- 1
- Nga whakatauki a Horomona. He whakaaro nui te tamaiti, ka koa te pāpā; he whakapouri ia mo tona whaea te tamaiti kuare.
- 2
- Kahore he rawa o nga taonga o te kino, kei te tika ia te oranga ake i te mate.
- 3
- E kore a Ihowa e tuku i te wairua o te tangata tika kia hemo kai; ka aia atu ano e ia te rawa o te hunga kino.
- 4
- Ka rawa-kore te tangata ki te mea he ringa ngoi-kore tona ki te mahi; ma te ringa kakama ia e hua ai te taonga.
- 5
- Te tangata e kohikohi ana i te raumati, he tamaiti mahara ia; te tangata e moe ana i te kotinga witi, he tamaiti tera e hua ai te whakama.
- 6
- Kei runga nga manaakitanga i te mahunga o te tangata tika; tena ko te mangai o te hunga kino, ka taupokina tera e te mahi nanakia.
- 7
- Te maharatanga ki te tangata tika, hei mea tera mo te manaakitanga; ka pirau ia te ingoa o te hunga kino.
- 8
- To te ngakau whakaaro, he tahuri mai ki te whakahau; te ngutu wairangi ia ka hinga.
- 9
- Te tangata haere tika, he haere ora tana; ka mohiotia ia te tangata he huarahi parori ke ana.
- 10
- Te tangata he whakakini ana ona kanohi, he pouri tana e homai ai; ka hinga ano te ngutu wairangi.
- 11
- Hei puna ora te mangai o te tangata tika; tena ko te mangai o te hunga kino, ka taupokina tera e te mahi nanakia.
- 12
- To te mauahara he whakaoho i nga totohe; to te aroha he hipoki i nga he katoa.
- 13
- E kitea te whakaaro nui ki nga ngutu o te tangata matau, ko te rakau ia te mea mo te tuara o te ngakau-kore.
- 14
- Ta te hunga whakaaro nui he rongoa i te matauranga, e tata ana ia te mangai o te kuare ki te whakangaromanga.
- 15
- To te tangata taonga pa kaha ko ona rawa; hei whakangaromanga ia mo nga rawa-kore to ratou rawa-kore.
- 16
- Te tukunga iho o te mahi o te tangata tika he ora; to nga hua ia o te kino he hara.
- 17
- Kei te ara ki te ora te tangata e pupuri ana i te kupu ako; te tangata ia e kore e pai kia riria tona he, ka kotiti ke ia.
- 18
- Te tangata ngutu teka e hipoki nei i te mauahara, te tangata kua puaki tana kupu ngautuara, he kuare ngatahi raua.
- 19
- E kore nga kupu maha e hapa i te kino; he mahara nui ia te tangata he ngutu kokopi nei ona.
- 20
- He hiriwa e whiriwhiria ana te arero o te tangata tika. Te ngakau o te hunga kino, ano te iti!
- 21
- He tokomaha e whangaia ana e nga ngutu o te tangata tika, ka mate ia te hunga kuare, he kore hoki no te ngakau mahara.
- 22
- Ta Ihowa manaaki, ma reira e hua ai te taonga, kahore ano hoki he whakapouritanga e tapiritia mai e ia.
- 23
- Hei mahi takaro ma te wairangi te whakatoi; kei te tangata matau ia te whakaaro nui.
- 24
- Ta te tangata kino i wehi ai ka tae mai ano ki a ia; ka homai ano hoki ta te hunga tika i hiahia ai.
- 25
- Ka rite ki te tukauati kua pahemo te korenga o te hunga kino; tena ko te tangata tika he turanga mau tonu tera.
- 26
- Te winika ki nga niho, te paowa ki nga kanohi, pera tonu te mangere ki ona kai unga mai.
- 27
- Ma te wehi ki a Ihowa e maha ake ai nga ra; ka whakatorutorua ia nga tau o te hunga kino.
- 28
- Tumanako atu te hunga tika, koa iho, tumanako atu te hunga kino, ngaro iho.
- 29
- He kaha mo te tangata tika to Ihowa ara; he whakangaromanga ia mo nga kai mahi i te kino.
- 30
- E kore te tangata tika e whakangaueuetia, a ake ake; te hunga kino ia, e kore e nohoia e ratou te whenua.
- 31
- Te mangai o te tangata tika hua ana te whakaaro nui; ka tapahia ia te arero whanoke.
- 32
- E mohio ana nga ngutu o te tangata tika ki nga mea ka manakohia; he whanoke ia to te mangai o te hunga kino.
Address: 
Phone: 
Email: