- 1
- Kua oti i te whakaaro nui tetahi whare mona te hanga, e whitu nga pou kua oti te tarai e ia.
- 2
- Kua oti ana kararehe te patu e ia, whakananu rawa tana waina, kua oti ano tana tepu te whakapai.
- 3
- Kua ungā mai e ia ana kotiro, e karanga ana ia i runga i nga wahi tiketike rawa o te pa.
- 4
- Ki te mea he kuare tetahi, me peka mai ia ki konei: te tangata mahara-kore, ko tana kupu tenei ki a ia,
- 5
- Haere mai, kainga taku taro, inumia hoki te waina kua oti nei te whakananu e ahau.
- 6
- Whakarerea atu te hunga kuare, kia ora ai koutou, haere hoki i te ara o te matauranga.
- 7
- Te tangata e ako ana i te tangata whakahi, he whakama te riro mai mana; te tangata e riri atu ana ki te tangata kino, ka whakapiritia mai ano he hē ki a ia.
- 8
- Kaua e riria te tangata whakahi, kei kino ia ki a koe: riria te tangata whakaaro nui, a ka aroha ia ki a koe.
- 9
- Hoatu te mohiotanga ki te tangata whakaaro nui, a ka neke ake ana whakaaro; whakaakona te tangata tika, a ka maha ake ana kupu mohio.
- 10
- Te timatanga o te whakaaro nui ko te wehi ki a Ihowa; he matauranga hoki te mohiotanga ki nga mea tapu.
- 11
- Maku hoki ka maha ai ou ra, maku ka neke ake ai nga tau e ora ai koe,
- 12
- Ki te nui au whakaaro, mau ano au whakaaro nui; ki te whakahi koe, mau anake to pikaunga.
- 13
- He wahine wairangi, he mangai nui ia; he kuare ia, kahore ona mohiotanga ki te aha, ki te aha.
- 14
- Noho ana ia i te kuwaha o tona whare i runga i te nohoanga i nga wahi tiketike o te pa.
- 15
- He mea kia karanga atu ai ia ki nga tangata e haere ana i te ara, e maro tonu ana o ratou huarahi,
- 16
- Ki te mea he kuare tetahi, mana e peka mai ki konei; he tangata whakaaro-kore, ko tana kupu tenei ki a ia,
- 17
- He reka nga wai i tahaetia, he ahuareka ano te taro e kainga pukutia ana.
- 18
- Tē mohio taua tangata kei reira nga tupapaku, kei nga wahi hohonu o te reinga te hunga i karangatia e ia.
Address: 
Phone: 
Email: