- 1
- Na, ki te mea he whakamarietanga kei roto i a te Karaiti, ki te mea he pehi mamae to te aroha, ki te mea he whiwhinga tahitanga ki te Wairua, ki te mea he ngakau aroha he mahi tohu,
- 2
- Kia rite toku hari i a koutou, kia kotahi te whakaaro, kia kotahi te aroha, huihuia nga ngakau, i runga i te whakaaro kotahi.
- 3
- Kei meinga tetahi mea i runga i te totohe i te whakapehapeha; engari kia papaku te ngakau, ko era atu, kia whakanuia e te whakaaro.
- 4
- Kaua tana ake e tirohia e tetahi e tetahi, engari ko nga mea a era atu hei tirohanga ma tetahi ma tetahi.
- 5
- Ko tenei hei whakaaro ma koutou, ko tera i a Karaiti Ihu:
- 6
- I te ahua nei ia o te Atua, kihai i mea he tahae tona rite ki te Atua te nui;
- 7
- Heoi whakaititia ana ia e ia ano, kua mau ki te ahua o te pononga, kua meinga kia rite ki te tangata:
- 8
- A ka kitea tona ahua e rite ana ki to te tangata, ka whakapapaku iho i a ia ano, kua meinga kia ngohengohe, taea rawatia te mate, te mate nei o te ripeka.
- 9
- Na konei whakateiteitia ake ana ia e te Atua, a hoatu ana ki a ia he ingoa e nui atu ana i nga ingoa katoa;
- 10
- Kia tuturi ano ki te ingoa o Ihu nga turi katoa, o nga mea i te rangi, o nga mea i te whenua, o nga mea i raro i te whenua;
- 11
- Kia whakaae ano hoki nga arero katoa ko Ihu Karaiti te Ariki, hei whakakororiatanga mo te Atua Matua.
- 12
- Na, e aku teina aroha, i ngohengohe tonu hoki koutou ki a au i mua, he teka i nga wa anake oku i kona, engari rawa ano ia inaianei i a au kahore i kona, whakaotia to koutou whakaoranga i runga i te wehi i te wiri:
- 13
- Ko te Atua hoki te kai mahi i roto i a koutou o te hiahia, o te mahi, he mea e rite tonu ana ki tana i pai ai.
- 14
- I nga mea katoa e mea ai koutou, whakakahoretia te amuamu te tautohetohe;
- 15
- Kia kore ai koutou e whaikupuria, kia tapatahi ai, he tamariki koha kore na te Atua, i waenganui o te whakatupuranga tutū, parori ke, kei roto nei koutou i a ratou e tiaho ana hei māramatanga i te ao;
- 16
- Kia mau pu ki te kupu o te ora, kia hari ai ahau i te ra o te Karaiti, ki a au kihai nei i oma noa, kihai i mahi noa.
- 17
- Na, ki te ringihia ahau ki runga ki te patunga tapu, ki nga mahi a to koutou whakapono, ka hari ahau, ina ka hari tahi me koutou katoa.
- 18
- Kia hari hoki koutou ki tenei mea ano, tatou tahi ano kia hari.
- 19
- Na, e mea ana ahau i roto i te Ariki i a Ihu, tera a Timoti e tonoa wawetia e ahau ki a koutou, kia ora ai hoki toku ngakau, ina mohio ahau ki a koutou mea.
- 20
- Kahore hoki oku tāngata e rite ana te ngakau ki tona, hei mahara pono ki a koutou mea.
- 21
- Ko ta te katoa hoki e rapu nei, ko ta ratou ake, kahore hoki nga mea a Karaiti Ihu.
- 22
- E mātau ana ia koutou ki ona tohu, he pera tana me ta te tamaiti ki te matua, ko toku hoa ia ki nga mahi a te rongo pai.
- 23
- E mea ana hoki ahau tera e hohoro taku tono atu i a ia, ina kite ahau i nga mea e pa mai ki a au.
- 24
- Otiia e u ana toku whakaaro i roto i te Ariki, ko ahau ano hoki e hohoro te tae atu.
- 25
- I mea ano ia ahau me tono atu ki a koutou a Epaporitu, toku teina, toku hoa mahi, toku hoa hoia, na koutou ia karere, he kai mahi ano hoki i nga mea i matea e ahau.
- 26
- Koingo tonu hoki ia ki a koutou katoa, konohi rawa, no te mea i rongo koutou he turoro ia.
- 27
- He turoro ra hoki ia tata pu ki te mate: otira i tohungia ia e te Atua; ehara ano i te mea ko ia anake, ko ahau ano hoki, kei tapiritia he pouri ki toku pouri.
- 28
- Koia i nui rawa ai toku ngakau ki te tono atu i a ia, kia kite ai ano koutou i a ia, kia hari ai, kia taharahara iho ai hoki toku pouri.
- 29
- Kia nui te hari i runga i te Ariki, ina tae atu ia; whakahonoretia ano hoki nga pera:
- 30
- No te mea na te mahi ki a te Karaiti i tata ai ia ki te mate, te ihupuku ki te ora, kia rite ai i a ia nga mahi ki ahau, kihai nei i rite i a koutou.
Address: 
Phone: 
Email: