- 1
- Heoi, e aku teina, kia hari i roto i te Ariki. Ki ahau kahore he hohatanga o te tuhituhi atu i aua mea nei ano ki a koutou; ki a koutou ia hei mea e u ai.
- 2
- Kia tupato ki nga kuri, kia tupato ki nga kai mahi i te kino, kia tupato ki te tapahanga.
- 3
- Ko tatou hoki te kotinga, e mahi nei ki te Atua i runga i te wairua, e whakamanamana nei ki a Karaiti Ihu, a kahore e u te whakaaro ki te kikokiko:
- 4
- Tenei ano ia kei a au he take e u ai te whakaaro ki te kikokiko. Ki te mea tetahi atu he mea tana e u ai tona whakaaro ki te kikokiko, tera atu ano taku:
- 5
- Ko te kotinga i te ra tuawaru, no te whanau o Iharaira, no te hapu o Peniamine, he Hiperu no nga Hiperu; ki ta te ture ritenga he Parihi;
- 6
- To te ngakau nui ki te Atua, i whakatoi ahau i te hahi; to te tika, ara to tera i te ture, kahore he kupu moku.
- 7
- Heoi nga mea i waiho e ahau hei taonga, kiia ake enei e ahau hei rukenga, i te mea ka whakaaro nei ki a te Karaiti.
- 8
- Ae ra kiia iho e ahau nga mea katoa hei rukenga, i te mea ka whakaaro nei ki te pai whakaharahara o te matauranga ki a Karaiti Ihu ki toku Ariki: he whakaaro nei ki a ia i riro ai ena mea katoa aku ki te kore, ae ra kiia iho e ahau hei paru, kia whiwhi ai ahau ki a te Karaiti;
- 9
- Kia kitea ai hoki i roto i a ia, kahore he tika oku ake, ara tera i te ture, engari ko tera e na runga mai ana i te whakapono ki a te Karaiti, te tika a te Atua, tera i te whakapono:
- 10
- Kia mātau ai ahau ki a ia, ki te kaha hoki o tona aranga mai, ki te urunga tahitanga hoki ki ona mamae, he mea whakaahua kia rite ki tona matenga;
- 11
- Me kore ahau e tutuki ki te aranga mai i roto i te hunga mate.
- 12
- Ehara i te mea kua mau ano i a au, kua tino rite ranei ahau: engari e whaia atu ana e ahau, me kore e mau i a au te mea i mau ai ahau i a Karaiti Ihu.
- 13
- E aku teina, kahore aku kianga ake kua mau i a au: kotahi ia taku, wareware ake i a au nga mea o muri, tautorotoro tonu ahau ki nga mea o mua,
- 14
- Whai tonu atu ki te tohu, ki te utu whakahonore o to runga karangatanga a te Atua, i roto i a Karaiti Ihu.
- 15
- Na, te hunga o tatou kua tino rite, kia penei a tatou whakaaro: a ki te rereke a koutou whakaaro ki tetahi mea, ma te Atua ano tenei e whakakite ki a koutou.
- 16
- Ahakoa kua taea e tatou te aha te aha, kia kotahi ano te ruri mo to tatou whakahaere, kia kotahi tonu te mea hei whakaaronga ma tatou.
- 17
- Kia rite ta koutou ki taku, e aku teina, tirohia iho hoki te hunga e rite ana te haere ki a matou kua waiho nei hei tauira ma koutou.
- 18
- (He tokomaha hoki kei te haere, ka maha nei nga wa i korerotia ai ratou e ahau ki a koutou, a ka korerotia nei inaianei me te tangi ano ahau, he hoa whawhai ratou ki te ripeka o te Karaiti;
- 19
- Te tukunga iho ki a ratou he whakangaromanga, to ratou atua ko te kopu, to ratou kororia hoki kei runga i to ratou whakama, ko nga mea o te whenua to ratou e whakaaro ai.)
- 20
- Ko te rangi ia te wahi i tangata whenua ai tatou; kei reira hoki te Kai whakaora e tāria atu nei e tatou, te Ariki a Ihu Karaiti:
- 21
- Māna nei e whakaahua ke to tatou tinana tūtūa nei, kia rite ki tona tinana kororia, i runga i te mahinga a tona kaha e taea ai e ia te pēhi nga mea katoa ki raro i a ia.
Address: 
Phone: 
Email: