noho ana i Piripai, ratou ko nga pihopa ko nga rikona:
- 2
- Kia tau ki a koutou te aroha noa, me te rangimarie, he mea na te Atua to tatou Matua, na te Ariki hoki na Ihu Karaiti.
- 3
- Whakawhetai tonu au ki toku Atua i nga maharatanga katoatanga ki a koutou.
- 4
- I aku inoinga katoa e puta ana taku inoi mo koutou katoa i nga wa katoa i runga i te hari,
- 5
- Mo koutou i uru ki te rongo pai, o te ra tuatahi ano a moroki noa nei;
- 6
- Pumau tonu toku whakaaro ki tenei mea nei ano, tera te kai timata o te mahi pai i roto i a koutou e whakaoti, taea noatia te ra o Ihu Karaiti;
- 7
- He tika nei hoki kia penei oku whakaaro ki a koutou katoa, no te mea kei roto koutou i toku ngakau; i a au nei i te here, i a au e korero whakatikatika nei, e whakau nei i te rongo pai, e uru tahi ana koutou katoa me ahau ki te aroha noa.
- 8
- Ko te Atua hoki hei kai whakaatu moku, mo te nui o toku koingo ki a koutou katoa, i runga i te ngakau aroha o Ihu Karaiti.
- 9
- Ko taku inoi ano tenei, kia nui haere tonu to koutou aroha i runga i te matauranga i nga mahara mohio katoa;
- 10
- Kia kitea ai e koutou nga mea e rereke ana; kia tinihanga kore ai koutou, kia he kore ai, taea noatia te ra o te Karaiti;
- 11
- Kia kī ano hoki i nga hua o te tika, e puta i a Ihu Karaiti, hei kororia hei whakamoemititanga mo te Atua.
- 12
- Na e mea ana ahau kia mātau koutou, e aku teina, ki te tukunga iho o nga mea i pa mai ki a au, pai tonu hei whakanekehanga ake i te rongo pai;
- 13
- Kua kitea hoki oku mekameka mo ta te Karaiti, puta noa i te kāinga o te kingi, i era atu wahi katoa ano hoki;
- 14
- A kua ngakau nui te tokomaha o nga teina i roto i te Ariki, i oku mekameka nei, hira rawa ano hoki to ratou maia ki te korero i te kupu, kahore he mataku.
- 15
- Etahi na te hae na te totohe, etahi na te whakaahuareka, i kauwhau ai i a te Karaiti;
- 16
- Etahi na te totohe ta ratou kauwhau i a te Karaiti, ehara i te mea he hē-kore no te whakaaro, e mea ana kia tapiritia mai oku mekameka ki te mamae;
- 17
- Etahi na te aroha, e mahara ana kua waiho ahau hei korero whakatikatika mo te rongo pai.
- 18
- A, pehea iho? ahakoa he aha, he aha, he tinihanga, he pono, e kauwhautia ana a te Karaiti; a e hari ana ahau ki tenei, ae ra, ka hari ano ahau.
- 19
- E mātau ana hoki ahau ka ai tenei hei whakaoranga moku, i a koutou na ka inoi, i te Wairua ano hoki o Ihu Karaiti ka homai;
- 20
- Ko taku hoki tenei e whakamau tonu atu nei, e tumanako atu nei, e kore ahau e whakama i tetahi mea, engari ka tino maia ahau, a ka pera me to nga wa katoa, ka whakanuia ano a te Karaiti aianei e toku tinana, ahakoa i te ora, ahakoa i te mate.
- 21
- Ki a au hoki to te ora ko te Karaiti, to te mate he taonga.
- 22
- Ki te ora ia ahau i te kikokiko, ko te hua tenei o taku mahi: a kahore e mohio ki taku e whiriwhiri ai.
- 23
- E karapitia mai ana hoki ahau e nga mea e rua, he hiahia nei toku ki te haere, kia noho ai ahau ki a te Karaiti; ko te mea tino pai rawa hoki ia:
- 24
- Ko te noho ia i te kikokiko, engari tena he pai mo koutou.
- 25
- A ka u nei toku whakaaro ki tenei, e mātau ana ahau tera ahau e noho, noho tonu iho ano hoki ki a koutou katoa, hei whakaneke ake hei whakahari i a koutou i runga i te whakapono;
- 26
- Kia hira rawa ai to koutou whakamanamana i roto i a Karaiti Ihu ki a au, moku ka tae atu ano ki a koutou.
- 27
- Kia tika ia ta koutou whakahaere, kia rite ki ta te rongo pai o te Karaiti; a ki te haere atu ahau kia kite i a koutou, ki te ngaro mai ranei, kia rongo ahau ki a koutou mea e tu ana koutou i runga i te wairua kotahi, i te ngakau kotahi, me te tohe tahi ano ki te whakapono o te rongo pai;
- 28
- Kahore hoki he wehi ki tetahi mea a o koutou hoa riri: he tohu hoki tenei ki a ratou mo te whakangaromanga, ki a koutou ia mo te oranga, a ko tenei ano na te Atua.
- 29
- Kua hoatu nei hoki tenei ki a koutou hei meatanga ma koutou ki a te Karaiti, ehara i te mea ko te whakapono anake ki a ia, engari ko te mate ano hoki mo te whakaaro ki a ia;
- 30
- Kei a koutou na ano hoki taua tu pakanga i kite ra koutou ki a au, a ka rongo nei inaianei kei a au.
Address: 
Phone: 
Email: