- 1
- He mea whakarihariha ki a Ihowa te pauna hē; he taimaha tika tana i pai ai.
- 2
- Ka tae mai te whakapehapeha, ka tae mai ano te whakama; kei te hunga whakaiti ia te whakaaro nui.
- 3
- Ko to ratou ngakau tapatahi ano hei arahi i te hunga tika; ka ai ano te whanoke o te hunga poka ke hei whakangaro mo ratou.
- 4
- E kore te taonga e whai mana i te ra o te riri: kei te tika ia he oranga ake i te mate.
- 5
- Ma te tika o te ngakau tapatahi ka tika ai tona ara; ka hinga ia te tangata kino i runga i tona kino.
- 6
- Ma te tika o te hunga tika ka mawhiti ai ratou; ka mau ia te hunga poka ke i runga i to ratou kino.
- 7
- I te matenga o te tangata kino, kore iho ana mea i tumanako atu ai; kahore noa iho ano hoki he tumanakohanga atu ma te hunga he.
- 8
- Ka mawhiti mai te tangata tika i roto i te raru, a ka riro mai te tangata kino hei whakakapi mo tona turanga.
- 9
- Hei huna mo tona hoa te mangai o te ngutu kau; na, ma te mohio te hunga tika ka mawhiti ai.
- 10
- Ka hari te pa ki te pai o te hunga tika, a ka tangi te oi ki te whakangaromanga o te hunga kino.
- 11
- Ma te manaakitanga o te hunga tika ka kake ai te pa, ka pakaru ia i te mangai o te hunga kino.
- 12
- Ta te tangata mahara-kore he whakahawea ki tona hoa; te tangata matau ia, whakarongo puku ana.
- 13
- Te tangata kopikopiko ki te kawe korero, ka whakapuakina e ia nga mea ngaro; ta te wairua pono ia he hipoki i te korero.
- 14
- Ki te kahore he whakaaro i puaki mai, ka hinga te iwi; he ora hoki kei nga kai whakatakoto whakaaro tokomaha.
- 15
- Ka mamae te tangata ko tana nei hei whakakapi mo ta te tangata ke; kei te ora ia te tangata e kino ana ki te whakakapi turanga.
- 16
- Ka mau te kororia i te wahine tikanga pai; ka mau ano nga taonga i nga tangata kaha.
- 17
- He atawhai i tona wairua ta te tangata atawhai, a he whakararu i ona kikokiko ta te tangata nanakia.
- 18
- Ta te tangata kino mahi he mahi i te teka; kei te takoto ia te utu mo te kai whakato i te tika.
- 19
- To te tika he ora; waihoki to te tangata e whai ana i te kino, ko te mate mona.
- 20
- Ta Ihowa e whakarihariha ai he ngakau whanoke; tana e ahuareka ai ko te hunga e tika ana te ara.
- 21
- Ahakoa awhi nga ringa ki a raua, e kore te tangata kino e whakaharakoretia; ka mawhiti ano te uri o te hunga tika.
- 22
- Rite tonu ki te whakakai koura i te ihu o te poaka te wahine ataahua kahore nei ona ngarahu pai.
- 23
- Ta te hunga tika e minamina ai he pai anake; tumanako iho te hunga kino, ko te riri.
- 24
- Ta tetahi he rui, heoi e tapiritia mai ana, ta tetahi he kaiponu i te mea tika, a, rawa-kore noa iho.
- 25
- Te wairua ohaoha ka momona, te tangata e whakamakuku ana, ka whakamakukuria ano ia.
- 26
- Te tangata e kaiponu ana i te witi, ka kangā tera e te nuinga; ka tau ia te manaakitanga ki runga ki te mahunga o te tangata e hoko ana.
- 27
- Te tangata e rapu marie ana i te pai, ka whiwhi ano ki te whakapai: te tangata e rapu ano i te kino, ka tae mai ano ki a ia.
- 28
- Te tangata e whakawhirinaki ana ki ona taonga, ka taka: na, te hunga tika ka rite to ratou tupu ki to te rau rakau.
- 29
- Te tangata e whakararu ana i tona whare, he hau te taonga e whakarerea iho mona: hei pononga ano te kuare ma te ngakau whakaaro nui.
- 30
- No te rakau o te ora nga hua o te tangata tika: he whakaaro nui ano te tangata hopu wairua.
- 31
- Nana, he utu ano to te tangata tika i runga i te whenua; nui atu to te tangata kino raua ko te tangata hara.
Address: 
Phone: 
Email: